Daniyees 6:1-9

Nqe cim: 

“Nej yuav tsum muaj lub siab mos siab muag teb lawv. Yog nej muaj lub siab zoo li ntawd lawm, thaum cov neeg uas thuam nej pom tej haujlwm zoo uas nej cov ntseeg ua, lawv yuav txajmuag rau tej lus uas lawv hais” (I Petus 3:16).

Lus nug rau sawvdaws xav: 

• Tim dab tsi cov nomtswv txo Daniyees tus kheej? 
• Tej nomtswv nrhiav tau thiab nrhiav tsis tau dabtsi ntawm Daniyees? 
• Thaum tej nom tswv ua tsis tiav li tau npaj tseg, lawv ua licas? 
• Nimno cov ntseeg pheej raug txob thuam vim yam dabtsi? 
• Cov neeg nyob puag ncig ntaus nqi licas rau peb tus kheej? 

Ib tsoom cov mloog txhua tus,

Lub npe hais txog “Vajtswv tswj kav”, nyob hauv rau tshooj xub thawj ntawm phau ntawv Daniyees hais sau zog txog tej xwmtxheej tseemceeb ntsig txog plaub pab neeg Yudas raug ntes coj mus ua cev qhev rau cov nomtswv Npanpiloos thiab Medias Pawxias kav, ntawd kuj hais txog qhov uas tus Tswv pab cawm thaum Nws haiv neeg raug teebmeem. Hauv tshooj 3 hais txog vajntxwv sim Daniyees peb tug phoojywg siab, ces zaum no kev sim siab ntawm cov nomtswv rau Daniyees tus kheej. Puas yog Daniyees tau ua dabtsi yuam kev? Vim licas nws raug lawv ntxub zoo li ntawd? Vim yog nws “ua haujlwm zoo tshaj”, yog “ib tug neeg uas muab siab rau ua haujlwm thiab nws tsis ua tej uas txhaum kevcai thiab tej uas tsis ncaj hlo li” (nqe 3-4). Phau Vajluskub txhais xyoo 2004 (HMOWSV) sau nqe 4b hais tias: “vim nws pheej ua ncaj, mas nrhiav tsis tau ib qho uas nws ua yuam kev lossis ib qho txhaum kiag li”. Lawv khib vim vajntxwv yuav tsa Daniyees ua tus saib thoob plaws lub tebchaws Npanpiloos thiab vim nws lub neej ua ncaj ncees thiab ua zoo. 

Yog ib qhov uas xav tsis thoob puas yog? Tseeb tiag qhov ntawd yog lub vimchiv uas lawv npaj siab phem ua lim hiam rau Daniyees. Thaum lawv nrhiav tej uas Daniyees ua yuam kev kom nws, lawv sib tham hais tias peb yeej yuav nrhiav tsis tau ib yam dabtsi los kom Daniyees ntag (nqe 4-5). Thaum kawg, lawv tsuas nrhiav tau lus kom qhov uas nws coj nws tus Tswv txoj Kevcai nkaus xwb. Qhov no yog kev ua tsis ncaj, ua tsis raws cai tiamsis ho yog tej yam uas pheej tshwm muaj dhau los. Philaj tus uas ua tswvxeev, nws txiav txim kom luag muab Tswv Yexus coj mus tua, nws hais tias: “Kuv tsis pom tus txivneej no muaj ib qhov txhaum li” (Lukas 23:4; Yauhas 18:38). Thiab tej no kuj yog tej uas cov ntseeg Yexus raug, vim li ntawd Timthawj Petus thiaj ntuas cov ntseeg uas khiav mus nyob rau txhua qhov chaw yuav tsum “muaj lub siab mos siab muag teb lawv. Yog nej muaj lub siab zoo li ntawd lawm, thaum cov neeg uas thuam nej pom tej haujlwm zoo uas nej cov ntseeg ua, lawv yuav txajmuag rau tej lus uas lawv hais. Vim yog nej ua zoo, es nej thiaj rau kev tsimtxom, qhov ntawd haum Vajtswv siab dua qhov uas nej ua phem es nej raug kev tsimtxom” (I-Petus 3:16-17). 

Tej neeg txheebze, tej phoojywg ntaus nqi rau peb tus kheej zoo licas? Hais txog peevxwm, tej zaum peb ua tsis zoo npaum li Daniyees, tiamsis peb yuav tsum nquag xyaum Daniyees tus qauv ua zoo, pheej ua zoo zuj zus, ua zoo tas siab thiab ua zoo raws li peb lub peevxwm ua tau. Hais txog kev ua zoo, peb yuav tsum tsis txhob muaj ib qho thuam tau. Rau siab ntso ua raws li tus Tswv Txojlus qhia, Nws yuav pab peb. 

Thov Vajtswv,

Tus Tswv, thov Koj pab kom nyuam yaus ua neeg ncaj ncees, ua zoo tabmeeg cov tsis ntseeg thiab txaus siab hlo tiv kev txomnyem, kev txob thuam vim yog ua qhov zoo, ib yam li Tswv Yexus tus qauv ua zoo. Amees. 

Ib tsoom cov mloog uas hmov thiab tshua,

Peb ntsib kev tsimtxom, nyuaj siab thiab raug thuam vim ua yam zoo lossis ua yam phem?

Nyeem Vajluskub hauv peb lub xyoo: Nehemis 1:1-2:10

Phab Xa Suab Lus nrog rau Phab Cob Qhia Tus Ntseeg koom tes txhim muaj.

Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com

Tshooj Youtube BHKTHN: https://www.youtube.com/c/bhkthn