Klei Aê Diê Blŭ: Y‑Mathiơ 6:19-20; Y‑Luk 12:32-34
Êlan kliăng: “Jăk hĭn mâo mnơ̆ng ƀiă mbĭt hŏng klei huĭ mpŭ kơ Yêhôwa, hŏng mâo lu ngăn drăp mbĭt hŏng klei rŭng răng.” (Klei Bi Hriêng 15:16).
Klei êmuh ksiêm mĭn: Khua Yang Yêsu mtô brei mkăm pioh ngăn drăp ti anôk? Ya ngă? Ya mta klei Aê Diê kăp čiăng brei kơ phung anak ƀuôn sang Ñu? Mkăm pioh ngăn drăp ti lăn ala ya klei srăng truh? Ti anôk drei dôk mkăm pioh ngăn drăp drei?
Dua trăn Klei Aê Diê Blŭ hruê anei mă mơ̆ng klei Khua Yang Yêsu mtô ti dlông čư̆. Khua Yang dôk mtô kơ klei phung mnuih rŭng răng tơdah uêñ mĭn đei kơ mnơ̆ng mnuă hlăm klei hdĭp ti lăn ala anei. Lu mnuih amâo huă amâo ƀơ̆ng amâo pĭt kyua rŭng răng kơ “prăk kăk êsei huă djam ƀơ̆ng”. Kyuanăn, Khua Yang Yêsu mtô đăm mkăm pioh ngăn drăp yuôm ti lăn ala anei ôh, anôk mâo muôr leh anăn bring bi rai, leh anăn mâo phung knĕ ƀoh mtih mŭt tlĕ, ƀiădah brei mkăm pioh ngăn drăp yuôm hlăm adiê jing anôk hơĭt ênang amâo dưi bi rai (Y‑Mathiơ 6:19‑20).
Hlăm Y‑Luk kdrêč 12, pô čih hră čih klei Khua Yang mtô kơ klei rŭng răng. Khua Yang lač klă: “Kyuadah Ama diih mơak brei kơ diih ƀuôn ala mtao Ñu” (êlan 32). Aê Diê mơak čiăng brei ƀuôn ala mtao Ñu kơ drei snăn ya klei drei lŏ rŭng răng? Ya ngă drei lŏ gĭr ktĭr mkăm pioh ti lăn ala anei? Khua Yang mtô kơ phung anak ƀuôn sang Ñu “čhĭ bĕ ngăn dŏ diih leh anăn brei mnơ̆ng pap” leh anăn mprăp kơ drei pô ngăn yuôm hlăm adiê jing anôk amâo dưi luč amâo dưi rai (êlan 33). Khua Yang klah čŭn: “Kyuadah ti anôk ngăn yuôm diih dôk, tinăn mơh ai tiê diih srăng dôk” (êlan 34). Sĭt nik, tơdah ăt dôk rŭng răng mkăm pioh ngăn drăp yuôm ti lăn ala, drei knŏng mđing uêñ ti lăn ala yơh. Bi tơdah drei “mơĭt” ngăn drăp yuôm drei ti ƀuôn jăk, drei srăng mâo ai tiê êđăp ênang leh anăn amâo lŏ rŭng răng ôh. Drei knŏng uêñ mĭn tui duah leh anăn mkăm pioh ti ƀuôn ala mtao Aê Diê.
Khua Yang čiăng drei mâo klei hdĭp êkoh ti lăn ala anei čiăng kơ drei đăm rŭng răng leh anăn suăi êmăn đei ôh mkăm pioh ngăn yuôm ti lăn ala anei. Klei hdĭp êkoh amâo djŏ lač kơ klei hdĭp ƀun ƀin, kƀah knap ôh ƀiădah jing klei hdĭp ênang, mơak hlăm djăp mta klei, amâo brei klei tluh kơ mnơ̆ng mnuă bi hmăi ktŭng hrip ôh. Khua Yang čiăng klei mĭn ai tiê drei mđing mĭn kơ ya klei Khua Yang pioh brei leh kơ phung anak ƀuôn sang Ñu, amâo djŏ ôh kơ mta mnơ̆ng drei gĭr duah bi mâo kơ drei pô. Tơdah gĭr bi bŏ klei hdĭp hŏng mnơ̆ng mnuă ti lăn ala anei drei amâo dưi lŏ mđing mĭn kơ mta klei yuôm bhăn dôk nanao hlŏng lar ôh.
Mâo sa čô mtao thâo mĭn hĭn ăt lač mơh: “Jăk hĭn mâo mnơ̆ng ƀiă mbĭt hŏng klei huĭ mpŭ kơ Yêhôwa, hŏng mâo lu ngăn drăp mbĭt hŏng klei rŭng răng” (Klei Bi Hriêng 15:16). Anei jing sa klei sĭt nik ñu hrui mă leh lu thŭn dôk hdĭp ti lăn ala anei hŏng klei thâo mĭn Aê Diê brei. Ƀiă ngăn drăp ti lăn ala amâo djŏ jing ƀiă ngăn drăp hlăm adiê ôh. Tơdah drei thâo yua ngăn drăp ti lăn ala mkăm pioh kơ ênuk hlŏng lar hŏng klei đru arăng, myơr kơ bruă Aê Diê… sĭt nik ngăn drăp drei hlăm adiê srăng jing prŏng snăk.
Si ngă drei mơak mơ̆ hŏng knhuah hdĭp êkoh tui si Klei Aê Diê Blŭ mtô?
Wah lač: Ơ Khua Yang, akâo Ih brei kâo mâo knhuah hdĭp êkoh čiăng kơ kâo uêñ mĭn mkăm pioh kơ ênuk hlŏng lar. Akâo Ih brei kâo mâo ai tiê kmah leh anăn kăp yua mnơ̆ng Khua Yang brei pioh đru mnuih mkăn.
Dlăng Klei Aê Diê Blŭ hlăm tlâo thŭn: Klei Bi Hriêng 6:20‑35; 7:1‑27
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
