Klei Aê Diê Blŭ: Y-Yôhan 13:1-5, 21-30
Êlan kliăng: “Ñu khăp leh kơ phung Ñu hlăm lăn ala, leh anăn Ñu khăp kơ digơ̆ tơl knhal tuč” (Y-Yôhan 13:1b)
Klei êmuh ksiêm mĭn: Tăp hnơ̆ng Khua Yang khăp kơ phung ƀĭng kna Ñu? Klei rao jơ̆ng kơ phung ƀĭng kna, wăt Y-Yuđas, si bi êdah kơ klei khăp yuôm bhăn Khua Yang? Si klei khăp yuôm bhăn Khua Yang kiă kriê ai tiê ih?
“Khăp tơl knhal tuč” jing khăp nanao, khăp amâo mâo knhal, khăp nanao wăt tơdah săn asei mlei, kyua amâo mâo ôh wưng jing “knhal tuč” čiăng mjưh mdei amâodah bi kah mbha klei khăp Khua Yang Yêsu brei kơ drei (Rôm 8:38-39). Bruă rao jơ̆ng kơ phung ƀĭng kna bi êdah klei khăp sĭt nik, bi ti gŭ pô leh anăn prŏng snăk mơ̆ng Khua Yang. Khăp sĭt nik, bi ti gŭ pô kyua Ñu rao dŭm plă jơ̆ng čhŏ snăk. Klei khăp Khua Yang prŏng prĭn kyua thâo pô dơ̆ng tŭ klei dleh dlan ƀiădah Ñu ăt bi mĭn kơ phung ƀĭng kna, mtô lač kơ diñu hŏng klei luă gŭ, săn asei, bi hmô. Hŏng Khua Yang, klei khăp brei mâo bruă ngă amâo djŏ knŏng klei blŭ ôh. Tơdah Khua Yang ngă bruă kơ phung ƀĭng kna, Ñu ăt jing nai, jing Khua Yang kơ diñu amâo djŏ mtrŭn ênoh Ñu msĕ si Khua ƀĭng kna Y-Pêtrôs čhuai ôh (êlan 14), ƀiădah, klei anăn lŏ mđĭ Khua Yang hĭn. Êlâo anăn, Ñu mtô kơ digơ̆ brei pô prŏng hĭn kơ jih jang hlăm Ƀuôn Ala Mtao Ñu jing pô ngă bruă yơh amâo djŏ jing pô dôk gŭ ƀơ̆ng huă ôh (Y-Luk 22:24-30).
Klei khăp Khua Yang lŏ prŏng hĭn mơh kyua Ñu rao jơ̆ng wăt kơ Khua ƀĭng kna Y-Yuđas, pô srăng lhiăr kơ Ñu. Mơ̆ng tal êlâo Khua Yang thâo ñu srăng lhiăr ƀiădah Ñu ăt brei kơ gơ̆ lu mmông găl, leh anăn tlâo blư̆ hưn êlâo brei kơ gơ̆ răng (Y-Yôhan 6:70-71; 13:21-26; Y-Luk 22:48). Boh nik, Khua Yang lač kpă klei anei hŏng ñu, ƀiădah ti anăp grăp čô mnuih Ñu ăt krơ̆ng knuih knaih kơ gơ̆ (Y-Yôhan 13:27-28). Tơl truh gơ̆ lhiăr, Khua Yang Yêsu ăt êdu êun iêô gơ̆ jing “găp” mơh (Y-Mathiơ 26:50).
Klei khăp Khua Yang prŏng snăk, bŏ hŏng klei pap! Brei hdơr, drei ăt tuôm jing pô roh bi kdơ̆ng hŏng Aê Diê mơh (Rôm 5:10), ƀiădah Ñu ăt khăp leh anăn djiê hrô kơ drei mâo mmông găl dưi bi grăng hŏng Aê Diê, Drei tuôm bi êdah mơ̆ klei ngêñ hŏng pô lhiăr kơ drei, ngă jhat kơ pô hŏng klei mjưh mdei klei bi blŭ hrăm hŏng digơ̆, amâo dlăng ƀô̆ mta digơ̆ hlăm sang Aê Diê amâodah amâo blŭ hrăm hŏng digơ̆? Tơdah mâo sa čô đăo arăng ƀuh ngă soh ƀiădah kmhal leh klei soh leh anăn lŏ wĭt kkuh mpŭ kơ Aê Diê, si knuih drei hŏng digơ̆? Ñĕ kơ digơ̆ knư̆ kbưi knư̆ jăk hĕ? Aê Diê amâo ngă snăn ôh. Brei mâo klei thâo pap msĕ si Khua Yang! Khua ƀĭng kna Y-Pôl tuôm mtă kơ Phung Sang Aê Diê Kôrantô brei thâo pap, bi êdah klei khăp kơ sa čô đăo leh tơdah arăng ƀuah mkra hlăm Sang Aê Diê (II Kôrantô 2:6-8). Bruă brei drei ngă jing brei jih ai tiê thâo bi djŏ hŏng grăp čô mnuih, kdrêč adôk jao jih kơ Aê Diê srăng ngă (Rôm 12:17-21). Brei bĕ klei khăp yuôm bhăn Aê Diê kiă kriê ai tiê drei hlăm yan bi hdơr Khua Yang Tŭ Klei Knap Mñai thŭn anei.
Drei hdĭp mbĭt hŏng klei khăp yuôm bhăn msĕ si Khua Yang leh mơ̆ amâodah ka?
Wah lač: Ơ Khua Yang Yêsu, bi mni kơ Ih mñă leh kơ kâo kơ klei khăp Ih yuôm bhăn snăk hlăm yan bi hdơr Khua Yang Tŭ Klei Knap Mñai thŭn anei! Akâo kơ klei khăp Ih kiă kriê ai tiê kâo čiăng kâo khăp nanao kơ jih jang ayŏng adei msĕ si Ih khăp leh.. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Kbiă 33
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
