Klei Aê Diê Blŭ: II Têsalônik 3:1-2
Êlan kliăng: “Ơ phung ayŏng adei, ti knhal tuč hră anei kâo akâo kơ diih wah lač kơ hmei đa, čiăng kơ klei Khua Yang blŭ dưi jing lar djăl leh anăn mâo klei mpŭ msĕ si truh leh ti krah diih, leh anăn čiăng kơ hmei dưi tlaih mơ̆ng phung mnuih ƀai leh anăn jhat; kyuadah amâo djŏ ôh jih jang mnuih mâo klei đăo.” (II Têsalônik 3:1-2)
Klei êmuh ksiêm mĭn: Ya klei Khua ƀĭng kna Y-Pôl iêô mthưr brei phung anak ƀuôn sang Aê Diê ti ƀuôn Têsalônik ngă kơ ñu leh anăn kơ êpul hiu hưn Klei Mrâo Mrang Jăk? Ya klei hriăm kơ drei mơ̆ng klei ñu iêô mthưr wah lač?
Têsalônik jing sa ƀuôn prŏng hang êa ksĭ ti Masêdôn, leh anăn Phung Sang Aê Diê ti anăn Khua ƀĭng kna Y-Pôl mkŏ mdơ̆ng hlăm gưl ñu hiu hưn Klei Mrâo Mrang Jăk tal dua (Bruă Phung Khua Ƀĭng Kna 17:1-9). Ƀiădah lĕ, kyua klei arăng bi kdơ̆ng đei ñu dôk ti anăn amâo sui ôh, kyuanăn ñu đuê̆ nao ti ƀuôn Ƀêrê. Wăt tơdah snăn dưn, Khua ƀĭng kna Y-Pôl ăt djă pioh klei bi mguôp sĭt suôr hŏng phung đăo ti anei hŏng dua pŏk hră čih mơĭt kơ diñu. Hlăm hră mơĭt tal dua anei, êngao kơ bruă mgaih mkra klei rŭng hlăm Phung Sang Aê Diê, ñu wăt lŏ iêô mthưr phung đăo wah lač brei kơ êpul ñu hlăm bruă hiu hưn klei mrâo mrang jăk, “Ơ phung ayŏng adei, kâo akâo kơ diih wah lač kơ hmei đa …”
Khua ƀĭng kna Y-Pôl, jing sa čô pô hiu hưn klei mrâo mrang jăk bŏ hŏng klei myang Yang Mngăt Jăk, ƀiădah ñu luă gŭ nanao, thâo kral klei yuôm čiăng mâo phung đăo wah lač brei kơ ñu. Mta klei anei brei ƀuh klei ñu đăo kjăp sĭt kơ klei ktang myang mơ̆ng klei wah lač brei. Amâo djŏ knŏng hjăn hŏng Phung Sang Aê Diê ti ƀuôn Têsalônik ôh, hlăm jih hră ñu čih mơĭt kơ jih Phung Sang Aê Diê mkăn msĕ mơh, Khua ƀĭng kna Y-Pôl ăt kăn wơr bĭt akâo phung ayŏng adei wah lač brei čiăng kơ Khua Yang “pŏk ƀăng bhă” brei kơ ñu jhŏng mtô hưn Klei Mrâo Mrang Jăk djŏ tui si klei brei ñu blŭ (Kôlôs 4:3-4, Êphêsô 6:19-20). Hlăm trăn Klei Aê Diê Blŭ hruê anei, Khua ƀĭng kna Y-Pôl akâo kơ ayŏng adei Phung Sang Aê Diê ti Têsalônik wah lač “čiăng kơ klei Khua Yang blŭ dưi jing lar djăl leh anăn mâo klei mpŭ”. Hmăng hmưi čiăng kơ Klei Mrâo Mrang Jăk bi mtlaih mnuih mơ̆ng Khua Yang dưi lar djăl leh anăn mâo klei guh kơang, jing klei Khua ƀĭng kna Y-Pôl, wăt phung anak ƀuôn sang Aê Diê êpa mhao leh anăn hŏng jih ai tiê wah lač. Hlăm êlan 2, ñu lŏ lač mơh: “leh anăn čiăng kơ hmei dưi tlaih mơ̆ng phung mnuih ƀai leh anăn jhat; kyuadah amâo djŏ ôh jih jang mnuih mâo klei đăo”. Amâo djŏ knŏng ti ƀuôn Têsalônik, klei đăo kơ Krist hlăm lu anôk arăng bi kdơ̆ng, ngă jhat, kyua mơ̆ng klei bi mĭn mdê pô, bi hmăi mơ̆ng dhar kreh, amâodah kyua klei čhuai thâo săng, đa đa mkăn…, kyuanăn Khua ƀĭng kna Y-Pôl akâo kơ phung anak ƀuôn sang Aê Diê wah lač brei kơ ñu leh anăn kơ êpul hiu hưn dưi găn gao klei phung bi kdơ̆ng hŏng Klei Mrâo Mrang Jăk. Diñu ngă jhat kyuadah ka mâo klei đăo, akâo kơ klei myang Yang Mngăt Jăk ruêh ai tiê diñu, čiăng kơ diñu đăo kơ Khua Yang leh anăn bi mlih ai tiê.
Grăp pô hiu hưn klei đăo čiăng sơăi mâo klei wah lač brei, “čiăng kơ klei Khua Yang blŭ dưi jing lar djăl” (êlan 1), mblang jing mâo mmông găl hiu mtô hưn Klei Mrâo Mrang Jăk leh anăn bŏ hŏng klei myang Yang Mngăt Jăk. Wăt phung hur har mă bruă kơ Khua Yang ăt čiăng snăk mơh mâo klei đru hlăm klei hdĭp myang mơ̆ng phung anak ƀuôn sang Aê Diê hlăm Phung Sang Aê Diê. Brei hŏng jih ai tiê wah lač brei kơ hdơ̆ng pô, čiăng kơ Khua Yang pŏk ƀăng bhă Klei Mrâo Mrang Jăk bi mtlaih lu mnuih.
Ya mta klei drei wah lač kơ hdră hiu hưn klei mrâo mrang jăk Phung Sang Aê Diê?
Wah lač: Ơ Yang Mngăt Jăk! Brei kơ kâo mmông găl leh anăn klei myang čiăng dưi hưn bi sĭt Khua Yang kơ mah jiăng, ƀĭng găp, leh anăn kơ phung riêng gah kâo. Akâo Khua Yang brei diñu mâo ai tiê êdu êun, kmhal kơ klei soh leh anăn đăo čiăng mă tŭ Khua Yang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Čŏk Hia 3
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
