Henplais 11:8-12
Nqe cim:
“Anplahas nyob li ntawd, rau qhov nws tabtom tos hnub uas Vajtswv coj nws mus hauv lub nroog uas nyob mus ibtxhis, lub nroog ntawd Vajtswv yog tus uas muab qauv thiab ua lub nroog ntawd” (Henplais 11:10
Lus nug rau sawvdaws xav:
– Anplahas qhia txog nws kev ntseeg li cas?
– Vim li cas nws ua taus siab ntev tos tus Tswv tej lus teb?
– Koj tabtom qhia tshwm kev ntseeg los ntawm yam dab tsi?
Tus Tswv hu Anplahas hais tias: “Koj cia li tso koj lub tebchaws, koj cov kwvtij neejtsa, thiab koj txiv lub tsev tseg, thiab sawv kev mus rau nram lub tebchaws uas kuv yuav qhia rau koj” (Chivkeeb 12:1). Los ntawm kev ntseeg, txawm tsis paub yuav mus rau tog twg, Anplahas yeej sawv kev mus, nws ntseeg tus Tswv tej lus uas hais tias, tus Tswv yuav pub kom nws ua tsheej ib haivneeg, muaj xeeb ntxwv coob, yuav muaj tebchaws thiab yuav ua koob hmoov rau txhua haiv neeg hauv lub ntiajteb (Chivkeeb 12:2,3). Txawm hais tias Anplahas yuav tsum mus ib ncua kev deb heev mam li txog lub tebchaws Kana-as, tiamsis Vajluskub qhia tias, “Thaum lub sijhawm ntawd cov neeg Kana-as tseem nyob hauv lub tebchaws ntawd” (Chivkeeb 12:6b). Lub tebchaws cog lus tseg ntawd tseem yog lwm haiv neeg tug tsis yog Anplahas tug, txawm li ntawd los nws ua siab ntev tos, nws txaus siab nyob hauv tej tsev ntaub tos kom muaj tiav li tej lus cog tseg (nqe 9,10). Thaum uas tsiv tawm hauv lub nroog Halas mus, Anplahas muaj 75 xyoos, nws tus pojniam 65 xyoos. Tau 25 lub xyoo tomqab mam yug Ixaj uas yog tus tub Vajtswv cog lus tseg (Chivkeeb 21:5). Anplahas thiab Xalas tos ntev loo mam tau li tus Tswv hais, qee zaug nkawd kuj tag kev cia siab thiab ua raws li lub siab xav, tiamsis txog thaum kawg nkawd yeej ntseeg khov kho rau tus Tswv txojkev npaj tseg.
Qhov uas ua rau Anplahas thiab Xalas muaj lub siab tawv tos kom tau raws li Vajtswv cog lus tseg yog nkawd ntseeg ruaj khov hais tias tus Tswv yuav tsis hloov Nws tej lus cog tseg ib zaug li. Yam uas tus Tswv tau hais lawd, Nws yeej yuav ua kom tiav thiab Nws muaj txaus hwjchim ua txhua yam tiav. Tsis muaj ib yam dabtsi uas Vajtswv yuav ua tsis tau li. Ntseeg hais tias tus Tswv tsis hloov, kuj yog ntseeg txog tus Tswv yuav ua li Nws hais tseg thaum txog Nws lub sijhawm. Peb tibneeg pheej xav kom tus Tswv teb peb tej lus thov tamsim ntawd, tiamsis qhov uas tus Tswv ua yeej tsis thooj li tej uas peb xav, thiab tus Tswv lub sijhawm kuj zoo ib yam ntawd. Txawm hais tias lub sijhawm uas Vajtswv teem rau peb zoo tsis sib thooj los ntseeg hais tias ua raws li Vajtswv pom zoo thiaj yog qhov uas zoo tshajplaws.
Muaj ntau tus Xihwb siv tagnrho lawv lub neej mus qhiaTxojmoo Zoo, thaum kawg tsuas muaj qeeleej mloog thiab los ntseeg Yexus xwb, txawm li ntawm los lawv yeej tos ntsoov kom Txojmoo Zoo nrov mus rau txhua qhov. Muaj ntau tus niam txiv lawv siv sijhawm ntau xyoo los thov Vajtswv pab rau lawv “tus menyuam uas tsis mloog lus” thiab lawv tos kom nws tig rov los. Muaj ntau tus menyuam thaum uas ntsib Tswv Yexus nws tau siv sijhawm thov Vajtswv pab rau nws niam nws txiv, nws tos ntsoov kom tau pom tsevneeg txojkev ntseeg loj hlob… Txawm hais tias, peb yuav ntsib kev txomnyem, ntsib kev tws, los thov Vajtswv pab kom peb muaj txaus kev ntseeg nyob tos, peb ntseeg hais tias, tus Tswv ua tau txhua yam, peb ntseeg hais tias tus Tswv yuav ua raws li Nws tej lus cog tseg thiab ntseeg hais tias tus Tswv yuav ua kom tiav thaum txog Nws lub sijhawm teem tseg lawm.
Thov Vajtswv
Tus Tswv, thov pab kom nyuam yaus muaj lub siab ntev nyob tos Koj tej lus cog tseg, txawm hais tias tamsim no txhua yam tsis tau li siab xav. Thov Pab kom nyuam yaus tsis txhob tas kev cia siab, kuj tsis ua li nyuam yaus txojkev xav tiamsis thov pab kom nyuam yaus ntseeg tus Tswv kom kawg siab kawg ntsws. Nyuamyaus tuav Tswv Yexus lub npe thov Amees.
Peb puas ua siab ntev tos Vajtswv lossis peb cia li ua li peb siab nyiam?
Nyeem Vajluskub hauv peb lub xyoos: Chivkeeb 16
Kênh Youtube BHKTHN:
