Yelemis 30:1-10
1 Tus Tswv uas yog cov Yixalayees tus Vajtswv hais rau kuv hais tias, 2“Yelemis, koj cia li sau tej lus uas kuv hais rau koj huv tibsi rau ib phau ntawv, 3rau qhov thaum txog sijhawm lawm, kuv yuav pub kom cov Yixalayees thiab cov Yudas uas yog kuv haivneeg rov vammeej ib yam li qub. Kuv yuav coj lawv rov los rau hauv lub tebchaws uas kuv muab rau lawv cov yawgkoob, lawv thiaj yuav rov tau lub tebchaws no ua lawv tug. Kuv yog tus Tswv uas hais li ntawd.” 4 Tus Tswv hais rau cov Yixalayees thiab cov Yudas hais tias, 5 “Kuv hnov ib lub suab quaj uas txaus ntshai heev, yog lub suab quaj txomnyem, tsis yog lub suab luag zoo siab. 6 Nimno nej cia li ua ib zoo xav saib! Tej txivneej puas yug tau menyuam? Ua li cas kuv pom txhua tus txivneej nyias pos rawv nyias lub plab ib yam li tus pojniam uas mob plab yuav yug menyuam? Vim li cas lawv tej plhu thimxem tas li? 7 Muaj ib hnub sawvdaws yuav raug kev txhawj kev ntshai; tsis muaj ib hnub uas yuav ntshai npaum li hnub ntawd, yog lub sijhawm uas kuv haivneeg ntxhov siab heev, tiamsis lawv yuav dim.” 8 Tus Tswv uas muaj hwjchim loj kawg nkaus hais tias, “Thaum txog hnub ntawd, kuv yuav txo tus quab uas khuam lawv cajdab thiab daws tej saw hlau uas khi lawv povtseg, lawv thiaj tsis tau mus ua lwm haivneeg qhev ntxiv lawm. 9Tiamsis lawv yuav ua kuv uas yog tus Tswv lawv tus Vajtswv tes haujlwm thiab ua Daviv tus xeebntxwv uas kuv yuav tsa ua lawv tus vajntxwv tes haujlwm. 10 “Kuv haivneeg, nej tsis txhob ntshai; cov Yixalayees, nej tsis txhob poob siab. Kuv yuav pab kom nej dim hauv lub tebchaws uas deb heev rov los, nej yuav tau rov los nyob hauv nej lub tebchaws kaj siab lug. Nej yuav tau rov los nyob tso siab plhuav thiab tsis muaj leejtwg ua rau nej ntshai li lawm.”
Nqi cim:
“Yog nej ua neej raws li kuv tej kevcai thiab fwm kuv tej lus,… Kuv yuav pub kom nej lub tebchaws muaj kev thajyeeb, thiab nej yuav tau zoo pw txaug zog tsis muaj leejtwg yuav ua rau nej ntshai. Kuv yuav muab tej tsiaj nyaum hauv lub tebchaws ua kom tu noob tas, thiab yuav tsis muaj kev tsov kev rog nyob hauv lub tebchaws”. (Levis Kevcai 26:3, 6).
Lus nug rau sawvdaws xav:
- Tej lo lus twg tau muab siv hais txog yam teebmeem txaus ntshai uas yuav los raug cov Yudas thiab cov Yixalayees?
- Vajtswv tej lus cogtseg pub rau Nws haivneeg yog licas?
- Peb txais Vajtswv lo lus cogtseg twg kom peb tau lubneej tsis muaj kev txhawj ntshai?
Tus cev lus Yelemis tau txais tej lus ntawm Vajtswv los hais rau cov Yixalayees thiab cov Yudas hais tias, Vajtswv yuav cawm lawv dim, Nws yuav coj cov uas raug ua cev qhev rov qab los rau hauv lub tebchaws uas Nws cog lus pub rau lawv cov yawg koob (nqi 3-4). “Lub suab quaj uas txaus ntshai heev” nyob rau hauv nqi 5 yog lo lus hais txog kev ntshai tshee hnyo, xob tas nrho ib ce thaum ntsib kev puastsuaj nyob hauv tshav rog, thiab lo lus “txivneej yug menyuam” nyob hauv nqi 6 hais txog tus txivneej kev txhawj, kev ntsawv siab thiab kev tiv mob zoo li tus pojniam uas tabtom mob plab yuav yug menyuam… Tej lus no yog muab siv los hais txog cov Yixalayees thiab cov Yudas lub siab txhawj ntshai thiab tej kev txomnyem uas lawv ntsib thaum lawv raug poob mus ua cev qhev.
Tiamsis, nyob rau hnub uas txaus ntshai, nyob rau ncua sijhawm uas txomnyem ntawd, Vajtswv yuav cawm lawv dim, qhov ntawd yuav ua rau lawv tsis muaj kev txhawj ntshai lawm. Vajtswv yog tus uas ncajncees rau nws tej lus cogtseg, nws yuav “txo tus quab uas khuam lawv cajdab thiab daws tej saw hlau uas khi lawv povtseg, lawv thiaj tsis tau mus ua lwm haivneeg qhev ntxiv lawm…” (nqi 8). Vajtswv haiv neeg tau ntsib tej kev txomnyem hauv luag tebchaws, lawv tsis tau pehawm Vajtswv tiamsis raug qhuab yuam pe tej dab tej mlom uas tsis paub dabtsi. Lawv ntsib kev quaj ntsuag, lawv ntshaw tau hu nkauj qhuas Vajtswv (Phau Ntawv Nkauj 137:1, 4). Twb yog vim li ntawd, Vajtswv thiaj muaj lus cogtseg hais tias lawv yuav tau rov qab los, tau ua Vajtswv tes haujlwm, thiab tau ua Daviv tus xeebntxwv uas Vajtswv tsa los ua lawv tus Vajntxwv tes haujlwm (nqi 9).
Vajtswv yeej tsis hnov qab nws tej lus cogtseg rau cov Yixalayees thiab cov Yudas, Vajtswv hais rau Nws haiv neeg hais tias, yog lawv ua neej raws li Nws tej kevcai thiab fwm Nws tej lus (Levis Kevcai 26:3) ces lawv yuav tsis txhawj tsis ntshai ib yam dabtsi li, vim Vajtswv yuav pub muaj kev thajyeeb hauv lawv lub tebchaws. Tej zaum peb tabtom nyob rau ntu neej uas ntsib kev txomnyem heev, peb tabtom txhawj ntshai, nyuaj siab, tsis muaj kev kaj siab. Tiamsis paub tseeb hais tias thaum txog sijhawm Vajtswv teem cia, peb yuav tau Vajtswv pab cawm thiab yuav tsis ua neej txhawj ntshai lawm. Peb cia li ua neej los ntawm kev cia siab rau peb tus Vajtswv uas ncajncees thiab tus uas muaj txojkev hlub.
Peb puas tau txais Vajtswv kev pab cawm thaum peb raug kev nyuaj siab ntxhov plawv lawm los tsis tau?
Thov Vajtswv:
Vajtswv tus uas ncajncees! Thaum kawm txog Koj txojkev tsomkwm Koj haiv neeg Yixalayees thiab Yudas, nyuamyaus pom hais tias Koj txojkev hlub thiab kev ncajncees loj kawg li. Thov pab nyuamyaus niaj hnub coj thiab ua raws li Koj txoj kevcai, nyuamyaus thiaj yuav tau txais lubneej muaj kev thajyeeb uas koj pub. Ameeg.
Email: kawmvajluskubtxhuahnub@gmail.com
Kênh Youtube BHKTHN:
