Klei Aê Diê Blŭ: Klei Bi Hriêng 28:4
Êlan kliăng: “Phung amâo gưt klei bhiăn ôh bi mni kơ phung ƀai, ƀiădah phung tui hlue klei bhiăn bi kdơ̆ng hŏng anăn” (Klei Bi Hriêng 28:4)
Klei êmuh ksiêm mĭn: Tui si Klei Bi Hriêng 28:4, ya klei truh tơdah anak mnuih lui klei bhiăn Aê Diê? Si pô tui hlue klei bhiăn Aê Diê srăng hdĭp? Hruê anei si phung đăo srăng ngă čiăng dưi dôk kjăp ti anăp klei lăn ala yap yuôm ƀiădah soh hŏng klei bhiăn Aê Diê?
Êlan Klei Aê Diê Blŭ anei čiăng bi hdơr kơ phung ƀuôn sang Khua Yang boh yuôm kơ klei gưt kơ Klei Aê Diê Blŭ hlăm klei hdĭp bŏ hŏng klei mplư leh anăn bi mlih nanao anei. Tơdah anak mnuih lui klei bhiăn Aê Diê, ƀrư̆ ƀrư̆ diñu dơ̆ng bi luč hĕ hnơ̆ng čuăn kơ klei kpă ênô leh anăn klei hdĭp myang. Amâo lŏ yap klei jhat jing klei soh ôh, leh anăn klei jhat anăn srăng jing hĕ klei mưng aguah tlam tơl jih jang mnuih tŭ ư, mtrŭt leh anăn bi mni mơh kơ klei ngă anăn. Bi klăk hŏng klei anăn, phung khăp leh anăn gưt kơ Klei Aê Diê Blŭ srăng mâo klei ktang dưi dôk kjăp ti anăp klei jhat ƀai leh anăn răng mgang klei sĭt nik.
“Klei bhiăn” hlăm êlan Klei Bi Hriêng anei amâo čiăng lač knŏng kơ klei bhiăn hlăm ênuk Klei Bi Mguôp Hđăp ôh, ƀiădah čiăng lač wăt kơ klei mtô bi hriăm leh anăn klei sĭt nik hlŏng lar Aê Diê mơh. Mnuih djă pioh Klei Aê Diê Blŭ jing mnuih dưm klei hdĭp ñu ti gŭ klei Aê Diê atăt gai, thâo kral klei jăk leh anăn klei jhat, klei djŏ leh anăn klei soh. Diñu amâo hdĭp tui si phung lu amâodah ngă tui si klei mưng lăn ala ôh, ƀiădah diñu hdĭp tui si klei Aê Diê čiăng. Êgao hĭn kơnăn, wăt diñu “bi blah” amâodah “bi kdơ̆ng” mơh hŏng klei amâo djŏ, diñu hdĭp hŏng klei thâo uêñ leh anăn yua klei dưi diñu mâo čiăng atăt mnuih mkăn hdĭp hŏng klei thâo mĭn leh anăn gưt kơ klei bhiăn.
Hruê anei, lu klei lăn ala yap yuôm ƀrư̆ ƀrư̆ bi klăk hŏng hnơ̆ng čuăn mơ̆ng Klei Aê Diê Blŭ. Mâo lu klei êlâo dih arăng yap soh ƀiădah ară anei arăng yap klei anei jing klei bhiăn ngă. Kyuanăn, brei phung đăo kơ Krist dôk răng leh anăn djă păn kjăp ti Klei Aê Diê Blŭ čiăng đăm jing msĕ si phung ênuk anei ôh. Khua ƀĭng kna Y-Pôl mtă: “Đăm jing msĕ si phung ênuk anei ôh, ƀiădah brei Aê Diê bi mlih klei hdĭp diih hŏng klei Ñu lŏ bi mrâo klei mĭn diih, čiăng kơ diih dưi thâo ya jing klei Aê Diê čiăng jăk, mơak, leh anăn klă” (Rôm 12:2). Khua Yang mtă brei phung đăo kơ Ñu dôk dơ̆ng ƀơ̆ng huă mdê hŏng phung amâo đăo, jing msĕ si kan luê đĭ nao phă akŏ êa, bi êdah klei kpă ênô leh anăn klei khăp Yang Krist. Khua Pô Mtô John Wesley tuôm lač leh snei: “Klei mĭn kơ knhuah hdĭp phung ênuk anei amâo ghă ôh, phung ênuk êdei srăng tŭ ư kluôm dhuôm.” Pruê̆ blŭ anei čiăng mñă kơ drei tơdah Phung Sang Aê Diê leh anăn gŏ sang amâo djă pioh kjăp ôh klei sĭt nik Khua Yang snăn phung ênuk êdei ênưih snăk srăng lui wir klei đăo leh anăn hnơ̆ng čuăn klei hdĭp myang.
Hlăm klei hdĭp grăp hruê, brei drei dlăng leh anăn ksiêm mĭn kơ Klei Aê Diê Blŭ čiăng bi mlih mrâo klei mĭn drei. Brei amĭ ama bi hriăm phung anak thâo huĭ mpŭ kơ Khua Yang leh anăn hdĭp tui hlue klei sĭt nik. Hlăm anôk mă bruă, ti sang hră amâodah hlăm ƀuôn sang, brei phung đăo hdĭp hŏng klei kpă ênuah, thâo khăp leh anăn amâo sa ai ôh hŏng bruă ngă soh. Wăt tăp năng srăng tlă anăp hŏng klei arăng bi kdơ̆ng leh anăn klei dleh dlan dưn, ƀiădah đăo kjăp bĕ kơ Aê Diê srăng brei ai ktang mrâo nanao kơ hlei pô dôk sĭt suôr hŏng Ñu.
Si drei dôk djă pioh klei sĭt nik Khua Yang hlăm klei hdĭp grăp hruê ti krah lăn ala hruê anei?
Wah lač: Ơ Khua Yang, đru kâo khăp leh anăn gưt kơ Klei Ih Blŭ grăp hruê. Brei bĕ kơ kâo klei thâo mĭn leh anăn klei jhŏng čiăng kơ kâo dôk kjăp ti anăp klei wê, leh anăn đru kâo jing pô hưn bi sĭt kơ klei sĭt nik leh anăn klei khăp Ih ti krah lăn ala anei. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Klei Mmuñ Hđăp 138-139
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
