Mathais 6:6
Nqe cim:
“Tiamsis thaum nej thov Vajtswv, nej cia li mus rau hauv txaj thiab kaw rooj paim tso, nej mam li thov nej Leej Txiv tus uas nej qhovmuag tsis pom. Nws thiaj yuav muab nqi zog rau nej” (Mathais 6:6)
Lus nug rau sawvdaws xav:
– Tswv Yexus qhia tawm lub ntsiab twg hauv kev thov Vajtswv?
– Muaj tej yam tseemceeb twg kom tej lus thov tau Vajtswv zoo siab txais yuav?
– Qhov twg yog yam uas peb yuavtsum hloov hauv kev thov Vajtswv?
Tagnrho txhua tus ntseeg, txhua yam kev ntseeg puavleej thov lawv tej vajtswv thiab qee lub sijhawm ntau tus ntseeg kuj tabtom thov Vajtswv zoo li cov tsis ntseeg thov lawv tus vajtswv. Hauv zaj lus qhuab qhia saum roob, Tswv Yexus tau hais txog ntau tus yam ntxwv zoo ntawm ib tus pejxeem hauv Vajtswv Tebchaws, thiab tshwjxeeb hauv Mathais 6:6, Nws hais txog yam uas cov Yixalayees ib txwm ua tiamsis ua tsis yog li, ntawd yog kev thov Vajtswv.
Thaum uas qhia txog kev thov Vajtswv tseeb, Tswv Yexus tsis hais: “Yog nej thov Vajtswv…” tiamsis hais tias: “Thaum nej thov Vajtswv…”, Yog li ntawd kev thov Vajtswv yog yam uas yuavtsum ua. Thiab Tswv Yexus qhia kabke thov hais tias, “nej cia li mus rau hauv txaj thiab kaw rooj paim tso,…”, qhov ntawd qhia hais tias kev thov Vajtswv yog yam uas yuavtsum ua los ntawm qhov uas ntsiag to hauv yus tus kheej. Tswv Yexus qhia ntxiv: “Tiamsis thaum nej thov Vajtswv, nej cia li mus rau hauv txaj thiab kaw rooj paim tso, nej mam li thov nej Leej Txiv tus uas nej qhovmuag tsis pom…” Yog li ntawd, kev thov Vajtswv yog yam uas yuavtsum ua los ntawm qhov uas ntsiag to hauv yus ib leeg ntawm cov uas hu Vajtswv ua Txiv, lossis hais ua lwm seem cov uas yog Vajtswv menyuam.
Leejtwg yog Vajtswv menyuam? Los ntawm qhov uas Vajtswv kev tsim tibneeg ces txhua tus puavleej yog Vajtswv menyuam (Tes Haujlwm 17:28), tiamsis thaum uas hais txog Vajtswv menyuam, Vajluskub tshiab taw txog txhua tus uas ntseeg Tswv Yexus xwb. Yog li ntawd lolus thov Vajtswv tseeb tau muab fij rau Vaj Leej Txiv dhau los ntawm Tswv Yexus. Ntawd yog qhov vimchiv peb xaus lolus thov Vajtswv hais tias: “tuav Tswv Yexus Khetos lub npe thov” – ntawd tsis yog ib lolus hais mus hais los tsis muaj nqis – tiamsis yuavtsum lees paub hais tias yog tsis los ntawm Tswv Yexus kev tuag thiab sawv hauv rov qab los ces peb yeej mus tsis tau ntsib Vajtswv thiab thov Nws (Henplais 10:19-22). Tsis tas li ntawd, Vajluskub tseem qhia lolus thov Vajtswv tseeb tau muab fij rau Vaj Leej Txiv dhau los ntawm Tswv Yexus thiab nyob hauv Vaj Ntsujplig (Efexus 2:18; Loos 8:26-27).
Yog li ntawd, thov Vajtswv yog tes haujlwm ib txwm ua ntsiag to ntawm tus txhua kheej uas ntseeg Tswv Yexus, yog txoj kev sib txuas ntawm ib tug ntseeg tus kheej nrog Vajtswv. Thov Vajtswv tsis yog kevcai kev ntseeg, kuj tsis yog haukev tshawb nrhiav kev kaj siab hauv sab ntsujplig, tiamsis thov Vajtswv yog kev sib txuas ntawm tus neeg uas yog Vajtswv menyuam nrog Vajtswv. Vim li ntawd, kev thov Vajtswv zoo li ib “tsev neeg”, cimciv muaj kev sib txuas lus ntawm niam txiv thiab menyuam. Lossis hu tau hais tias yog Vajtswv menyuam ces yuavtsum thov Vajtswv.
Thov Vajtswv,
Tus Tswv, ua tsaug vim Koj tau cawm nyuamyaus, coj nyuamyaus los rau hauv Koj lub tsev neeg thiab pub rau nyuamyaus tau txoj koob hmoov tshwjxeeb sib txuas nrog Koj dhau los ntawm kev thov Vajtswv. Thov pab nyuam yaus nyob ze Koj txhua hnub, paub Koj heev zuj zus ntxiv, koj tus dej siab kom paub ua neej haum Vajtswv siab. Nyuam yaus tuav Yexus Khetos lub npe thov, Amees.
Peb puas tseeb yog Vajtswv menyuam thiab puas ua neej sib txuas nrog Nws hauv kev thov Vajtswv?
Nyeem Vajluskub hauv peb lub xyoo: Pajlug 17
Kênh Youtube BHKTHN:
