Tơdrong Pơđơ̆k 28:4
“Bơngai achăng lê̆ khôi juăt hăt bơnê kơ bơngai pơm kơnê̆; Mă-lei đei bơngai kiơ̆ khôi juăt tơblah hăm lu sư.” (Tơdrong Pơđơ̆k 28:4)
Nơ̆r jet tơchĕng pơwao:
– Kiơ̆ kơ Tơdrong Pơđơ̆k 28:4, Tơdrong kiơ truh kơplah kon bơngai achăng tŭk khôi juăt ‘Bok Kei-Dei?
– Bơngai bơwei khôi juăt Kră Yang gô arih thoi yơ?
– Pơm thoi yơ bơngai lui kơ Kră Yang gơh dơ̆ng kơjăp lăm lu tơdrong glăi ưh kơ trŏ lăm chăl dang ei?
Nơ̆r Kră Yang âu tơ’blŏk kơ kon pơlei Kră Yang gah tơdrong gĭt kăl wei kơjăp Nơ̆r ‘Bok Kei-Dei lăm teh đak bĕnh kơ tơdrong tơplih păng pơhlŭ pơlung. Kơplah kon bơngai hơngah kơ khôi juăt Kră Yang, lu sư rai tơ hiong lê̆ tơdrong pơm ‘lơ̆ng gah bơhngol. Tơdrong kơnê̆ ưh pă lăng khan glăi, mă jing juăt bơih na jing drơ̆ng khan gơh mơ̆n, pơtrŭt păng kư̆m pôk pơ-ư hloi mơ̆n, tơplơ̆ dơ̆ng, bơngai mă ‘mêm păng wei răk Nơ̆r Kră Yang gô đei kĕ pran dơ̆ng kơjăp kơplah tơ’bơ̆p hăm tơdrong kơnê̆ păng bơwei nơ̆r sĭt tơpă. “Khôi juăt” lăm trong âu ưh kơ sĭ nơ̆r tơtă lăm chăl pah so, mă kư̆m tơ’bôh ăn gah tơdrong bơtho păng tơdrong sĭt ling lang lăm ‘Bok Kei-Dei. Bơngai wei răk Nơ̆r Kră Yang jơ̆ bơngai dan tơdrong arih kơdih akâu lăm tơdrong bơtho tơ’bôh đơ̆ng Sư, băt kơnăl tơdrong ‘lơ̆ng păng tơdrong kơnê̆, tơdrong trŏ păng tơdrong glăi. sư ưh kơ arih druh kiơ̆ bơngai lơ dah kiơ̆ tơdrong ala teh, mă-lei arih kiơ̆ thoi ‘Bok Kei-Dei wă. Hloh kơ noh dơ̆ng, lu sư “tơblah” dah “plơ̆ dơ̆ng” lu tơdrong glăi, arih băt kơ pŭ iŏk păng yua tơdrong gơh pơgơ̆r chông ba bơngai nai arih gơh hơgei chu kiơ̆ tơdrong juăt.
Chăl dang ei, lơ tơdrong gĭt lăm teh đak rai wă tơplơ̆ hăm tơdrong hơgăt lăm Sơ̆p Hla Bơar Nơ̆r Kră Yang. Đei lu tơdrong adrol lăng glăi na dang ei lăng khan hmă đĕch. Thoi noh, Khul Bơngai Lui kăl kơchăng păng rôp kơjăp lăm Nơ̆r Kră Yang wă huay kơ druh kiơ̆ kơ chăl jơhnơr, ‘Bok Pôl bơtho: “Bơ̆n ‘nĕ pă pơm yoch tôm tơdrong kơnê̆ thoi lu bơngai tơ teh âu juăt kơ pơm. Bơ̆n athei pơjao akâu bơ̆n kơ ‘Bok Kei-Dei tơplih jơhngơ̆m đon bơ̆n jing ‘nao wă kơ bơ̆n băt tôm tơdrong Sư, tơdrong trŏ tơdrong ‘lơ̆ng tơpăt ngăl.” (Rôm 12: 2). Bơngai lui kơ Kră Yang mă Sư rơih iŏk bơih arih phara ‘biơ̆, nhen thoi ka glơi adrơ̆k dơ̆ng, tơplơ̆ hăm tơdrong tơpăt păng ‘mêm kơ ‘Bok Krĭst. ‘Bok bơtho anăn John Wesley ngăl pơma: “lăm tơdrong arih minh chăl jơhngơr rai kư̆ kă, chăl jơhnơr đơ̆ng rŏng rai drơ̆ng pơm tôm tơdrong”. Nơ̆r pơma âu tơ’blŏk kơ lu bơ̆n khan dah Khul Bơngai Lui păng Hnam Dơnŏ ưh kơ wei răk nơ̆r Kră Yang, chăl johnơr đơ̆ng rơ̆ng rai ‘bônh kơ ataih đơ̆ng đon lui păng tơdrong mă hơgăt bơih gah bơhngol.
Lăm tơdrong arih rim năr, lu bơ̆n kăl kơ đŏk tơchĕng pơwao lăm Sơ̆p Hla Bơar Nơ̆r ‘Bok Kei-Dei wă kơ lăm đon tơchĕng tơplih ming ‘nao. Mĕ ‘bă kăl kơ bơtho kon sâu hli yom kơ Kră Yang păng arih pơm kiơ̆ Nơ̆r Kră Yang. tơ anih jang, hnam trưng hŏk dah kon pơlei, bơngai lui kơ Kră Yang athei arih tơpăt, ‘mêm mơnat păng ưh kơ kiơ̆ hơdai hăm tơdrong yoch glăi. mă khan tơ’bơ̆p hăm nơ̆r pơma plơ̆ dah gleh anat, mă-lei athei lui ngeh kơ ‘Bok Kei-Dei ling lang ăn jơhngơ̆m pran ‘nao kơ bơngai bu tơnăp hăm Sư.
Ơ Kră Yang, apĭnh tơgŭm inh ‘mêm păng chu wei răk Nơ̆r Kră Yang rim năr, apĭnh ăn kơ inh gơh hơgei păng pơ̆n nuih wă kơ dơ̆ng kơjăp mă tơ’bơ̆p hăm tơdrong glăi, arih pơm kơdranh tơdrong sĭt tơpă păng tơdrong ‘mêm Kră Yang lăm teh đak dang ei, krao khan yua anăn Kră Yang Yêsu Krist. Amen.
Lu bơ̆n wei kơjăp tơdrong sĭt đơ̆ng Kră Yang thoi yơ lăm tơdrong arih rim năr hăm chăl arih dang ei?
Đŏk sơ̆p hla bơar nơ̆r ‘Bok Kei-Dei lăm pêng sơnăm: Hơriso 138-139
Kênh Youtube BHKTHN:
