Pajlug 21:5
Nqe cim
“Nquag thiab ua tib zoo npaj koj thiaj muaj nplua mias. Yog koj lam tau lam ua, koj yuav muaj tsis txaus” (Pajlug 21:5).
Peb saib hauv Phau Txhais tshiab HMOWSV
“Tus neeg nquag tej hom phiaj yeej coj kom nws muaj nplua mias, tiamsis txhua tus uas maj ua dog ua dig yeej tu pluas xwb.”
Lus nug rau sawvdaws xav:
– “Tus neeg nquag” yog tus neeg ua haujlwm zoo licas?
– Nqe Pajlug saum no hais txog ob daim duab sib txawv twg thiab thaum kawg zoo licas?
– Tus Tswv xav kom koj muaj kev xav licas thaum ua haujlwm?
“Tus neeg nquag” nyob hauv nqe no yog hais txog tus neeg xyuamxim thiab mob siab ua haujlwm lossis ua raws li luag txib. Ntawm no yog tus neeg ua haujlwm muaj kev ua siab ntev, mob siab thiab nquag. Xibhwb M. Lyon tau hais txog tus neeg nquag yog “ib tug neeg ncajncees mus raws qhov tseeb thiab muaj homphiaj tseeb meej”. Yog li ntawd “tus neeg nquag” tsis yog tsuas nquag hauv kev ua haujlwm xwb, tiamsis tseem yog tus neeg muaj tswvyim, xyuamxim hauv kev npaj siab thiab ua tib zoo ua raws li tau npaj tseg los ntawm nplooj siab dawb thiab lubneej ncajncees. Pajlug 21:5a qhia meej hais tias: “Tus neeg nquag tej hom phiaj yeej coj kom nws muaj nplua mias.”
Pajlug 21:5b hais txog tus neeg txawv “tus neeg nquag”, ntawd yog “tus uas maj ua dog ua dig”. Kab lus no siv los hais txog tus neeg muaj lub siab kub, tsis muaj kev npaj siab txhij txhua ua ntej. Lo lus “maj ua dog dig” yog hais txog yamntxwv ntawm tus neeg “ruam”, tsis paub cai, tsis xyuamxim thiaj yoojyim ua yuamkev, thiab ua tsis tiav haujlwm (Pajlug 19:2). Nyob hauv kev nrhiav nyiaj txiag, maj ua dog dig muaj lub ntsiab hais txog kev ntshaw nyiaj, tiv qees ua txhua yam kom npluanuj sai (Pajlug 28:20). Thaum kawg ob txojkev ua neej no nyias tau nyias nqi zog sib txawv. Tus neeg muaj kev npaj siab thiab nquag yuav muaj npluamias, ruaj khov, tiamsis tus neeg maj ua dog dig yuav muaj tsis txaus.
Tus ntseeg yuav tsum zeem paub hais tias Vajtswv lub homphiaj thiab Vajtswv txojkev loj siab dua tibneeg txojkev xav. Vajtswv hais tias: “Lub ntuj nyob siab lub ntiajteb no li cas, tej uas kuv ua thiab kuv xav nyob siab tshaj tej uas nej ua thiab nej xav npaum li ntawd” (Yaxayas 55:9). Vim li ntawd, ua ntej yuav npaj siab ua ib yam dabtsi, peb yuav tsum thov tus Tswv taw qhia. Thaum ua raws li kev npaj siab, peb yuav tsum xyuamxim kom tej uas peb ua yog ncajncees, haum tus Tswv siab, vim ua li ntawd thiaj muaj kev kaj siab, muaj npluamias. Tsis txhob vim ntshaw tej yam ntawm hauv ntej ua rau peb maj ua dog dig mus ua tej yam txhaum, ua li ntawd yuav ntsib teebmeem rau tomqab. Tsis tas li ntawd xwb, peb kuj yuav tsum ua raws li Vajtswv Txojlus qhia hais tias: “Txhua yam uas nej ua, nej yuav tsum rau siab ntso ua ib yam li nej ua rau Vajtswv, tsis yog nej ua rau neeg” (Kaulauxais 3:23). Peb tsis yog tsuas nquag ua, ua tas siab kom muaj npluamias xwb, peb tseem yuav tsum ua kom Vajtswv tau koobmeej thiab, vim tej neeg ibncig yuav pom Vajtswv dhau ntawm peb kev ua haujlwm.
Thov Vajtswv
Tus Tswv, thov zam txim rau nyuam yaus vim ntau zaug tau maj ua dog ua dig, tsis ua tib zoo xav thaum kawg thiaj ua tsis tiav. Thov Koj pab nyuam yaus txawj xyuamxim hauv kev npaj homphiaj thiab tas siab hauv kev ua haujlwm. Nyuam yaus tuav Cawmseej Yexus lub npe thov, Amees.
Muaj yam dabtsi peb cheemtsum thov tus Tswv pab kom peb nquag ua?
Nyeem Vajluskub hauv peb lub xyoo: Chivkeeb 49
Kênh Youtube BHKTHN:
