Tơdrong Pơđơ̆k 23:1-3
“Dah minh pah ti iĕm gah ‘ma pơm kơ iĕm yoch, chơ̆ng lê̆ minh pah ti iĕm noh, na oei pă minh pah ti, ‘noh ‘lơ̆ng hloh kơ iĕm oei tôm ‘bar pah ti mă-lei wă huŏng pơđĭ hăm akâu tơ lăm dơnâu ŭnh ‘Bok Kei-Dei phak.” (Mathiơ 5:30)
Nơ̆r jet tơchĕng pơwao:
– Yua kơ kiơ athei mă pơ’lơ̆ng mưh bơ̆n ngôi sŏng sa hơdai hăm lu bơngai pơgơ̆r?
– Lu tơmam sa ‘lơ̆ng lăm nơ̆r bơtho ‘nâu đei tơdrong gĭt yua jrŭ hlom kiơ?
– Bơ̆n kăl kơ đei jơhngơ̆m liơ ‘bơ̆t anăp lu hơđong tơdrong yoch?
Hăm lu bơngai pơgơ̆r, pơtao Sôlômôn bơtho kon athei tơchĕng mă hơlen pơnhen mă tơpă tơdrong lu sư pơm. Ih athei mă krăng, mă hơlen kơplah ih ngôi sŏng sa hơdai lu sư. Ih athei pơ’lơ̆ng krăng kơchăng ‘nĕ kơ hơwơ̆l ngeh sư wơ̆n bơ̆n sŏng sa hơdai hăm sư noh khan sư ‘mêm ‘maih pơm buăl hăm bơ̆n, kơchăng hŏ, yua kơ bơngai noh phŏ kơnh, sư wơ̆n ih sŏng sa ưh kơ pôm sŏng sa hmă đĕch ôh. Tơmam sa lu bơngai pơgơ̆r, juăt sư noh, sư ăn kơ ih sa khan yua kơ ih buăl juăt sư, ưh ôh. Tơmam sư noh nai kư̆m lei lăi, sư asong ih noh khan tơdra hiôk hơđơ̆ng, ‘lơ̆ng tơproh,ưh ôh. Tơmam sŏng sa đơ̆ng sư wơ̆n ưh kơ trŏ kơ tơdrong ‘mêm tơpă ôh, mă-lei phŏ sư kơnh sư pĕng klơ̆p đơ̆p hlơp lê̆ kap hơđong krĕnh dêh pơm kơ ih gô mơ̆ng kơ sư wă. Ih athei krăng mă dêh,khŏm băt hơđăl kơnăl mă tơpă sư wơ̆n ih sŏng sa noh wă pơm kiơ. Dah yua kơ ih ‘ngeng tơmam sa noh ‘lơ̆ng, lei ih ‘bônh kơ puh lŭ lui kơ nơ̆r sư pơhlŭ pơlung ih, ‘noh ih’leh kap sư bơih. Dah ih sa dư, ih athei khŏm gơ̆t ĕnh yua kơ tơdrong krê hơmơt kơ ih noh nhen thoi pla săng dan ‘bơ̆t dăng-hơlŏng ih.Mưh tơmam sa mơ̆t hlom lăm hơlŏng ih bơih,lei mă ih ‘brĕng ‘blŏk dơ̆ng ră, ih wă lă ưh kơ gơh dang lĕ kơđơ̆l găn, ih wă luăn kư̆m ưh kơ hlôi dang lĕ kơđơ̆l tang, đom hloi ‘bơ̆t dăng-hơlŏng, pơm kơ ih dui jơhngơ̆m hrăt hrot.
Dôm lu nơ̆r ‘Bok Kei-Dei bơtho tơ kơpal ‘nâu hei, ưh kơ pôm tơ’blŏk kơ ih athei krăng mă dêh kơplah ngôi sŏng sa hăm lu bơngai pơgơ̆r noh đĕch ôh,mă-lei wă pơma bơtho tơdrong jrŭ hlom hloh dơ̆ng ‘bơm kơ đon ‘lơ̆ng kơnê̆ kon bơngai bơ̆n.Mưh lu bơngai pơgơ̆r asong ih tơmam, ih athei tơchĕng hơlen ‘mơ̆i tơdrong lu sư asong noh lu sư kơnhăm wă pơm kiơ? Yua kơ mưh ih iŏk bơih tơmam lu sư,lei ih noh kơnh gô mơ̆ng kơ lu sư wă hloi bơih.Mă khan kơplah noh ih mơn‘bôh tơdrong noh yoch glăi bơih ră,mă-lei jơhngơ̆m ih anat kơ wă sơngah ‘bơ̆t anăp bơngai pơgơ̆r noh, kư̆m yua kơ dang đe chô̆ gơhret ih hăm tơmam mă ih iŏk đơ̆ng lu sư bơih noh. ‘Noh ih ‘leh bơih kap tơdrong yoch mă lu bơngai pơgơ̆r đăk ih noh. Pơtao Sôlômôn bơtho ‘nĕ kơ “’ngeng ”,’ngeng noh bơih tơdrong hưch ham kiơ̆ kơ sĕch akar kon bơngai bơ̆n ‘maih wă, lei na ih ‘bônh kơ pơ̆k huŏng lăm tơdrong yoch.
Kră Yang Yêsu hlôi bơtho athei bơ̆n pơma phơ̆t hăm tơdrong yoch,lê̆ pă pơm hloi bơih, Sư khan thoi âu: “Dah mĭnh pah ti iĕm gah ‘ma pơm kơ iĕm yoch, chơ̆ng lê̆ minh pah ti iĕm noh na oei pă minh pah ti, noh ‘lơ̆ng hloh kơ iĕm oei tôm ‘bar pah ti mă-lei wă huŏng pơđĭ hăm akâu tơ lăm dơnâu ŭnh ‘Bok Kei-Dei phak. (Mathiơ 5:30). Nơ̆r Kră Yang pơma rơđah hơđăl khan hiong minh pah ti đĕch huay ôh, hiong bơhngol noh răm tih. Tơdrong yoch nhen thoi tơdrong jĭ hơpoh lanh pran dêh, tơdah ưh kơ pơma phơ̆t hăm tơdrong yoch, ưh kơ hơmet hrĕnh tĕnh lei tơdrong yoch gô rai dêh rai dêh. Apinh Kră Yang tơgŭm bơ̆n krăng kơchăng weh wer ataih đơ̆ng tơdrong yoch, mă khan mưh bơ̆n weh wer đơ̆ng tơdrong yoch, bơ̆n pŭ iŏk tơdrong hơtŭch ưh kơ tôm mah ră, mă-lei noh ‘lơ̆ng hloh kơ bơ̆n hiôk kơ tơdrong đêl bơ̆n ‘ngeng na đei hloi kơ bơ̆n, hiôk noh hrei hrei đĕch na huŏng lăm dơnâu ŭnh tŏ hang ling-lang ling-lang.
Bơ̆n hăm krăng kơchăng păng gơ̆t ĕnh ưh dôm tơdrong hưch ham, rơhing ’ngeng kiơ̆ kơ sĕch akar?
Kơkuh kơ Ih Kră Yang, inh bơnê kơ Ih hlôi chông anhăk inh lăm tơdrong tơpăt hơnơ̆ng, ‘lơ̆ng rơgoh. Apinh Ih ăn thim kơ inh jơhngơ̆m pran ‘nao păng ăn kơ inh gơh hơgei wă kơ inh băt weh wer ataih đơ̆ng hơđong, đơ̆ng kap tơdrong yoch mă đe đăk inh noh wă kơ inh arih pơyua ăn kơ Ih. Inh krao khan yua anăn Kră Yang Yêsu Krist, Amen!
Đŏk Sơ̆p hla bơar ‘Bok Kei-Dei lăm pêng sơnăm: II Samuel 14
Kênh Youtube BHKTHN:
