I Samuel 1:1-10
“Hana jơhngơ̆m sư rŭng-răng ưh kơsŭk sư krao apinh Kră Yang sư nhơ̆m sơ’ngon dêh.” (I Samuel 1:10)
Nơ̆r jet tơchĕng pơwao:
– Yă Hana đei tơ’bơ̆p hăm tơdrong hơyơ?
– Sư rơih iŏk tơdrong hơyơ wă tơblah hăm tơdrong pơma kơnê̆, pơklai sư?
– Trong gơlong yă Hana đei ‘măn ăn kơ lu bơ̆n ‘bai pơhrăm hơyơ gah tơdrong krao khan đei ơh sơ’ngon?
Yă Hana jơ̆ minh ‘nu lăm ‘bar ‘nu akăn ‘bok Elkana, sư đei đon lui kơjăp lăm Kră Yang ‘Bok Kei-Dei lăm tơdrong chông anhăk hnam dơnŏ tơnăp tơdrong akŭm kơkuh păng pơyơ̆r. Yă Hana đei tơ’bơ̆p hăm tơdrong anat mă ưh kơ gơh klĕch hlôi, weh wer, ‘noh jơ̆ hơwŏng hơwŏ, păng ‘bôh nhen dêh noh lĕch đơ̆ng sư, yua kơ yă Pênina đei kon (trong 2). ‘Nâu jơ̆ minh tơdrong anat kăl tih yua kơ tơdrong lăm kon pơlei ưh kơ pŭn hiôk kiơ̆ kơ lăm lu bơngai Isơrael, pơm kơ lu bơngai hơwŏng kơdơ̆ mơlâu. Hloh kơ noh dơ̆ng, yă Pênina pơthim ăn tơdrong sơ’ngon, pơklai yă Hana, kơplah sư pơma pơjăm. Tơdrong juăt lăm tơdrong arih chăl ei sơ̆, ‘bok Elkana gơh pơma hil kơ yă Hana, mă loi sư kư̆m gơh achăng lê̆ yă Hana, mălei ‘bok Elkana rơih iŏk tơdrong mơnat, hlôh ăn gah tơdrong sơ’ngon, chrih nuih yă Hana đei tơ’bơ̆p păng adrin hŭt lê̆.
Yă Hana mơ̆n ơh sơ’ngon na “nhơ̆m păng ơ̆t kơ sŏng sa” (trong 7). ‘Nâu jơ̆ mơn ‘blut lăm jơhngơ̆m wă kơ đei tơdrong mơnat, mălei tơdrong mơn pơtrŭt ưh kơ trŏ. Mă mônh, yă Hana ơh sơ’ngon yua tơchĕng dêh gah tơdrong anat noh, mălei hiơt lê̆ tơdrong pŭn hiôk mă sư đei, kơplah noh klo sư băt hli yom kơ Kră Yang păng ‘mêm mơnat kơ sư. Mă ‘bar, yă Hana ưh kơ băt tơdrong Kră Yang wă lăp đon tơ lăm chăl arih sư, ‘bar wơ̆t lăm trong 5 păng 6 pơma gah hơwŏng hơwŏ noh tơ lăm tơpang ti Kră Yang mă pơgơ̆r tôm tơdrong păng Sư hơmet lê̆ tơdrong mă ‘lơ̆ng hloh ăn kơ yă Hana păng sư hai. Mă pêng, yă Hana pơm ưh kơ trŏ, hơpoh ‘bơm tơ lăm hnam dơnŏ, mă hơđăl hloh noh ba ăn ơh sơ’ngon kơ klo sư mă ‘mêm kơeng kơ sư (trong 8). Tơdah lu bơ̆n mơn đei tơdrong ưh kơ hiôk ưh kơ gan ‘lơ̆ng pơgơ̆r bơ̆n đunh dêh lei athei tơ oei na chih jô̆ dôm yơ tơdrong pŭn hiôk mă Kră Yang ăn kơ bơ̆n păng athei pơyơ̆r nơ̆r bơnê kơ Kră Yang.
Kư̆m lei lăi tơdrong hơwŏng mălei phara ‘biơ̆ kơ yă Hana, yă Rachel, chă tơdrong pơma pơjah hăm yă Lêa, păng sư khan: “Jei inh bơih!” (Blŭng a 30:1-8). Mă khan lei ră, yă Rachel ưh kơ keh jing kơplah yak năm rok trong ưh kơ trŏ. Thoi yă Sara, jơ̆ yă klo sư, păng tơdrong ơh sơ’ngon sư, yă Hana đei pơm trŏ ăn kơ lu bơ̆n pơhrăm iŏk. Sơnăm păng nhơ̆m ‘bơ̆t anăp Kră Yang ‘Bok Kei-Dei ‘noh tơplih kơ blĕk ơh hăm sư dah yă Pênina (trong 10). Yă Hana rơih tơdrong tơblah hăm bơngai pơma kơnê̆, pơklai sư, hăm tơdrong yua phao kơtuang krao khan, noh tơplih kơ yua nơ̆r pơma rơ̆n re hil mĭl bơngai mă sư ơh noh.
Ơ Kră Yang, inh bơnê kơ Ih, yua kơ mă đơ̆ng tơdrong đei truh hơyơ, mă khan jĭ jăn pơmat dang yơ hĭ, Ih ling lang oei ‘bơ̆t cheng inh, mơ̆ng nơ̆r inh, păng hlôh băt đĭ lăm jơhngơ̆m inh, apinh Ih tơgŭm inh năm ‘bơ̆t anăp Ih păng krao khan, tơplih kơ tơdrong pơma, hil plơ̆ kư̆ kă kơ bơngai nai. Yua anăn Yêsu Krist, Amen!
Lu bơ̆n ngăl rơih iŏk tơdrong hơyơ kơplah tơ’bơ̆p hăm lu bơngai yua iŏk năr đei anat tih mă lu bơ̆n đei wă kơ bơ̆n tơblah hloi?
Đŏk Sơ̆p Hla bơar ‘Bok Kei-Dei lăm pêng sơnăm: Luka 1
Kênh Youtube BHKTHN:
