Yausuas 5:2-8
Nqe cim:
“Cia li lees hais tias tus Tswv yog Vajtswv. Nws tsim peb thiab peb yog nws tug; peb yog nws haivneeg thiab peb yog nws pab yaj.” (Ntawv Nkauj 100:3)
Lus nug rau sawvdaws xav:
– Vajtswv samhwm kom Yausuas ua dabtsi? Vim licas?
– Tus Tswv haivneeg lub ntsiab yog licas?
– Qhov no pab peb licas thaum peb ua neej ntseeg nrog neeg ntiajteb?
Vajtswv samhwm kom Yausuas ua kevcai txiav rau cov pejxeem vim 40 lub xyoo nyob hauv tiaj suabpuam, phaum hluas no tsis tau ua kevcai txiav (nqe 3-7). Kevcai txiav tau Vajtswv samhwm coj los ua lubcim rau tej lus cogtseg ntawm Vajtswv thiab Anplahas thiab nws cajces (Chivkeeb 17:9-14), thiab kuj yog lubcim qhia tias cov Yixalayees yog tus Tswv haivneeg.
Tus Tswv haivneeg yog tus Tswv tug. Qhov uas txiav tawv noov povtseg ua yamntxwv txog noobneej tej kev txhaum raws roj ntsha ntawm Adas yuav tsum raug txiav povtseg. Cov Yixalayees yog haivneeg coglus tseg, lawv tsis yog cajces “qub” ntawm Adas lawm, tiamsis lawv yog cajces ntawm tus Tswv txojkev cai, tsis yog tsuas pauv hloov sab nraud xwb tiamsis pauv hloov hauv lubneej tso kev txhaum tseg huv tibsi (II Kevcai 10:16; Yelemis 4:4). Nco ntsoov hais tias peb yog tus Tswv tug, qhov ntawd yog txoj koob hmoov tus Tswv pub dawb los ntawm Nws txojkev hlub. Peb yuav ua tsis tau lub neej pehawm, ua tus Tswv tes haujlwm tseeb mus txog thaum peb paub meej qhov tseeb no (I Petus 2:9-10).
Tus Tswv haivneeg yuav tsum mloog Nws lus. Kevcai txiav tawv noov raws li cov Yixalayees tiam Vajluskub Qub mas tseemceeb kawg li vim tsis yog tsuas ua lub cim qhia tias lawv yog tus Tswv tug xwb, tseem yog lub cim ntawm tus neeg coglus ua neej raws tus Tswv tej kevcai. Zaug no yog kevcai txiav “zaug ob” rau cov Yixalayees (nqe 2). Zaug xubthawj yog phaum neeg tawm hauv tebchaws Iziv los tiamsis raug tuag tas hauv tiaj suabpuam vim “lawv tsis mloog tus Tswv lus” (nqe 6). Nyob ntawm no, thaum ua kevcai txiav, Vajtswv xav qhia hais tias tus Tswv haivneeg yuav tsum mloog Nws lus. Kevcai txiav tsuas muaj qabhau thaum ua tawm sab nraud qhia tshwm nplooj siab mloog lus thiab ua neej raws li tej lus cogtseg nrog tus Tswv.
Tus Tswv haivneeg yuav tsum cia siab rau Nws. Ua ntej mus tua lub nroog Yelikaus ruaj khov, Vajtswv samhwm ua kevcai txiav, raws li tibneeg tej kev xav ces ntawd yog ib tes haujlwm txaus ntshai kawg li, vim tus Tswv haivneeg cheem tsum tseg sijhawm tos kom lawv tej qhov txhab zoo huv tibsi (nqe 8). Tiamsis, tus Tswv xav qhia Nws haivneeg yuav tsum cia siab rau Nws. Peb lub zog yog los ntawm Vajtswv los, kev ntseeg yog yam cuabyeej siv los pab kom peb tau txais lub zog (Henplais 11:6), thiab kev cia siab rau tus Tswv yuav tsum qhia tshwm dhau ntawm kev mloog tus Tswv lus txaus nkaus.
Nyob hauv ncua kev mus rau Tebchaws Coglus Tseg sab ntsujplig, peb kuj ntsib txhiab pua yam kev sim siab hauv lubneej. Thaum nco ntsoov hais tias peb yog tus Tswv haivneeg thiab txiav txim siab ua neej raws li lub meejmom tus Tswv pub, peb yuav muaj zog hla dhau tej kev sim siab kom ua tau lubneej ntseeg nrog neeg ntiajteb.
Thov Vajtswv,
Tus Tswv, thov ua tsaug vim Koj tau cawm thiab pub nyuam yaus tau los ua Koj haivneeg. Thov pab nyuam yaus ua neej phim lub meejmom ntawm Koj haivneeg txawm yog yuav ntsib ntau yam kev sim siab. Nyuam yaus tuav Yexus Khetos lub npe thov, Amees.
Peb pheej ua licas thaum ntsib tej kev sim siab hauv lubneej? Peb kev daws tej teebmeem ntawd puas raws li Vajtswv Txojlus qhia?
Nyeem Vajluskub hauv peb lub xyoos: II Kevcai 8
Kênh Youtube BHKTHN:
