Chivkeeb 3:1-7; Mathais 26:36-44
Nqe cim:
“Mloog tus Tswv lus zoo dua qhov uas muab tej yaj zoo nkauj tua fij rau Nws” (I Xamuyees 15:22b).
Lus nug rau sawvdaws xav:
- Nyeem zaj xwm Tswv Yexus nyob hauv lub vaj Khexemanes, ua rau peb xav txog zaj xwm twg?
- Vim licas Evas tsis mloog tus Tswv lus?
- Tswv Yexus ua raws Vaj Leej Txiv lub siab nyiam licas?
- Yam dabtsi thiaj yog lub zog txhawb kom peb ua tau raws li Vajtswv lub siab nyiam?
Nyeem zaj xwm Tswv Yexus nyob hauv lub vaj Khexemanes (Mathais 26:36-44), ua rau peb xav txog zaj xwm hauv lub vaj Edees. Hais tau hais tias lub vaj Edees yog lub vaj sim siab, nyob qhov ntawd Vajtswv sim poj koob yawm txwv kev mloog lus. Evas mloog Xatas tej lus dag ntxias thiaj tsis ua raws tus Tswv tej lus samhwm, mus noj tsob ntoo uas tus Tswv txwv tej txiv. Vim qhov uas ntshaw “muaj tswvyim” zoo li tus Tswv, Evas thiaj tshem tus Tswv tej lus rau ib cag. Thiab tsis yog Evas tib leeg noj cov txiv raug txwv xwb, nws tseem muab rau nws tus txiv uas yog Adas noj lawm thiab (Chivkeeb 3:1-6). Qhov kawg ntawm kev tsis mloog lus yog nkawd raug ntiab tawm ntawm lub vaj Edees koobhmoov thiab raug txav deb Vajtswv. Evas kev tsis mloog lus cuam tshuam rau txhua tus tibneeg. Vim ib tug tsis mloog lus ua rau lub ntiajteb puv npo kev txhaum, raug cais tawm ntawm Vajtswv lub tshwjchim.
Nyob hauv lub vaj Khexemanes, Tswv Yexus ua tau ib tug qauv zoo hauv kev mloog lus tuag nthi pub rau peb xyaum. Thaum hnav tibneeg lub cev tiv kev txomnyem, Tswv Yexus kuj “nyuaj siab” thiab“ntxhov siab” kawg li. Nws tas siab tas ntsws taij thov yog tau ces cia Vaj Leej Txiv tshem lub khob txomnyem mus, tiamsis Nws thov ua raws li Vaj Leej Txiv lub siab nyiam xwb txhob ua raws Nws lub siab nyiam. Thaum ntsib kev sim siab loj uas yog kev tuag, Tswv Yexus yeej zoo siab hlo ua raws li Leej Txiv lub siab nyiam. Tswv Yexus tsis xaiv ua raws li lubcev txojkev ntshaw tiamsis Nws ua txhua yam raws li Vajtswv lub homphiaj cawm tibneeg. Dhau ntawm Tswv Yexus kev mloog lus txaus nkaus uas yog tuag saum tus ntoo khaublig, tibneeg thiaj tau rov los nrog Vajtswv sib raug zoo.
Mloog lus yog ib txojkev xaiv uas Tus Tsim Txhua Yam teem cia rau tibneeg. Tus Tswv yeej xav kom peb mloog Nws lus, tiamsis Nws kuj pub rau peb muaj kev xaiv ywjpheej ua raws lossis tsis ua raws. Evas tau xaiv tsis mloog lus thiab raug ris lub txim rau nws tus kheej thiab tagnrho noobneej. Ua Vajtswv tsaug, vim Tswv Yexus tau xaiv mloog lus thiaj tau Vajtswv tsa ua tus loj dua ntais, thiab tis lub npe uas zoo tshaj tej npe huv tibsi rau Nws (Filipis 2:9-11).
Peb txhua tus khiav tsis dhau tej zaum ntsib kev sim siab hauv lubneej. Peb tsis siv tus kheej lub dag zog los tawmtsam, tiamsis Tswv Yexus tus qauv mloog lus tuag nthi yuav txhawb peb lub zog thiab pub peb muaj dag zog tshiab ua raws tus Tswv lub siab nyiam txhua lub tsamthawj.
Thov Vajtswv
Tus Tswv, thaum ntsib tej kev sim siab hauv lubneej, thov koj txhawb nyuam yaus lub zog kom ua raws li Koj lub siab nyiam. Txawm yuav ntsib tej kev txomnyem, los nyuam yaus yuav xyaum raws Tswv Yexus tus qauv hauv kev mloog lus. Amees.
Peb puas tabtom nyob hauv ib lub vaj sim siab twg? Nej xaiv ua raws lossis tsis ua raws Vajtswv Txojlus?
Nyeem Vajluskub hauv peb lub xyoos: Yaxayas 28:1-22
Kênh Youtube BHKTHN:
