Galati 5:16-18
“Na inh wă khan kơ iĕm thoi âu: Iĕm athei apinh kơdih Yang Bơhngol ‘Lơ̆ng mơ̆t pơgơ̆r iĕm ling lang. Tơdah iĕm pơm thoi noh jơhngơ̆m đon iĕm huay kơ tơchĕng pơm tơdrong kơnê̆ ôh.” (Galati 5:16)
Nơ̆r jet tơchĕng pơwao:
- ‘Bok Pôl đei pơma tơ’bôh thoi yơ gah tơdrong tơblah ling lang gah Yang Bơhngol ‘Lơ̆ng hăm sĕch akar?
- Lu kon ‘Bok Kei-Dei kăl kơ yak năm kiơ̆ Yang Bơhngol ‘Lơ̆ng lăm tơdrong ‘lơ̆ng tơpăt păng ‘mêm mơnat thoi yơ?
- Lu bơ̆n đei arih thoi yơ hăm tơdrong yak năm kiơ̆ Yang Bơhngol ‘Lơ̆ng?
Yak kiơ̆ Yang Bơhngol ‘Lơ̆ng noh jơ̆ arih kiơ̆ thoi Yang Bơhngol ‘Lơ̆ng đei chông anhăk. Sơ̆p hla bơar Nơ̆r ‘Bok Kei-Dei noh jơ̆ đơ̆ng Yang Bơhngol ‘Lơ̆ng tơgŭm kon bơngai đei chih (II Timôthê 3:16), tơdrong âu trŏ kơ bơ̆n lui ngeh lăm tơdrong hŏk pơhrăm păng pơm kiơ̆. Yang Bơhngol ‘Lơ̆ng tơ’bôh ăn kơ bơ̆n gah Kră Yang Yêsu wă kơ lu bơ̆n sơng iŏk Sư pơm ‘Bok Dŏng Pơklaih păng arih kiơ̆ thoi kơmĭl Sư.
Lăm trong Nơ̆r ‘Bok Kei-Dei âu, ‘Bok Pôl đei roi pơdah ling lang lăm tơdrong tơblah gah sĕch akar hăm Yang Bơhngol ‘Lơ̆ng. “sĕch akar” wă khan tơdrong bơngai so lăm bơ̆n (Galati 5:19-21), tơdrong so âu mă ba ăn kơ bơ̆n hiong răm lăm tơdrong lôch. Tơplơ̆, Yang Bơhngol ‘Lơ̆ng dui ba bơ̆n lăm tơdrong ‘mêm, tơdrong tơpăt sĭt păng tơdrong ‘mêm mơnat. Kơplah bơ̆n yak kiơ̆ Yang Bơhngol ‘Lơ̆ng, Sư gô tơgŭm bơ̆n đei jơ-hngơ̆m pran wă kơ bơ̆n kĕ jei đơ̆ng dôm tơdrong wă pơm ăn kơ bơ̆n ưh kơ pơm hơtŏ, blĕk klai, pơm tơklah păng pơm ăn kơ jơ-hngơ̆m đei tơdrong jĭ rơ-ka kơ bơngai nai.
Lu kon Kră Yang kăl kơ yak kiơ̆ Yang Bơhngol ‘Lơ̆ng lăm tơdrong ‘lơ̆ng tơpăt hăm tơdrong ‘mêm mơnat. Tơdrong ‘mêm păng tơdrong ‘lơ̆ng tơpăt tơdrong mă gĭt dêh âu lơ wơ̆t đei ưh kơ wă yak kiơ̆ lăm teh đak âu, mă lei tơdrong âu ưh kơ gơh tơklah đơ̆ng dêh char ‘Bok Kei-Dei ôh. Yang Bơhngol ‘Lơ̆ng tơgŭm ‘bar tơdrong âu yak năm hơdai mă ưh kơ đei tơdrong kiơ gơh tơklah. Sư ăn kơ bơ̆n đei jơhngơ̆m pran wă kơ bơ̆n đei jơhngơ̆m ‘mêm kư̆m dai bơwei lăm dôm tơdrong ‘lơ̆ng. Tơdrong dui ba đơ̆ng Yang Bơhngol ‘Lơ̆ng ưh kơ sĭ kơ rok kiơ̆ khôi juăt nhen thoi kơmăi hăm tơdrong hli krê, mă lei tơdrong chu yom lĕch đơ̆ng jơhngơ̆m mă đei tơplih bơih. ‘Bok Pôl đei pơma bơngai bu đei Sư dui ba lei bơngai noh “ưh kơ oei hơla khôi juăt”, Sư đei pơma lu bơngai mă kon ‘Bok Kei-Dei kăl kơ arih hloh kơ Khôi Juăt gah ‘nguaih mă lei kăl kơ a-rih tơ’bôh kơ tơdrong ‘lơ̆ng ‘Bok Kei-Dei đơ̆ng Yang Bơhngol ‘Lơ̆ng tơgŭm lăm lu kon pơlei pơla Sư.
