Klei Aê Diê Blŭ: Y‑Yêrêmi 30:11-24
Êlan kliăng: “Kâo srăng mkra ih tui si klei năng, leh anăn kâo amâo srăng lui ôh ih tlaih kơ klei bi kmhal” (Y‑Yêrêmi 30:11c).
Klei êmuh ksiêm mĭn: Si boh klei phung ƀuôn sang Israel dôk găn? Si knuih phung tuôm khăp kơ phung ƀuôn sang Aê Diê hlăk anăn? Ya klei Aê Diê srăng ngă kơ phung ƀuôn sang Aê Diê leh Ñu ƀuah mkra digơ̆? Si klei drei hriăm thâo kơ Aê Diê hlăm klei hriăm anei?
Phung ƀuôn sang Aê Diê dôk hlăm boh klei “Klei ruă ih amâo thâo hlao ôh, leh anăn anôk êka ih jing kjham êdi” (êlan 12), ƀiădah amâo mâo ôh klei wah lač, klei mdrao hlao amâodah klei čuă êmuh mơ̆ng phung tuôm siă suôr hŏng diñu êlâo dih msĕ si “pô khăp”. Phung anăn “…wơr bĭt leh ih, diñu amâo uêñ kơ ih ôh” (êlan 14a). Ƀiădah dŭm klei ênguôt hnĭng phung ƀuôn sang Aê Diê dôk tŭ mă jing klei ƀuah mkra mơ̆ng Yêhôwa, “Kyuadah kâo ngă kơ ih leh msĕ si sa čô roh, klei bi kmhal mơ̆ng sa čô roh amâo thâo pap ôh…” (êlan 14b) snăn Khua Yang ăt jing Pô srăng pap brei kơ diñu, bi mtlaih diñu hlăk êjai dleh dlan hĭn, bi hlao klei ruă êka hlăm ai tiê, ba diñu lŏ wĭt mơ̆ng klei jing mnă, lŏ mdơ̆ng ƀuôn sang, brei klei mơak, mđĭ ênoh mnuih ƀuôn sang, amâo lŏ hdĭp hlăm klei hêñ ênguôt ôh ƀiădah bŏ hŏng klei guh kơang (êlan 17-19). Yêhôwa lač anak čô diñu srăng dưi lŏ bi mrâo msĕ si êlâo kơ diñu jing mnă, diñu ăt dưi lač jing phung ƀuôn sang Aê Diê (êlan 20, 22).
Klei bi kmhal mơ̆ng Yêhôwa jing klei bŏ hŏng huĭ hyưt kơ phung ƀuôn sang Ñu, amâo djŏ Aê Diê amâo khăp kơ diñu ôh ƀiădah kyuadah “klei ih soh leh jing prŏng, kyuadah klei soh ih jing kjham” (êlan 14b), kyua anăn Yêhôwa bi ƀuah mkra diñu. Aê Diê lač diñu srăng amâo tlaih ôh kơ klei bi kmhal, ƀiădah klei bi kmhal kpă ênuah mơ̆ng Aê Diê knŏng hlăm klei mkă čiăng kơ diñu thâo kral klei soh leh anăn srăng dưi lŏ bi mrâo leh diñu klă sĭt kmhal klei soh (êlan 11b). Klei anei brei ƀuh giê hnuăt ƀuah mkra mơ̆ng Aê Diê jing giê hnuăt klei khăp, bi êdah klei khăp êlam Ñu brei kơ phung ƀuôn sang Israel. Hlăk dôk hlăm klei truh dleh dlan êdi jing mông diñu thâo kral hlei “pô khăp” klă sĭt khăp kơ diñu.
Drei khăng ƀuh jăk leh anăn bi mĭn arăng khăp kơ pô sĭt hmư̆ klei blŭ êdu êun, jăk hmư̆ wăt tơdah anăn jing hlăk drei dôk êbat hlăm klei soh čhuai, leh anăn ăt khăng ƀuh amâo jăk ôh hlăm ai tiê sĭt hmư̆ klei sĭt nik lač kơ klei soh pô. Klei hriăm hruê anei mñă kơ drei kyua khăp kơ drei anăn Khua Yang ƀuah mkra čiăng drei jing jăk hĭn (Hêbrơ 12:4-11). Msĕ si sa čô mnuih ruă čiăng aê êa drao mdrao mbliah kơh dưi hlao, klei Aê Diê ƀuah mkra čiăng snăk đru kơ phung drei thâo pô dôk ngă soh leh anăn amâo lĕ êlam hlăm klei soh ôh. Anăn jing klei ƀuah mkra kyua khăp.
Drei tuôm thâo mơ̆ si ngă klei Aê Diê khăp sĭt Ñu ƀuah mkra leh anăn bi mrâo pô?
Wah lač: Ơ Khua Yang Aê Diê khăp hơiêng! Kâo bi mni lač jăk kơ Ih kyua klei khăp yuôm bhăn Ih brei kơ kâo mđing kơ klei jăk, wăt tơdah hlăk êjai Ih brei kâo tuôm hŏng klei truh leh anăn yua giê hnuăt klei khăp ƀuah mkra čiăng kâo jing kluôm ênŭm.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: I Klei Yăl Dliê 21:1 – 22:1
Kênh Youtube BHKTHN:
