Klei Aê Diê Blŭ: Hêbrơ 11:8-12
Êlan kliăng: “Kyuadah ñu čang guôn kơ ƀuôn mâo atur kjăp, Aê Diê jing Pô čih rup leh anăn mdơ̆ng ƀuôn anăn” (Hêbrơ 11:10)
Klei êmuh ksiêm mĭn: Si ngă Y-Abraham bi êdah klei đăo ñu? Ya ngă ñu dưi gĭr čang guôn Aê Diê? Hŏng ya êlan ih bi êdah klei đăo čang guôn?
Khua Yang lač kơ Y-Abraham, “Kbiă mơ̆ng čar ih, lui găp djuê ih leh anăn sang ama ih, nao kơ čar Kâo srăng ktrâo brei kơ ih” (Klei Mphŭn Dơ̆ng 12:1). Hŏng klei đăo, ñu đuĕ nao, wăt tơdah ñu amâo thâo ôh ti anôk ñu nao, ñu đăo kơ klei Khua Yang ƀuăn leh Khua Yang srăng mjing ñu jing sa găp djuê prŏng, čiăng lač mâo anak čô lar êngŭm, lăn prŏng, leh anăn jing akŏ klei jăk jĭn kơ lu găp djuê mkăn (Klei Mphŭn Dơ̆ng 12:2-3). Ƀiădah, wăt tơdah ñu hriê mơ̆ng kbưi truh ti čar Kanaan, Klei Aê Diê Blŭ brei thâo “hlăk anăn phung Kanaan dôk hlăm čar anăn” (Klei Mphŭn Dơ̆ng 12:6b). Čar Aê Diê ƀuăn ênuk anăn jing dŏ găp djuê mkăn, amâo djŏ dŏ Y-Abraham ôh, ƀiădah ñu ăt gĭr čang guôn, jhŏng hdĭp hlăm sang čhiăm leh anăn čang guôn (êlan 9-10). Hlăk kbiă mơ̆ng ƀuôn Čaran, Y-Abraham mâo 75 thŭn leh, mô̆ ñu 65 thŭn. Tơl 25 thŭn êdei, mô̆ ñu mrâo kkiêng kơ Y-Isăk, jing anak tui si klei Aê Diê ƀuăn (Klei Mphŭn Dơ̆ng 21:5). Dua ung mô̆ ñu dôk čang guôn sui snăk, mâo blư̆ diñu ăt êdu ai, mâo blư̆ ngă tui si klei diñu pô mĭn, ƀiădah truh ti knhal tuč diñu ăt đăo kơ hdră Aê Diê.
Mnêč hgăm đru Y-Abraham leh anăn H’Sara dưi dôk gĭr čang guôn jing kyuadah diñu đăo kjăp kơ Aê Diê jing Pô Sĭt Suôr. Ya klei Aê Diê ƀuăn leh, Aê Diê srăng bi sĭt leh anăn Ñu mâo klei myang dưi ngă klei anăn. Amâo mâo sa mta bruă dleh đei kơ Aê Diê ôh. Đăo kơ klei sĭt suôr Aê Diê ăt čiăng lač kơ klei đăo hĕ kơ Aê Diê srăng bi sĭt klei ƀuăn djŏ tui si mông Ñu bi kčah leh. Anak mnuih drei khăng čiăng Aê Diê wĭt lač djăl kơ klei drei akâo, ƀiădah êlan Aê Diê ngă khăng mdê hŏng klei drei mĭn, leh anăn mông Aê Diê ăt msĕ snăn mơh. Mông Aê Diê bi kčah kơ grăp čô mnuih mdê mdê amâo mâo msĕ ôh, ƀiădah sĭt nik jing mmông jăk hĭn.
Mâo phung hiu hưn Klei Mrâo Mrang Jăk yua jih ênuk hlăk ai digơ̆ nao hưn klei đăo, boh tŭ jing mâo knŏng ƀiă mnuih dôk hmư̆ leh anăn ƀiă snăk mnuih đăo kơ Khua Yang, ƀiădah digơ̆ ăt dôk čang guôn čiăng ƀuh Klei Mrâo Mrang Jăk dưi bi lar tar ƀar anôk. Mâo phung amĭ ama wah lač sui thŭn kơ “anak diñu klah đuĕ” leh anăn dôk guôn digơ̆ lŏ wĭt. Mâo đa đa phung anak leh bi tuôm hŏng Khua Yang, digơ̆ hur har wah lač kơ amĭ ama digơ̆, čang guôn hruê srăng ƀuh jih gŏ sang digơ̆ kluôm ênŭm hlăm klei đăo, lu klei mkăn đa đa…Wăt tơdah klei truh kơ drei ară anei hin msĕ si bŏ hŏng klei dleh dlan, tăp năng amâo thâo bĭt mjing ôh, ƀiădah akâo Khua Yang đru drei mâo klei đăo čang guôn čiăng kơ drei knang nanao kơ Khua Yang, đăo kơ Ñu dưi ngă jih jang klei, đăo kơ Ñu djă pioh klei ƀuăn leh anăn đăo kơ Ñu srăng bi sĭt klei ƀuăn anăn djŏ tui si mmông Ñu bi kčah leh.
Drei gĭr dôk čang guôn kơ Khua Yang hĕ amâodah drei ruăt ngă tui si klei drei pô čiăng?
Wah lač: Ơ Khua Yang, đru kâo mâo djăp klei đăo gĭr čang guôn Ih bi sĭt klei Ih ƀuăn leh kơ kâo wăt tơdah ti anăp jih jang mnơ̆ng anăn dôk kbưi snăk hŏng kâo. Đru kâo amâo êdu ai, amâo ruăt ngă tui si klei mĭn kâo pô ôh ƀiădah đăo kơ Ih kluôm dhuôm. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Klei Mphŭn Dơ̆ng 16
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
