Yausuas 24:14-15
Nqe cim:
“Kuv thiab kuv tsevneeg, peb yuav pehawm tus TSWV tib leeg xwb.” (Yausuas 24:15b)
Lus nug rau sawvdaws xav:
– Zaj xwm no tshwm rau lub sijhawm twg?
– Yausuas tabmeeg coglus yam dabtsi, thiab lo lus cog tseg ntawd cuam tshuam li cas rau cov pejxeem?
– Yuav ua li cas peb thiaj li coglus tau li Yausuas?
Zaj xwm no tshwm muaj thaum cov Yixalayees twb mus nyob rau tebchaws coglus tseg lawm, Yausuas twb laus thiab yuav tuag. Nws hu cov pejxeem thiab cov thawjcoj tuaj rau ntawm Sekhees, nruab nrab ntawm tebchaws Palexatees, thiab kom lawv rov lees tej lus cog tseg uas yuav ua ncaj ncees rau tus Tswv (Yausuas 24:1). Ua ntej thawj zaug ua tsov rog, Yausuas twb hu cov pejxeem tuaj ib zaug rau ntawm no, thiab nws teeb thaj rau tus Tswv saum lub roob Enpales thiab nws hlawv tej khoom fij, khoom kaj siab rau tus Tswv. Nws nyeem tagnrho tus Tswv tej kevcai, tej lus foom koob hmoov yog lawv mloog lus thiab tej lus foom phem yog tsis ncaj ncees rau tus Tswv (Yausuas 8:30-35).
Hauv kev sib ntsib tagnrho cov pejxeem zaum kawg no, Yausuas ceebtoom cov Yixalayees cia li txiav txim siab tso tej vajtswv uas lawv cov yawgkoob pe tseg, lawv “yuav tsum hwm tus TSWV, muab siab npuab Nws”. Yausuas hais meej hais tias txawm lawv yuav pe tej vajtswv uas lawv cov yawgkoob ibtxwm pe lossis pe tej vajtswv nram tebchaws Iziv, los nws thiab nws tsev neeg yuav pe Vajtswv tib leeg xwb: “Kuv thiab kuv tsevneeg, peb yuav pehawm tus TSWV tib leeg xwb” (nqe 14-15). Cov Yixalayees ntseeg ruaj hais tias Yausuas thiab nws tsev neeg tej lus cog tseg yuav pehawm Vajtswv muaj tseeb, vim tej caijnyoog sijhawm uas lawv tau nrog nws los tebchaws Iziv los rau tebchaws coglus tseg, tej pejxeem thiab cov txwjlaug paub meej Yausuas, nws ibtxwm ua ncaj ncees rau Vajtswv thiab ua raws nraim Vajtswv tej lus, “Tus TSWV hais rau nws tus tubtxib Mauxes, kom Mauxes hais rau Yausuas thiab Yausuas ua raws li tej lus ntawd. Yausuas thiaj ua txhua yam raws li tej lus uas tus TSWV tau hais rau Mauxes lawm” (Yausuas 11:15). Ua ntej yuav tas sim neej, Yausuas tau tshaj tawm tej lus cog tseg ncaj ncees rau Vajtswv tsis yog ntawm nws tus kheej xwb tiamsis tagnrho nws tsev neeg thiab “Kuv thiab kuv tsevneeg, peb yuav pehawm tus TSWV tib leeg xwb”.
Yausuas tsev neeg tus qauv uas ua ncaj ncees rau Vajtswv ua tau ib tug qauv zoo rau tagnrho tiam ntawd xyaum, “Tiam uas Yausuas tseem ua neej nyob thiab tom qab uas nws tuag lawm, lossis ntu uas cov povthawj tiam ntawd tseem ua neej nyob, cov Yixalayees pehawm tus TSWV xwb, thiab lawv pom txhua yam uas tus TSWV tau ua pab cov Yixalayees.” (Yausuas 24:31). Zaj xwm ntawm Yausuas tsev neeg pab peb khaws tau ib zaj kawm, ib tsev neeg hlub Vajtswv kawg siab ntsws thiab ncaj ncees rau Vajtswv mas tibneeg sawvdaws yuav khaws tau peb tus qauv zoo xyaum.
Cia kom peb lub siab tawv qhawv cog lus tabmeeg sawvdaws hais tias, “Kuv thiab kuv tsevneeg, peb yuav pehawm tus TSWV tib leeg xwb”, ua ntej peb yuav tsum yog tus uas ua ncaj ncees rau Vajtswv thiab ua Nws tes haujlwm kawg siab kawg ntsws tso. Dhau li ntawd, peb yuav tsum muaj feem xyuam tu, saib xyuas peb cov menyuam lub neej sab ntsujplig, kom lawv coj raws li peb txoj kev coj ncaj ncees thiab ua Vajtswv tes haujlwm kawg siab ntsws.
Thov Vajtswv,
Vaj Leej Txiv tus muaj kev hlub, thov pab nyuam yaus tsev neeg, pojniam, menyuam pehawm thiab ua Koj tes haujlwm kawg siab ntsws kom ua tau tus qauv zoo rau Pawg Ntseeg xyaum. Nyuam yaus tuav Tswv Yexus Khetos lub npe thov, Amees.
Peb puas hmov tshua tu, saib xyuas peb cov menyuam lub neej sab ntsujplig?
Nyeem Vajluskub hauv peb lub xyoos: 2 Xwmtxheej Vajntxwv 5
Kênh Youtube BHKTHN:
