Klei Aê Diê Blŭ: Y‑Mathiơ 6:6
Êlan kliăng: “Ƀiădah tơdah ih wah lač, mŭt hlăm adŭ ih, kđăl hĕ ƀăng bhă, leh anăn wah lač kơ Ama ih Pô dôk hlăm anôk hgăm, leh anăn Ama ih Pô ƀuh hlăm anôk hgăm srăng mưn ih.” (Y‑Mathiơ 6:6)
Klei êmuh ksiêm mĭn: Si klei Khua Yang Yêsu mblang kơ klei Wah lač? Ya mta klei yuôm čiăng kơ Khua Yang mơak tŭ klei wah lač? Ya mta klei drei čiăng bi mlih hlăm klei hdĭp wah lač?
Păt čiăng jih jang phung đăo kơ jih jang klei đăo mdê mdê ăt wah lač sơăi, leh anăn lu blư̆ phung đăo kơ Krist ăt adôk wah lač msĕ si phung amâo mâo đăo kwưh akâo kơ yang diñu pô mơh. Hlăm Klei Mtô Ti Dlông Cư̆, Khua Yang Yêsu hưn mdah lu knuih hdĭp sa čô mnuih ƀuôn sang Ƀuôn Ala Mtao Adiê, leh anăn boh nik hlăm Y‑Mathiơ 6:6, Ñu lač leh kơ klei phung Israel khăng ngă, ƀiădah klei ngă anăn kluôm dhuôm amâo djŏ ôh, anăn jing kơ klei wah lač.
Tơdah mtô kơ klei wah lač sĭt, Khua Yang Yêsu amâo lač ôh: “hlăk ih wah lač…” ƀiădah Ñu lač: “Tơdah ih wah lač…”, snăn wah lač jing bruă bhiăn ngă yơh. Leh anăn ñu mtô ênhă êlan ngă, “Ƀiădah tơdah ih wah lač, mŭt hlăm adŭ ih, kđăl hĕ ƀăng bhă,…”, klei anăn čiăng lač, wah lač jing bruă bhiăn ngă hjăn păn. Khua Yang Yêsu lŏ mtô: “Ƀiădah tơdah ih wah lač, mŭt hlăm adŭ ih, kđăl hĕ ƀăng bhă, leh anăn wah lač kơ Ama ih …” Snăn, wah lač jing bruă bhiăn ngă hjăn păn kơ phung iêo Aê Diê jing Ama, amâodah blŭ mdê jing phung anak Aê Diê.
Hlei pô jing anak Aê Diê? Mblang tĭng kơ klei hrih mjing, jih jang mnuih jing anak Aê Diê sơăi (Bruă Phung Khua Ƀĭng Kna 17:28), ƀiădah tơdah lač kơ anak Aê Diê, Hdruôm Hră Klei Bi Mguôp Mrâo čiăng lač kơ phung đăo kơ Khua Yang Yêsu. Snăn klei wah lač sĭt myơr kơ Aê Diê Ama hŏng Khua Yang Yêsu. Anăn yơh jing phŭn knhal drei ruê̆ klei wah lač hŏng pruê̆ blŭ: “Hlăm Anăn Khua Yang Yêsu Krist” – anei amâo djŏ ôh jing klei blŭ mñă wĭt hơăi mang – ƀiădah brei jing sa klei thâo săng êlam snei, tơdah amâo mâo kyua hŏng klei djiê leh anăn klei kbiă lŏ hdĭp mơ̆ng Khua Yang Yêsu, snăn drei amâo dưi nao kơ Aê Diê leh anăn wah lač hŏng Ñu ôh (Hêbrơ 10:19-22). Kdlưn hĭn mơh, Klei Aê Diê Blŭ ăt mtô klei wah lač sĭt myơr kơ Aê Diê Ama hŏng Khua Yang Yêsu Krist leh anăn dôk hlăm Yang Mngăt Jăk (Êphêsô 2:18; Rôm 8:26-27).
Snăn, wah lač jing sa bruă bhiăn ngă hjăn păn kơ sa čô đăo kơ Khua Yang Yêsu, jing klei bi mguôp hjăn păn sa čô pô đăo kơ Krist hŏng Aê Diê. Wah lač amâo djŏ jing bruă klei đăo bhiăn ngă ôh, ăt kăn djŏ jing ênhă êlan čiăng tui duah klei êđăp ênang hlăm ai tiê rei, ƀiădah wah lač jing klei bi mguôp ti krah sa čô mnuih jing anak Aê Diê hŏng Ñu. Kyuanăn, wah lač jing sa bruă mâo knuih “gŏ sang”, jing bruă bhiăn ngă hlăm klei bi mguôp Ama – anak. Amâodah dưi lač, jing anak Aê Diê leh, snăn brei wah lač hŏng Ñu yơh.
Si ngă drei jing anak Aê Diê sĭt mơ̆, leh anăn dôk mâo klei bi mguôp hŏng Aê Diê hŏng klei wah lač mơ̆?
Wah lač: Ơ Khua Yang, bi mni kơ Khua Yang kyuadah Ih bi mtlaih kâo leh, ba kâo mŭt hlăm gŏ sang Aê Diê, leh anăn brei kơ kâo klei pap dưi bi mguôp hŏng Ih hŏng klei wah lač. Brei kâo dôk giăm Khua Yang nanao, čiăng kơ grăp hruê thâo kral Khua Yang hĭn, thâo kral ai tiê Ih leh anăn kyua klei anăn kâo hdĭp bi mơak kơ Ih hĭn. Kâo wah lač hlăm Anăn Khua Yang Yêsu Krist, Amen.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Dlăng Klei Aê Diê Blŭ hlăm tlâo thŭn: Klei Bi Hriêng 17
Kênh Youtube BHKTHN:
