Mathais 6:19-20; Lukas 12:32-34
Nqe cim:
“Ua neeg pluag uas paub ntshai tus Tswv zoo dua li ua neeg npluanuj, tiamsis muaj teebmeem” (Pajlug 15:16).
Lus nug rau sawvdaws xav:
- Tswv Yexus kom khaws nyiaj txiag rau qhov twg? Vim li cas?
- Vajtswv npaj txhij yuav pub rau Nws tej menyuam yam dab tsi?
- Khaws khoom nyiaj txiag qhov txhia chaw tseg hauv ntiajteb yuav ua cas?
- Peb tabtom npaj muaj khoom nyiaj txiag zoo li cas?
Ob ntu Vajluskub hnub no yog nyob hauv Tswv Yexus tej lus qhia pem roob. Tswv Yexus tab tom qhia txog tibneeg tej kev txhawj thaum saib rau tej khoom noj haus hauv lub neej tiam no. Ntau tus noj tsis qab, pw tsis tsaug zog tsuas yog txhawj rau “kev noj hnav thiab haus”. Yog li ntawd, Tswv Yexus qhia tsis txhob khaws nyiaj txiag thiab qhov txhia chaw tseg rau hauv ntiajteb uas muaj ntsaum kabrwg, xeb noj thiab muaj tubsab nyiag, tiamsis kom khaws nyiaj txiag qhov txhia chaw tseg saum ntuj uas yog qhov chaw ruaj khov thiab tsis ploj piam (Mathais 6:19-20).
Hauv Lukas tshooj 12, tus sau hais txog Tswv Yexus tej lus qhia ntsigtxog kev txhawj. Tus Tswv hais tias: “rau qhov nej Leej Txiv twb txaus siab muab Nws lub tebchaws rau nej lawm” (nqe 32). Vajtswv ntuj txaus siab muab Nws lub ntuj ceebtsheej rau peb, ua cas peb tseem pheej txhawj? Vim li cas peb tseem siv zog khaws nyiaj txiag thiab qhov txhia chaw tseg rau lub neej hauv ntiajteb? Tus Tswv qhia Nws haiv neeg hais tias:“ Cia li muab nej tej qhov txhia chaw muag, thiab muab tej ntawd faib rau cov neeg pluag” tom qab ntawd cia li khaws nyiaj txiag qhov txhia chaw tseg rau saum ntuj qhov chaw uas tsis txawj ploj (npe 33). Tus Tswv xaus lus hais tias: “Nej tej nyiaj txiag thiab qhov txhia chaw nyob qhov twg, nej lub siab yeej nyob qhov ntawd” (nqe 34). Tseeb tiag, thaum tseem muaj kev ntshaw khaws khoom nyiaj txiag qhov txhia chaw tseg hauv ntiajteb, peb tseem xav rau lub ntiajteb. Yog peb xa tej khoom nyiaj txiag qhov txhia chaw tseg sau ntuj ceebtsheej ces peb muaj kev kaj siab tsis txob txhawj li lawm. Peb yuav tsum nrhiav thiab khaws qhov txhia chaw tseg cia rau lub tebchaws Ceebtsheej.
Tus Tswv xav kom peb txhua tus ua lub neej nyob li yus muaj, tsis pheej txhawj khaws tej qhov txhia chaw tseg rau lub neej hauv ntiajteb. Ua lub neej li yus muaj tsis yog yuav nyob xwb tsis ua haujlwm, tiamsis yog ua neej txaus siab rau yam yus muaj, tswj lub siab qaug rau ib yam khoom twg. Tus Tswv xav kom peb cov ntseeg Nws saib ntsoov rau tej uas tus Tswv npaj tseg rau peb, tsis yog tej uas yus khaws tseg rau yus. Thaum peb siv zog ua kom yus muaj txaus khoom qhov txhia chaw hauv ntiajteb, peb yeej tsis saib ntsoov rau tej uas tseemceeb thiab muaj nqis nyob mus ibtxhis lawm.
Tus vajntxwv uas txawj ntse kuj qhia hais tias: “Ua neeg pluag uas paub ntshai tus Tswv zoo dua li ua neeg npluanuj, tiamsis muaj teebmeem” (Pajlug 15:16). Cov lus hais no yog qhov tseeb hauv lub neej uas tus vajntxwv kawm tau ntawm kev ua lub neej muaj tswvyim uas tus Tswv pub. Ua neeg pluag hauv ntiajteb tsis tau suav hais tias yuav pluag saum ntuj. Yog peb paub siv tej khoom nyiaj txiag hauv lub ntiajteb, ua kom muaj nqis rau yam yuav nyob mus ibtxhis los ntawm kev pab neeg pluag thiab fij ua Vajtswv haujlwm…paub tseeb peb tej khoom nyob saum ntuj yuav muaj ntau kawg li.
Thov Vajtswv,
Tus Tswv,thov pab kom nyuam yaus ua tau lub neej li yog nyuam yaus muaj, kom paub xav txog yam yuav nyob mus ibtxhis. Thov pab nyuam yaus muaj lub siab dav rhawv npaj nroos siv tej khoom qhov txhia chaw pab lwm tus. Amees.
Peb puas txaus siab ua lub neej yog li yus muaj pub rau tus Tswv?
Nyeem Vajluskub hauv peb lub xyoo: Pajlug 6:20-7:27
Kênh Youtube BHKTHN:
