Klei Aê Diê Blŭ: Klei Mphŭn Dơ̆ng 3:1‑7; Y‑Mathiơ 26:36‑44
Êlan kliăng: “Nĕ anei, klei gưt asăp jing jăk hĭn kơ klei ngă yang, leh anăn klei dôk hmư̆ jing jăk hĭn kơ prăi biăp knô.” (I Y‑Samuel 15:22b).
Klei êmuh ksiêm mĭn: Răk klei yăl dliê Khua Yang Yêsu hlăm war djam Gêtsêmanê, ya klei yăl dliê drei bi mĭn? Ya ngă H’Êwơ amâo gưt asăp Aê Diê ôh? Si klei Khua Yang Yêsu tŭ gưt klei Aê Diê Ama čiăng? Ti anôk klei dưi čiăng kơ drei tŭ gưt nanao klei Aê Diê ciăng?
Răk klei yăl dliê Khua Yang Yêsu hlăm War Gêtsêmanê (Y‑Mathiơ 26:36‑44), drei bi mĭn kơ klei yăl dliê hlăm war Êđen. Drei dưi pia war Êđen jing war djam klei lông dlăng, tinăn Aê Diê lông dlăng klei aê aduôn phung mnuih gưt asăp. H’Êwơ hmư̆ klei Satan mplư amâo djă pioh ôh klei Aê Diê mtă, ƀơ̆ng boh mơ̆ng ana kyâo Aê Diê kăm ghă. Kyua tluh čiăng mâo “ală pŏk mblang” msĕ si Aê Diê, H’Êwơ gao asăp klei Aê Diê mtă. Leh anăn ñu amâo ƀơ̆ng boh kăm anăn hjăn ôh ƀiădah brei wăt ung ñu Y‑Ađam ƀơ̆ng mbĭt (Klei Mphŭn Dơ̆ng 3:1‑6). Boh tŭ mơ̆ng klei amâo gưt asăp anăn, Aê Diê suôt diñu dua đuĕ mơ̆ng war Êđen jăk mơak leh anăn klah đuĕ kbưi hŏng klei Aê Diê dôk mbĭt. Klei H’Êwơ gao asăp bi hmăi truh kơ jih jang mnuih. Knŏng kyua klei sa čô amâo gưt asăp snăn jih jang lăn ala kram hlăm klei soh, bi ktlah hŏng Aê Diê guh kơang.
Hlăm war Gêtsêmanê, Khua Yang Yêsu lui pioh kơ drei sa rup bi hmô klei gưt asăp kluôm ênŭm. Tlă anăp hŏng klei knap mñai hlăm asei mlei kđeh sa čô mnuih, Khua Yang Yêsu ăt “rŭng răng” leh anăn “ênguôt snăk”. Ñu wah lač hŏng jih ai tiê akâo kơ Aê Diê Ama tơdah dưi srăng mă mđuĕ hĕ kčok klei ruă knap, ƀiădah tŭ gưt tui si klei Ama čiăng amâo djŏ tui si klei Ñu čiăng ôh. Dôk ti anăp klei lông dlăng prŏng prĭn jing klei djiê, Khua Yang Yêsu ăt hmiêt mkăp ai tiê đup gưt tui si klei Ama čiăng. Ñu amâo ruah ngă tui si klei kđeh čiăng ôh ƀiădah đup gưt kluôm dhuôm hdră êlan klei bi mtlaih mơ̆ng Aê Diê. Hŏng klei Khua Yang Yêsu gưt asăp kluôm ênŭm jing klei săn asei mlei ti dlông kyâo bi kal snăn anak mnuih lŏ mâo klei bi grăng hŏng Aê Diê.
Gưt asăp jing sa klei ruah Pô Hrih Mjing dưm kơ anak mnuih. Sĭt yơh Ñu čiăng kơ drei gưt asăp Ñu, ƀiădah Ñu ăt brei kơ drei klei mĭn êngiê pioh ruah. H’Êwơ ruah klei amâo gưt asăp snăn yơh ñu pô leh anăn jih jang phung mnuih tŭ gui boh mơ̆ng klei anăn. Bi mni kơ Aê Diê kyua Khua Yang Yêsu ruah klei gưt asăp snăn Aê Diê mpŭ kơ Ñu ti dlông snăk, leh anăn brei kơ Ñu anăn ti dlông hĭn kơ jih jang anăn (Philip 2:9‑11).
Grăp čô drei amâo tlaih ôh đa blư̆ dôk hlăm war djam klei lông dlăng klei hdĭp drei. Drei amâo dưi ôh bi blah hŏng klei ktang drei pô, ƀiădah rup bi hmô klei gưt asăp kluôm ênŭm mơ̆ng Khua Yang Yêsu srăng thiăm kơ drei klei dưi leh anăn klei ktang mrâo čiăng kơ drei hmiêt mkăp nanao tŭ gưt klei Khua Yang čiăng hlăm jih jang klei găn.
Si ngă drei hlăk dôk hlăm war djam klei lông dlăng mơ̆? Diih ruah gưt asăp amâodah amâo gưt asăp Klei Aê Diê Blŭ?
Wah lač: Ơ Khua Yang, ti krah klei lông dlăng hlăm klei hdĭp, akâo kơ Khua Yang thiăm ai ktang čiăng kâo hmiêt mkăp tŭ gưt klei Khua Yang čiăng. Wăt tơdah găn klei ruă knap, kâo čuăn tui rup Khua Yang Yêsu bi hmô gưt asăp kluôm ênŭm.
Dlăng Klei Aê Diê Blŭ hlăm tlâo thŭn: Y‑Êsai 28:1‑22
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