Kơplah đei tơdrong ơh blĕk, tơdrong ưh kơ tơ proh lăm tŏ ăi, Yang Bơhngol ‘Lơ̆ng krao wơ̆n bơ̆n athei gô ‘mơ̆i, krao khan păng đei tơdrong tơl tơwih hăm tơdrong gơh hơgei ‘nĕ kơ hăt kơ tơl kư̆ kă. Yang Bơhngol ‘Lơ̆ng pơtrŭt bơ̆n jang pơm hăm jơhngơ̆m ‘mêm mă khan bơ̆n dơ̆ng gah tơdrong trŏ mă khan tơdrong ‘noh kăl kơ đei chu hŭt kơdih bơ̆n. Tơdrong tơpăt sĭt đei pơm tơ’bôh hăm tơdrong mơsêh pran đơ̆ng Yang Bơhngol ‘Lơ̆ng ling lang kơ ba ăn tơdrong tơpăt, ‘lơ̆ng rơgoh mălei đei tơdrong ‘mêm, pơ̆n nuih mălei minh jơhngơ̆m. Chăl arih đei Yang Bơhngol ‘Lơ̆ng chông anhăk đei tơ’bôh tơpă plei Yang Bơhngol ‘Lơ̆ng: ‘Mêm mơnat, hơđơ̆ng, kĕ chơ̆n, lăp ai…kơplah chu yom Yang Bơhngol ‘Lơ̆ng, chăl arih bơ̆n gô tơ’bôh đei plei Yang Bơhngol ‘Lơ̆ng lăm tơdrong ‘mêm, tơdrong tơpăt păng tơdrong ‘lơ̆ng đơ̆ng Kră Yang ‘Bok Kei-Dei kơplah lăm teh đak oei kăl kơ tơdrong âu tơpăt. Apinh đĭ đăng bơ̆n rim năr yak năm kiơ̆ thoi Yang Bơhngol ‘Lơ̆ng wă kơ Sư oei hơdai păng chông anhăk, bơtho, ăn jơ-hngơ̆m pran păng tơplih lu bơ̆n rim năr wă kơ bơ̆n rim năr rai nhen thoi Sư hloh dơ̆ng.
Ơ Kră Yang, apinh ăn kơ inh đei tơdrong gơh hơgei păng đei jơ-hngơ̆m pran wă kơ kĕ jei đơ̆ng tơdrong ‘maih wă gah sĕch akar, na arih kiơ̆ thoi kơmĭl Kră Yang Yêsu, yak kiơ̆ Yang Bơhngol ‘Lơ̆ng lăm tơdrong tơpăt hăm tơdrong ‘mêm, wă ư-ang kơ anăn Kră Yang. Yua anăn Kră Yang Yêsu Krist. Amen
Lu bơ̆n hăm oei yak kiơ̆ Yang Bơhngol ‘Lơ̆ng lăm tơdrong ‘mêm hăm tơdrong tơpăt ưh?
Đŏk Sơ̆p Hla Bơar nơ̆r ‘Bok Kei-Dei lăm pêng sơnăm: Jôna 1-2
Kênh Youtube BHKTHN:
