Klei Aê Diê Blŭ: Y‑Nêhêmi 1:1-11
Êlan kliăng: “Tơdah kâo hmư̆ jih klei anăn kâo dôk gŭ hia, kơŭ kyăm êjai lu hruê; leh anăn kâo ăt dôk kăm ƀơ̆ng huă, wah lač ti anăp Aê Diê hlăm adiê” ( Y‑Nêhêmi 1:4).
Klei êmuh ksiêm mĭn: Ya klei hưn mthâo Y‑Nêhêmi hmư̆ leh anăn si knhuah ñu wĭt lač? Ya klei ñu ngă hlăk leh hmư̆ klei hưn mthâo anăn?Mâo dŭm boh phŭn hlăm klei Y‑Nêhêmi wah lač? Si ngă klei drei bi mĭn leh anăn ya klei drei čiăng ngă brei kơ phung ƀuôn sang drei?
Y‑Nêhêmi jing sa čô Israel dôk jing pô djă kčok kơ mtao hlăm ênuk mtao Persơ. Hlăk mâo mnuih hriê mơ̆ng ƀuôn Yêrusalem, ñu êmuh mtam si klei jing ti ƀuôn sang ñu. Leh hmư̆ hưn kơ phung mnă ăt dôk hlăm čar, phung wĭt leh mơ̆ng klei jing mnă mâo klei rŭng răng leh anăn klei hêñ prŏng, mnư̆ ƀuôn prŏng klưh leh, leh anăn ƀăng jang gơ̆ pui ƀơ̆ng leh, ai tiê ñu ênguôt mčah (êlan 2-3). Y‑Nêhêmi mâo klei mtrŭt hlăm ai tiê čiăng wĭt lŏ mdơ̆ng mnư̆ ƀuôn prŏng. Ñu bi mĭn kơ klei anei amâo djŏ ôh kyua knŏng kơ ƀuôn sang ñu pô ƀiădah wăt kyua kơ phung ƀuôn sang Aê Diê ruah. Diñu amâo dưi brei phung ƀuôn sang tue tlao mưč ôh, amâo srăng bi guh kơang kơ Anăn Aê Diê ôh. Kyuanăn, ñu nao ti anăp Aê Diê, “dôk gŭ hia, kơŭ kyăm êjai lu hruê; leh anăn kâo ăt dôk kăm ƀơ̆ng huă, wah lač” (êlan 4). Bruă ñu ngă tal êlâo hĭn tơdah uêñ mĭn kơ phung ƀuôn sang ñu jing bi ti gŭ ñu pô wah lač brei. Ñu amâo knang ôh kơ anôk bruă ñu dôk djă hlăk anăn amâodah knang kơ anak mnuih čiăng dưi ngă klei ñu mĭn, ƀiădah êlâo hĭn ñu nao ti anăp Aê Diê, kwưh akâo kơ Aê Diê pap brei klei soh leh anăn akâo kơ phung ƀuôn sang mâo klei pap ti anăp Aê Diê.
Klei Y‑Nêhêmi wah lač kčưm dơ̆ng hŏng klei mpŭ mni kơ Aê Diê prŏng hĭn leh anăn năng huĭ leh anăn lŏ mñă kơ klei Ñu bi mguôp (êlan 5-6). Tui tluôn anăn ñu hưn klei soh ñu pô leh anăn klei soh phung ƀuôn sang ñu (êlan 7-9). Ñu lŏ mñă mơh bruă Aê Diê ngă leh kơ phung ƀuôn sang Israel hlăk êlâo dih (êlan 10). Ti knhal tuč ñu kwưh akâo kơ Aê Diê mđing hmư̆ klei ñu wah lač akâo kơ Aê Diê pap brei kơ phung ƀuôn sang Ñu (êlan 11). Y‑Nêhêmi nao ti anăp Aê Diê hŏng klei thâo săng kơ hlei Aê Diê jing leh anăn hưn klei soh brei kơ phung ƀuôn sang ñu akâo kơ Aê Diê pap brei leh anăn pap brei kơ klei soh. Ñu tuh êyuh ai tiê wah lač brei leh anăn dôk gĭr “kâo wah lač ti anăp ih hruê leh anăn mlam kyua phung ƀuôn sang Israel, phung dĭng buăl ih” (êlan 6). Y‑Nêhêmi lui brei kơ drei sa rup bi hmô kơ klei wah lač brei kơ phung ƀuôn sang. Aê Diê pô ăt tuôm lač mơh kơ Y‑Salômôn snei: “tơdah phung ƀuôn sang kâo arăng pia hŏng anăn kâo bi luă gŭ diñu pô, wah lač leh anăn duah ƀô̆ mta kâo, leh anăn lui êlan soh diñu, hlăk anăn kâo srăng hmư̆ mơ̆ng adiê, pap brei klei soh diñu, leh anăn bi hlao čar diñu.” (II Klei Yăl Dliê 7:14).
Drei čiăng snăk mâo lu“Y‑Nêhêmi” hlăm Phung Sang Aê Diê hruê anei mâo klei uêñ mĭn leh anăn hŏng jih ai tiê wah lač brei kơ phung anak ƀuôn sang Aê Diê tar ƀar lăn ala, boh nik kơ phung ƀuôn sang drei pô. Lăn čar drei dôk tlă anăp hŏng klei ruă tưp, klei truh mơ̆ng yan adiê leh anăn lu mta klei knap mñai mkăn. Tui hlue rup bi hmô mơ̆ng Y‑Nêhêmi, brei drei thâo hnĭng ênguôt, kơŭ kyăm hia, bi ti gŭ pô, kăm ƀơ̆ng huă leh anăn wah lač brei kơ phung ƀuôn sang drei pô hŏng Aê Diê kơ jih adiê. Tơdah grăp čô phung anak ƀuôn sang Aê Diê dôk hlăm čar pô wăt ti čar tač êngao, bi ti gŭ pô, kmhal kơ klei soh leh anăn kwưh akâo kơ Aê Diê, sĭt nik phung ƀuôn sang drei srăng mâo klei pap ti anăp Aê Diê leh anăn mâo klei bi mtlaih.
Si ngă drei jih ai tiê wah lač brei kơ phung ƀuôn sang drei mơ̆?
Wah lač: Ơ Khua Yang, akâo kơ Ih mñă kơ kâo thâo uêñ mĭn kơ phung ƀuôn sang kâo, thâodah ya bruă kâo dôk ngă, ti anôk kâo dôk, čiăng kơ kâo tuh êyuh ai tiê wah lač brei kơ phung ƀuôn sang kâo leh anăn kơ jih lăn ala.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: II Klei Yăl Dliê 18:1-27
Kênh Youtube BHKTHN:
