Klei Aê Diê Blŭ: Y‑Đaniel 6:1-9
Êlan kliăng: “Ƀiădah brei diih lŏ wĭt lač hŏng klei êdu leh anăn hŏng klei mpŭ. Brei diih djă pioh ai tiê kpă jăk, čiăng kơ tơdah arăng dlao wač kơ diih, phung mčeh kơ klei diih dôk dơ̆ng ƀơ̆ng huă jăk hlăm Krist srăng mâo klei hêñ.” (I Y‑Pêtrôs 3:16).
Klei êmuh ksiêm mĭn: Ya klei mtrŭt phung khua prŏng leh anăn phung khua krĭng duah klei čiăng bi mdlưh knuih Y‑Đaniel? Ya mta klei diñu duah ƀuh leh anăn amâo ƀuh ôh hlăm Y‑Đaniel? Tơdah hdră mnêč anei amâo jing, ya klei diñu ngă? Hruê anei, arăng mưč mač kơ phung đăo kyua ya mta klei? Si phung riêng gah yap kơ drei jing?
Hŏng akŏ phŭn “Aê Diê kiă kriê”, 6 kdrêč tal êlâo hdruôm hră Y‑Đaniel klah čŭn dŭm klei truh prŏng bi djŏ tuôm hŏng pă čô phung mnă Yuđa hlăm bruă sang mtao Ƀaƀilôn leh anăn Mêdơ – Persơ mbĭt hŏng hdră êlan Aê Diê đru diñu hlăm jih klei truh kơ diñu tuôm. Tơdah klei lông dlăng ti kdrêč 3 hriê mơ̆ng mtao leh anăn kñăm kơ tlâo čô mah jiăng Y‑Đaniel, snăn klei lông dlăng tal anei lĕ hriê mơ̆ng phung khua prŏng leh anăn kñăm knŏng hjăn kơ Y‑Đaniel đuč. Ya klei soh Y‑Đaniel ngă? Ya ngă ñu jing hĕ anôk kñăm kơ arăng bi êmut msĕ snăn? Kyuadah ñu mâo “klei mngăt myang hĭn” leh anăn “amâo ƀuh klei wê hlăm ñu ôh, kyuadah ñu jing sĭt suôr.” (êlan 3-4). Hlăm êlan 4b mblang snei: “diñu amâo dưi mâo klei kčŭt amâodah ƀuh klei wê hlăm ñu ôh, kyuadah ñu jing sĭt suôr”. Diñu keh nač kyuadah mtao mĭn čiăng bi mđĭ ñu brei kiă kriê jih ƀuôn ala mtao leh anăn kyua klei ñu dôk dơ̆ng ƀơ̆ng huă kpă jăk leh anăn ênuah ênô.
Jing klei amâo tuôm ƀuh êdi djŏ mơ̆? Ƀiădah lĕ anăn yơh jing phŭn knhal sĭt kơ klei diñu mkra mnêč čiăng ngă jhat kơ Y‑Đaniel. Tơdah duah klei čiăng kčŭt kơ Y‑Đaniel, tơl diñu pô lač klă mơh duah amâo mâo ƀuh sa klei soh klei wê hlăm ñu ôh (êlan 4-5). Knhal tuč, diñu knŏng dưi ngă jhat kơ Y‑Đaniel hŏng klei ksŭng ngă kơ klei ñu đăo kơ Yêhôwa Aê Diê ñu. Anei jing sa klei amâo mtăp mđơr ôh, jing klei bi mklăk hŏng klei bhiăn ƀiădah jing klei amâo hin ƀuh ôh. Khua prŏng Y‑Pilat, pô phat kđi bi mdjiê Khua Yang Yêsu lu blư̆ hưn klă: “Kâo amâo ƀuh klei soh ôh hlăm êkei anei.” (Y‑Luk 23:4; Y‑Yôhan 18:38). Leh anăn anei ăt jing klei phung đăo srăng tuôm mơh, kyuanăn êdei anăn khua ƀĭng kna Y‑Pêtrôs mtă kơ phung đăo dôk hdĭp bru bra ti krah phung amâo mâo đăo snei, “ƀiădah brei diih lŏ wĭt lač hŏng klei êdu leh anăn hŏng klei mpŭ. Brei diih djă pioh ai tiê kpă jăk, čiăng kơ tơdah arăng dlao wač kơ diih, phung mčeh kơ klei diih dôk dơ̆ng ƀơ̆ng huă jăk hlăm Krist srăng mâo klei hêñ. Kyuadah tơdah Aê Diê čiăng, jing jăk hĭn tŭ klei knap mñai kyua klei ngă jăk hŏng kyua klei ngă jhat.” (I Y‑Pêtrôs 3:16-17).
Si phung riêng gah, mah jiăng leh anăn phung dôk mă bruă mbĭt yap kơ drei? Tĭng kơ klei dưi ngă, năng ai drei amâo mâo thâo knhâo msĕ si Y‑Đaniel ôh, ƀiădah brei drei mâo klei kriăng, ktưn hĭn, ngă hŏng jih ai tiê leh anăn ngă jăk hĭn hlăm hnơ̆ng dưi msĕ si rup bi hmô leh mơ̆ng Y‑Đaniel. Tĭng kơ knuih hdĭp, brei amâo mâo anôk dưi ƀuah ôh. Hŏng jih ai tiê hdĭp djŏ tui si Klei Aê Diê Blŭ mtô, Khua Yang srăng đru drei nanao.
Si ngă drei tuôm hŏng klei dleh dlan, knap mñai leh anăn klei arăng mưč kyua klei ngă jăk amâodah klei ngă jhat?
Wah lač: Ơ Khua Yang, akâo Ih đru kâo hdĭp kpă jăk ti anăp phung amâo mâo đăo leh anăn gĭr tŭ klei dleh knap, klei mưč mač kyua klei ngă jăk, msĕ si Khua Yang Yêsu bi hmô leh kơ kâo.
Dlăng Klei Aê Diê Blŭ hlăm tlâo thŭn: Y‑Nêhêmi 1:1-2:10
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
