I Samuel 1:3-18
“Hana jơhngơ̆m sư rŭng-răng ưh kơsŭk sư krao apinh Kră Yang sư nhơ̆m sơ’ngon dêh.”
(I Samuel 1:10)
Nơ̆r jet tơchĕng pơwao:
– Yă Hana đei pơm kiơ ‘bơ̆t kơplah ơh sơ’ngon tơdrong sư hơwŏng?
– Sư krao khan apinh Kră Yang tơdrong kiơ păng krao khan hăm jơhngơ̆m đon thoi yơ?
– Lu bơ̆n juăt kơ krao khan hăm Kră Yang hăm đon tơchĕng păng jơhngơ̆m bơ̆n liơ?
Yă Hana sư akăn tơm ‘bok Elkan, minh ‘nu lăm adrĕch Lêwi. Sư ưh kơ đei kon, lăm noh akăn kơnhŏng đei kon lơ. Mă khan klo sư ‘mêm kơ sư hloh ră, mălei lăm rim sơnăm, kơplah kiơ̆ klo sư năm tơ hnam akŭm tơ Silô wă pơyơ̆r tơmam soi, yă Hana ling lang ơh sơ’ngon păng ling lang đei pơma tơblĕk yua kơ ưh kơ jah đei kon. Sư đei ưh kơ hiôk lăm jơhngơ̆m ưh kơ đei băt, sư năm hăm Kră Yang, đei pơtrŭt lăm jơhngơ̆m sư, kư̆m nhơ̆m ơh lĕch đak măt. Sư đĭ jơhngơ̆m krao apinh Kră Yang nger lăng tơdrong ơh sơ’ngon sư, ăn kơ sư đei kon drŏnglo păng sư pơkăm gô pơyơ̆r kon drŏnglo noh ăn kơ Kră Yang đĭ chăl arih sư.
Sơ̆p Hla bơar ‘Bok Kei-Dei roi tơbăt sư krao khan lăm jơhngơ̆m ưh kơ re tơ’nguaih krao khan đĭ jơhngơ̆m yua ơh sơ’ngon. ‘Nâu jơ̆ nơ̆r krao khan tơpă đơ̆ng lăm jơhngơ̆m ơh sơ’ngon tơpă. Yă Hana tơpă tơ’bưh hăm Kră Yang, đĭ jơhngơ̆m bơhngol lăng tơ Kră Yang, păng ưh kơ hue huo lăng tơ bơngai jum dăr, kư̆m ưh kơ kăl kơ băt kơ bơngai jum dăr tơchĕng kơ sư. Yua kơ thoi noh, Hêli ‘bok khan lê̆ adrol ngeh kơ sư et sik suai na pơma mơmơnh. Kơplah kơtơ̆ng yă Hana tơblang. Hêli ‘bok khan lê̆ adrol khan: “Năm mă ‘lơ̆ng bĕ, krao khan kơ Kră Yang ‘Bok Kei-Dei Isơrael ăn kơ ih tơdrong mă ih krao apinh Sư!” yă Hana sơng iŏk nơ̆r sơkat pŭn hiôk đơ̆ng ‘bok khan lê̆ adrol păng brŏk tơ hnam huay pă ơh sơ’ngon bơih.
Mă khan gleh sơ’ngon, ưh kơ hiôk yua kơ tơdrong gleh anat. Tơplơ̆ dơ̆ng, sư chă ‘bôh tơdrong hơmĕng lăm ‘Bok Kei-Dei kơplah sư đei krao khan. Sư lui kơ Kră Yang bơih Tơ’ngla pơjing plĕnh teh, gơh pơm tôm tơdrong pah to kơ tơdrong juăt dan lê̆ kơ pal plĕnh tơ teh đak păng ăn kơ sư gơh jing pơm mĕ lăm năr Kră Yang ăn. Yua kơ thoi noh, sư adrin đĭ jơhngơ̆m truh mah đak măt ro. Phŏ kơplah hơyơ bơ̆n tơ’bưh hăm Kră Yang đĭ jơhngơ̆m na đei lĕch đak măt pơma dơnuh hăm Kră Yang. Yă Hana tơpă ‘mêm kơ Kră Yang, lui gơnang, păng oei jê̆ tơtil Kră Yang wă kơ gơh roi tơ’bôh dôm tơdrong chhur nuih ơh sơ’ngon lăm jơhngơ̆m ăn kơ Kră Yang. Hloh kơ noh dơ̆ng, sư pơkăm pơkă hăm Kră Yang tơdrong kiơ đơ̆ng Sư ăn, yă Hana gô pơyơ̆r dơ̆ng ăn kơ Kră Yang. ‘Nâu bơih ‘bai pơhrăm iŏk kơ bơ̆n kơmĭl ‘lơ̆ng hơiă lăm tơdrong krao khan. Ưh kơ sĭ sư krao khan kơ tơdrong kăl yua kơdih kâu, mă tơpă sư lĕch đak măt păng tơdrong tơ’bưh rai kơjăp hloh hăm Kră Yang. Sư adrin đĭ jơhngơ̆m lĕch đak măt ơh sơ’ngon ‘bơ̆t anăp Kră Yang păng wă tơpă pơkă pơkăm pơdrâu ăn dơ̆ng tơmam mă gĭt dêh kơ Kră Yang. Sư lĕch đak măt krao khan Kră Yang tơl nơ̆r sư krao khan!
Ơ Kră Yang, bơnê kơ Ih ăn kơ inh đei gơh tơ’bưh hăm Ih thoi kon pơma dơnuh hăm ‘Bă. Apinh Ih tơgŭm inh rai tơ jê̆ hloh tơdrong tơ’bưh hăm Ih. Păng apinh Ih tơgŭm inh năm ‘bơ̆t anăp Ih hăm jơhngơ̆m ơh sơ’ngon, lĕch đak măt mă tơpă đơ̆ng tơdrong ơh sơ’ngon hlơp lăm jơhngơ̆m na roi tơ’bôh kơ Ih. Yua anăn Kră Yang Yêsu Krist, Amen!
Lu bơ̆n đei năm ‘bơ̆t anăp Kră Yang păng đak măt lĕch ro krao apinh Kră Yang lăm kơplah ayơ?
Đŏk Sơ̆p hla bơar ‘Bok Kei-Dei lăm pêng sơnăm: Luka 2
Kênh Youtube BHKTHN:
