2 Thexalaunikes 3:1-2
Nqe cim:
“Cov kwvtij, thov nej niaj hnub thov Vajtswv pab peb kom peb muab siab rau qhia Vajtswv Txojlus. Vajtswv Txojlus thiaj yuav nrov ncha mus thoob plaws txhua qhov chaw, thiab muaj nqis rau sawvdaws ib yam li twb muaj nqis rau hauv nej lawm. Thiab thov Vajtswv pab kom peb dim ntawm cov neeg siab phem thiab limhiam txhais tes, rau qhov yeej yuav muaj ibtxhia tsis ntseeg Vajtswv Txojlus.” (2 Thexalaunikes 3:1-2)
Lus nug rau sawvdaws xav:
– Timthawj Paulus nqua hu cov ntseeg hauv Thexalaunikes ua dabtsi rau nws thiab pab tub xa Moo Zoo?
– Peb kawm tau dabtsi dhau los ntawm Paulus kev nqua hu thov Vajtswv?
Thexalaunikes yog ib lub nroog qhov chaw nres nkoj tseemceeb hauv Makedaunias, thiab Pawg Ntseeg ntawd tau timthawj Paulus tsim tsa thaum mus tshaj Txojmoo Zoo ntsug kev ob (Tes Haujlwm 17:1-9). Tiamsis, nws tsis muaj sijhawm nyob ntev ntawm no vim muaj neeg tawmtsam, nws thiaj raug mus rau hauv lub nroog Npele-as. Txawm li ntawd los, Paulus yeej tsis tso tseg txoj kev sib txuas nrog cov ntseeg ntawm no dhau los ntawm nws ob tsab ntawv xa rau lawv. Hauv tsab ntawv 2 Thexalaunikes no, tsis yog sau daws tej teebmeem hauv Pawg Ntseeg xwb tiamsis Paulus tseem nqua hu cov ntseeg thov Vajtswv pab rau Paulus lawv pab xa Moo Zoo, “Cov kwvtij, thov nej niaj hnub thov Vajtswv pab peb kom peb muab siab rau qhia Vajtswv Txojlus…”.
Timthawj Paulus yog ib tug tub tshaj tawm Txojmoo Zoo puv nkaus Vaj Ntsujplig lub hwjchim, tiamsis nws ibtxwm txo hwjchim zeem paub yus kev vamkhom yog ntawm cov ntseeg kev thov Vajtswv. Qhov no kuj qhia pom hais tias Paulus ntseeg ruaj rau hauv lub zog thov Vajtswv sib pab. Tsis yog Pawg Ntseeg Thexalaunikes xwb, tiamsis lwm tsab ntawv uas xa rau lwm Pawg Ntseeg Paulus kuj nqua hu cov kwvtij ntseeg thov Vajtswv pab kom Vajtswv “qhib qhov rooj” rau nws muaj lub siab tawv tshaj qhia Txojmoo Zoo raws li yam uas nws yuav tsum tau hais (Kaulauxais 4:3-4, Efexus 6:19–20).
Hauv ntu Vajluskub hnub no, timthawj Paulus thov cov kwvtij ntseeg hauv Pawg Ntseeg Thexalaunikes thov Vajtswv kom “Vajtswv Txojlus thiaj yuav nrov ncha mus thoob plaws txhua qhov chaw”. Paulus thiab Vajtswv cov menyuam txhua tus puavleej ntshaw thiab tas siab thov Vajtswv kom tus Tswv Txojmoo Zoo kev Cawmdim tau xa mus sai li sai tau thiab mus thoob plaws qhov txhia chaw. Hauv nqe 2, nws hais ntxiv “Thiab thov Vajtswv pab kom peb dim ntawm cov neeg siab phem thiab limhiam txhais tes, rau qhov yeej yuav muaj ibtxhia tsis ntseeg Vajtswv Txojlus”. Tsis yog hauv Thexalaunikes xwb, tiamsis Vajtswv Txojlus nyob txhua qhov chaw kuj pheej raug tawmtsam thiab tsimtxom, vim tsis nyiam, ntsig txoj kev coj noj coj ua lossis tawmtsam vim totaub yuam kev…
Vim li ntawd timthawj Paulus thov cov ntseeg thov Vajtswv pab nws thiab pab tub xa Moo Zoo kom hla dhau txoj kev tawmtsam ntawm ib txhia tibneeg ua tawmtsam Txojmoo Zoo. Lawv tsimtxom vim lawv tsis tau muaj kev ntseeg, thov Vaj Ntsujplig lub hwjchim tshoov lawv lub siab kom lawv ntseeg Vajtswv thiab hloov pauv lawv lub siab.
Txhua tus tub uas xa Txojmoo Zoo puavleej cheemtsum kev thov Vajtswv “Vajtswv Txojlus thiaj yuav nrov ncha mus thoob plaws txhua qhov chaw” (nqe 1), lub ntsiab yog muaj sijhawm qhia Vajtswv Txojlus thiab muaj Vajtswv Txojlus puv npo Vaj Ntsujplig lub hwjchim. Kiag txhua tus neeg uas muab siab rau ua Vajtswv tes haujlwm puavleej cheem tsum Vajtswv cov menyuam hauv Pawg Ntseeg kev sib pab rau sab ntsujplig. Cia li tas siab thov Vajtswv sib pab kom Vajtswv qhib qhov rooj rau Txojmoo Zoo kom cawm tau tibneeg coob leej.
Thov Vajtswv,
Vaj Ntsujplig tus dawbhuv! Thov pub Koj lub hwjchim rau nyuam yaus kom ua tim khawv txog Koj rau nyuam yaus tsev neeg tej phoojywg thiab neeg zejzog txhua tus. Thov Koj pub rau lawv muaj lub siab mos muag, tso kev txhaum tseg thiab los ntseeg txais yuav Koj. Nyuam yaus tuav Tswv Yexus Khetos lub npe thov, Amees.
Peb thov Vajtswv yam dabtsi rau Pawg Ntseeg kev npaj tseg tshaj tawm Txojmoo Zoo?
Nyeem Vajluskub hauv peb lub xyoos: Nkauj Quaj Ntsuag 3
Kênh Youtube BHKTHN:
