Loos 7:7-13
Nqe cim:
“Twb yog txojkev txhaum muab txoj kevcai tua kuv, kuv thiaj raug kev ploj kev tuag. Yog li ntawd, kuv thiaj paub hais tias txojkev txhaum zoo li cas, thiab tej kevcai ntawd ua rau kuv pom hais tias txojkev txhaum phem kawg nkaus li” (Loos 7:13b).
Peb saib ntxiv Phau Txhais Tshiab HMOWSV:
“Yog kev txhaum siv yam uas zoo ua rau kev tuag tshwm rau hauv kuv, kom thiaj pom tias txojkev txhaum ntawd txhaum tiag tiag li thiab vim muaj txoj kevcai kev txhaum thiaj phem kawg nkaus”.
Lus nug rau sawvdaws xav:
– Qhov tseeb thiab qabhau ntawm txoj kevcai tau hais txog licas?
– Txoj kevcai ua haujlwm hauv tibneeg lubneej licas?
– Los ntawm yam dabtsi kev txhaum siv tau txoj kevcai los tshoov neeg lub siab ntshaw txhua yam?
– Peb kawm tau dabtsi rau tus kheej?
Timthawj Paulus hais khov kho hais tias txoj kevcai tsis yog kev txhaum. Tiamsis, txoj kevcai yog Vajtswv muab pub, yog li txoj kevcai yeej dawbhuv, thiab tej nqe kevcai los yeej dawbhuv, ncaj ncees thiab zoo kawg nkaus li. Qabhau ntawm txoj kevcai yog taw qhia kom tibneeg paub tias kev txhaum yog dabtsi (nqe 7b). Txoj kevcai zoo li lub tsom iav qhia tshwm tej yam Vajtswv xav kom Nws haivneeg saib kom lawv zeem paub kev txhaum thaum lawv ua txhaum txoj kevcai.
Txoj kevcai tseem qhia rau tibneeg paub nqi zog ntawm kev txhaum yuav coj tibneeg mus rau kev txiav txim thiab kev tuag (Loos 7:5; 6:23a). Vajtswv pub rau tibneeg muaj kev ywjpheej kom muaj lubneej txaus nkaus, kaj siab thaum ua raws Nws txoj kevcai; thiab yuav ntsib kev txomnyem, nyuaj siab thaum tsis ua raws Nws txoj kevcai. Tus Tswv txoj kevcai yeej dawbhuv, tau tus Tswv muab pub kom coj kev tau zoo los rau tibneeg tiamsis txoj kevcai tus kheej yeej daws tsis tau teebmeem kev txhaum thiab kuj tsis pab kom tibneeg ua tau lubnneej zoo. Qhov tseeb, txoj kevcai ua rau tibneeg yim ua lubneej tsis zoo. Timthawj Paulus hais tias, “txojkev txhaum muab txoj kevcai ua hau kev tshoov kuv siab kom kuv ntshaw txhua yam” (nqe 8). Nws siv lo lus “kuv” kom qhia tau tej yam uas nws thiab cov neeg uas raug khi hauv txoj kevcai tau ntsib hais tias, yav tas los thaum tsis tau paub txoj kevcai ces txawm kuv ua txhaum kuv kuj tsis raug leejtwg txiav txim, tiamsis thaum muaj txoj kevcai ces ua rau kev txhaum tshwm tuaj, thiab kuv thiaj tuag
Thaum muaj txoj kevcai ces kev txhaum tshwm tuaj, thiaj ua rau Paulus raug tuag. Qhov no hais meej txog qhov uas tibneeg ua tsis tau dabtsi thaum raug txojcai txiav txim. Vim qhov tseeb ntawm kev txhaum yog kev ntxeev siab tawmtsam, tibneeg xav ua yam tawmtsam tej uas tus Tswv nyiam. Qhov no qhia tau tias, txoj kevcai uas tus Tswv pub, tsuas muaj Tswv Yexus tibleeg thiaj ua tiav xwb. Kev txhaum siv txoj kevcai ua haukev tshoov neeg siab hais tias: “Txawm koj yuav siv zog npaum twg los yeej yuav plam zaj ntsuas kev kawm thiab kev tuag tabtom tos ntsoov koj”. Yog li ntawd, qabhau ntawm lubneej ua raws txoj kevcai thiab ua raws kev ntshaw sab nqaij tawv muaj yam dabtsi sib txawv? Vim li ntawd, kev txhaum tos nrhw siv txojcai los ua kom tibneeg ua siab hlob ntshaw txhua yam.
Thov ua Tswv Yexus tsaug, rau qhov Nws tuag txhiv peb saum tus ntoo khaublig, los ntawm Nws txojkev hlub thiab txoj koobhmoov, peb thiaj kov yeej txoj kevcai tej kev teem txim, tau suav hais tias yog neeg ncajncees thiab tau cawmdim!
Thov Vajtswv,
Tus Tswv, thov Koj lub hwjchim pab nyuam yaus kovyeej tej kev ntshaw ua txhaum kom nyuam yaus ua tau raws Koj siabnyiam thiab yim hnub yim ua tau neeg zoo li Koj. Nyuam yaus tuav Yexus Khetos lub npe thov, Amees.
Peb tabtom ua neej raws txoj kevcai lossis vamkhom tus Tswv txojkev hlub thiab txoj koobhmoov?
Nyeem Vajluskub hauv peb lub xyoo: Levis Kevcai 3
Kênh Youtube BHKTHN:
