Klei Aê Diê Blŭ: Y-Mathiơ 26:47-50
Êlan kliăng: “Yêsu lač kơ ñu, “Ơ Y-Yuđas, hŏng klei čŭm hĕ ih lhiăr kơ Anak Mnuih?” (Y-Luk 22:48)
Klei êmuh ksiêm mĭn: Ya jing klei Y-Yuđas kñăm čiăng tơdah čŭm Khua Yang Yêsu? Y-Yuđas lač “Kkuh kơ Ih, Ơ Nai!”, Khua Yang Yêsu lač “Ơ jiăng!” ya čiăng lač? Hruê anei, hlăm Phung Sang Aê Diê si ngă mâo mơ̆ phung tui hlue Khua Yang msĕ si Y‑Yuđas?
Leh bi tŭ ư hŏng phung knơ̆ng khua ngă yang srăng jao Khua Yang Yêsu čiăng mă tlâo pluh asăr prăk (Y-Mathiơ 26:14-16), Y-Yuđas ƀuh mlam anei yơh jing mlam găl hĭn, kyuanăn ñu atăt ba phung kahan mơ̆ng Sang Phat Kđi Yuđa hriê mă Khua Yang. Čiăng đăm mă čhuai mnuih êjai mlam, Y-Yuđas ngă kơ diñu sa klei bi knăl, anăn jing hlei pô ñu čŭm srăng mă čăp pô anăn yơh. Tui si bhiăn klei čŭm čiăng bi êdah klei khăp, kmiêk leh anăn čŭm ti miêng bi êdah klei khăp prŏng snăk. Ƀiădah ti war mnga Gêtsêmanê, Y-Yuđas čŭm Khua Yang Yêsu, ƀiădah klei čŭm anăn amâo djŏ klei čŭm mơ̆ng klei khăp leh anăn klei mpŭ ôh, ƀiădah klei čŭm mơ̆ng klei lhiăr, kyuadah leh klei čŭm anăn mtam, phung kahan mơ̆ng Sang Phat Kđi Yuđa mă čăp yơh Khua Yang Yêsu.
Khua Yang Yêsu lač kơ Y-Yuđas “Ơ jiăng!” čiăng lač Khua Yang ăt khăp, ăt yap Y-Yuđas jing mah jiăng Ñu, bi Y-Yuđas lač kơ Khua Yang “Kkuh kơ Ih, Ơ Nai!” čiăng lač ñu knŏng dlăng kơ Khua Yang Yêsu jing msĕ si sa čô nai mtô ñu msĕ si lu phung mkăn đuč, amâo djŏ Yang Mêsi, Pô Bi Mtlaih ñu ôh. Wăt tơdah anăn Y-Yuđas lŏ mblang jing bi mni kơ Aê Diê dưn (Klei Mphŭn Dơ̆ng 29:35) ƀiădah jih ênuk ñu tui hlue Khua Yang, ñu ka tuôm hưn Khua Yang Yêsu jing Pô Bi Mtlaih kơ klei hdĭp ñu ôh. Ñu tui hlue Khua Yang knŏng hŏng klei čiăng Gơ̆ srăng mdlưh knŭk kna Rôm leh anăn đĭ jing mtao čiăng kơ ñu dưi mâo klei mdrŏng sah, klei dưi jing khua prŏng đuč. Ƀiădah klei ñu kñăm čiăng anăn amâo jing ôh leh anăn kăn ƀuh mâo klei tŭ dưn rei, kyuanăn ñu čuăn čhĭ leh Khua Yang.
Hruê anei, mâo đa đa mnuih ăt nao kkuh mpŭ kơ Khua Yang grăp hruê kăm, đru bruă Sang Aê Diê, tăp năng djă bruă prŏng mơh hlăm Sang Aê Diê…ƀiădah diñu ka tuôm jing phung anak Khua Yang sĭt ôh. Čiăng lač diñu ka tuôm mă tŭ Khua Yang Yêsu jing Pô Bi Mtlaih kơ klei hdĭp diñu ôh, ka tuôm gưt leh anăn kkuh mpŭ kơ Khua Yang ôh. Snăn yơh, năng ai diñu ăt lač “khăp kơ Khua Yang” ƀiădah bruă diñu ngă hngah kơ Gơ̆, tăp năng knŏng čiăng mâo klei tŭ dưn kơ diñu pô đuč, amâo mdê ôh hŏng klei čhĭ Khua Yang. Khua ƀĭng kna Y-Pôl tuôm lač leh mơh kơ klei ai ngăm phung đăo ti čar Kret snei: “Diñu hưn kơ diñu thâo kral Aê Diê, ƀiădah diñu hngah Aê Diê hŏng bruă diñu ngă. Diñu jing phung arăng bi êmut, phung amâo gưt asăp ôh, leh anăn amâo dưi ngă sa mta bruă jăk ôh” (Y-Tit 1:16). Khua Yang bi êdah nanao klei Ñu khăp kơ drei, Ñu êmuh drei nanao kơ klei kñăm čiăng hlăm klei drei tui hlue Ñu leh anăn mă bruă kơ Ñu msĕ si Ñu lač leh Y-Yuđas mphŭn dô: “Ơ jiăng, ngă bĕ ya klei Ih čiăng hriê tinei!” (êlan 50). Hdơr bĕ, Khua Yang jing Pô thâo jih jang mnơ̆ng, Ñu thâo klă si klei drei dôk ngă kơ Ñu. Đăm brei ôh Khua Yang srăng êmuh drei: “hŏng klei čŭm hĕ ih lhiăr kơ Anak Mnuih?” (Y-Luk 22:48).
Ya jing klei bi êdah kơ drei dôk tui hlue leh anăn khăp kơ Khua Yang hŏng ai tiê sĭt?
Wah lač: Ơ Khua Yang Yêsu, akâo Khua Yang pap brei kơ kâo kyuadah mâo lu blư̆ kâo mâo klei blŭ, bruă ngă amâo djŏ ôh. Đru kâo amâo djŏ khăp knŏng hŏng klei blŭ ôh, ƀiădah đru kâo bi êdah klei khăp Ih hlăm klei kâo dôk dơ̆ng ƀơ̆ng huă bi guh kơang kơ Anăn Ih grăp hruê. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Yôp 42
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
