Klei Aê Diê Blŭ: Rôm 7:7-13
Êlan kliăng: “Ƀiădah jing klei soh yơh yua klei jăk bi mdjiê kâo, čiăng kơ klei soh dưi bi êdah jing klei soh, leh anăn kyua klei mtă klei soh dưi jing kjham hĭn” (Rôm 7:13b)
Klei êmuh ksiêm mĭn: Si klei hưn mdah kơ knuih leh anăn bruă klei bhiăn? Si boh sĭt klei bhiăn bi hmăi hlăm klei hdĭp anak mnuih? Hŏng si hdră êlan klei soh mâo klei myun leh, kyua klei mtă mjing djăp mta klei tluh hlăm ai tiê? Ya klei hriăm drei hrêč mă kơ drei pô?
Khua ƀĭng kna Y-Pôl bi klă knuih klei bhiăn amâo djŏ jing klei soh ôh. Mklăk wĭt, klei bhiăn hriê mơ̆ng Aê Diê jing doh jăk, klei mtă ăt doh jăk mơh, kpă ênô leh anăn jăk. Bruă klei bhiăn jing ktrâo brei kơ anak mnuih thâo kral si klei soh jing (êlan 7b). Klei bhiăn jing ală kĭng bi êdah hnơ̆ng čuăn Aê Diê čiăng kơ phung ƀuôn sang ksiêm dlăng diñu pô, čiăng thâo kral klei soh tơdah diñu gao klei bhiăn.
Klei bhiăn ăt brei anak mnuih thâo boh tŭ jhat mơ̆ng klei ngă soh srăng atăt kơ klei phat kđi, klei djiê (Rôm 7:5; 6:23a). Aê Diê brei kơ anak mnuih klei êngiê čiăng thâo bi knal klei hdĭp êbeh dlai, jăk mơak tơdah gưt hlue klei mtă; leh anăn bi knal klei jhat, klei ruă knap tơdah amâo gưt ôh klei Aê Diê mtă. Wăt tơdah klei bhiăn Khua Yang jing jăk, Aê Diê brei pioh ba klei jăk mơak anak mnuih, ƀiădah klei bhiăn pô amâo dưi mgaih msir bruă klei soh, leh anăn wăt kăn dưi đru anak mnuih dôk hdĭp jăk hĭn rei. Boh klei sĭt, klei bhiăn ngă kơ anak mnuih hdĭp jhat hĭn. Khua ƀĭng kna Y-Pôl lač snei, hŏng klei mtă anăn klei soh mâo klei myun mjing hlăm mnuih djăp mta klei tluh (êlan 8). Ñu yua boh blŭ “kâo” čiăng kah mbha klei ñu pô tuôm găn leh, wăt mbĭt hŏng hlei pô hdĭp tuôm hdĭp leh ti gŭ klei bhiăn kă, snei mphŭn dô hlăk ka thâo klei bhiăn ôh, wăt tơdah kâo ngă soh dưn kăn mâo pô phat kđi rei, ƀiădah tơdah klei mtă truh, klei soh lŏ hdĭp bi mdjiê kâo.
Mâo klei bhiăn snăn klei soh hdĭp, bi ñu lĕ djiê. Klei anei bi klă anak mnuih amâo mâo klei dưi ôh ti anăp klei bhiăn phat kđi. Kyuadah knuih klei soh, bi kdơ̆ng, anak mnuih čiăng ngă bi mklăk hŏng djăp mta klei Khua Yang čiăng. Tĭng nah mkăn, hnơ̆ng čuăn klei bhiăn Khua Yang brei, amâo mâo hlei pô ôh êngao kơ Khua Yang Yêsu dưi truh tơl. Klei soh mâo klei myun blŭ djơ djĕ snei: “Khă si ih ktưn hrưn dưn ăt ih srăng lĕ mơh hlăm klei bi lông anei, leh anăn klei djiê dôk guôn ih”. Snăn yơh, boh tŭ mơ̆ng klei dôk hdĭp djă pioh klei bhiăn hŏng klei dôk hdĭp phưi tha hlue si klei tluh ti anôk mdê hĕ? Kyuanăn, hŏng klei mtă anăn klei soh mâo myun ngă kơ anak mnuih jing jhat hĭn êjai.
Bi mni kơ Khua Yang Yêsu djiê hrô brei leh kơ drei ti kyâo bi kal, hŏng klei khăp leh anăn klei pap Ñu, drei dưi hdĭp kdlưn hĭn ti dlông klei bhiăn kă, dưi yap kpă leh anăn mâo klei bi mtlaih!
Si ngă drei dôk hdĭp tui hlue klei bhiăn amâodah knang kơ klei khăp leh anăn klei pap Khua Yang?
Wah lač: Ơ Khua Yang, akâo klei ktang myang Khua Yang đru kâo dưi hĭn hŏng klei čiăng ngă soh, čiăng kơ kâo mâo klei čiăng leh anăn ngă tui si klei Khua Yang čiăng, leh anăn ƀrư̆ hruê jing jăk klă hĭn msĕ si Ama kâo ti dlông adiê. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Bruă Lêwi 3
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
