II Têsalônik 3:1-2
“Ơ lu ‘nhŏng oh, tơdrong âu dơ̆ng: Lu iĕm krao khan kơ ‘Bok Kei-Dei tơgŭm nhôn ‘biơ̆ hŏ, wă kơ lu nhôn gơh bơtho tơdrong Kră Yang Yêsu Krist jơ̆p-jang, wă kơ lơ bơngai lui hăm băt ư-ang tơdrong ‘nao ‘lơ̆ng Sư, kư̆m thoi iĕm ư-ang tơdrong Sư dang ei mơ̆n. Păng iĕm krao khan apinh ‘Bok Kei-Dei tơgŭm nhôn wă kơ lu bơngai kơnê̆ huay kơ pơm kơnê̆ kơ lu nhôn, kơlih kơ đei lơ bơngai ưh kơ wă lui kơ Kră Yang Yêsu Krist.” (II Têsalônik 3:1-2)
Nơ̆r jet tơchĕng pơwao:
- ‘Bok Pôl athei lu kon Kră Yang tơ pơlei Têsalônik pơm kiơ kơ sư păng lu khŭl chă bơtho?
- Bơ̆n pơhrăm iŏk tơdrong kiơ đơ̆ng nơ̆r athei krao khan tơgŭm sư?
Têsalônik jơ̆ minh pôm pơlei tih jê̆ đak dơsĭ lu duk dah thŏng nan gĭt kăl dêh tơ Masêđôn, păng khul bơngai lui tơnoh đơ̆ng ‘Bok Pôl pơjing tơiung đơ̆ng lăm tơdrong sư bơtho wơ̆t mă ‘bar (Tơdrong Jang 17:1-9). Mă khan thoi ei ră, sư oei tơnoh tŏ sĕt năr đĕch yua kơ đei tơdrong pơgăn na sư kăl kơ năm tơ pơlei Bêrê. Mă lei ‘Bok Pôl kŭm oei bơwei tơdrong tơbưh hơnơ̆ng hăm lu bơngai lui tơnoh sư gơih ‘bar kơ thơ ăn kơ lu sư. Lăm kơ thơ mă ‘bar âu, nguaih kơ tơdrong jang hơmet lu tơdrong anat lăm khŭl bơngai lui, sư kŭm athei bơngai lui krao khan tơgŭm kơ khul lu sư chă bơtho “ơ lu ‘nhŏng oh, tơdrong âu dơ̆ng: lu iĕm krao khan kơ ‘Bok Kei-Dei tơgŭm nhôn biơ̆ hŏ…”
‘Bok Pôl jơ̆ minh ‘nu bơngai bơtho bĕnh blai kơ Yang Bơhngol ‘Lơ̆ng, mă lei sư ling lang iŏk đon ala băt kơ tơdrong sư bơtho noh dai đơ̆ng bơngai lui krao khan tơgŭm, tơdrong ‘nâu kư̆m tơbăt sư lui ngeh gơnang tơpă kơ jơhngơ̆m pran đơ̆ng tơdrong krao khan ‘nâu. Ưh kơ sĭ lăp khŭl bơngai lui tơ pơlei Têsalônik đĕch ôh, lăm kơ thơ gơih kơ lu bơngai lui nai ‘Bok Pôl kư̆m ưh kơ hiơt apinh ‘nhŏng oh krao khan tơgŭm wă kơ Kră Yang “tơgŭm” kơ sư gơh pơ̆n nuih bơtho Tơdrong ‘Nao ‘Lơ̆ng sư trŏ thoi sư pơma (Kôlôsê 4:3-4, Êphêsô 6:19-20), lăm chăl trong nơ̆r ‘Bok Kei-Dei năr ‘nâu, ‘Bok Pôl apinh ‘nhŏng oh khŭl bơngai lui tơ pơlei Têsalônik krao khan tơgŭm wă kơ “nhôn gơh bơtho tơdrong Kră Yang Yêsu Krist jơ̆p jang wă kơ lơ bơngai lui hăm băt ư-ang Tơdrong ‘Nao ‘Lơ̆ng Sư”. Hơpơi Tơdrong ‘Nao ‘Lơ̆ng dŏng pơklaih đơ̆ng Kră Yang gơh jah kơtơ̆ng păng gơh ư-ang ‘noh tơdrong ‘Bok Pôl wă kư̆m thoi đĭ đăng kon Kră Yang rơhing păng đĭ jơhngơ̆m krao khan mơ̆n. Lăm trong 2, sư pơma thim: “păng iĕm krao khan apinh ‘Bok Kei-Dei tơgŭm nhôn, wă kơ lu bơngai kơnê̆ huay kơ pơm kơnê̆ kơ lu nhôn, kơlih kơ đei lơ bơngai ưh kơ wă lui kơ Kră Yang Yêsu Krist”. Ưh kơ sĭ tơ pơlei Têsalônik đĕch đei tơdrong pơgăn, na lơ anih kư̆m đei tơdrong pơgăn yua kơ tơdrong lui mơ̆n, pơgŏ pơđep kư̆ kă, yua kơ đơ̆ng dôm tơdrong so sơ̆, ‘bơm tơdrong juăt, dah mă tơdrong pơgăn đơ̆ng tơdrong hlôh hơwơ̆l…, kơlih kơ thoi noh ‘Bok Pôl athei kon pơlei Kră Yang krao khan tơgŭm sư păng khŭl bơtho wă kơ hlôi đơ̆ng tơdrong pơjah pơgăn đơ̆ng lu bơngai kuă kơ lu kơ Tơdrong ‘Nao ‘Lơ̆ng. Lu sư pơgŏ pơđep yua kơ tam mă đei đon lui, apinh tơdrong mơsêh Yang Bơhngol ‘Lơ̆ng tơ’blŏk jơhngơ̆m lu sư wă kơ lu sư lui song iŏk Kră Yang Yêsu păng tơplih jơhngơ̆m.
Mă bơngai chă bơtho kư̆m kăl kơ đei tơdrong krao khan tơgŭm wă kơ “lu nhôn gơh bơtho tơdrong Kră Yang Yêsu Krist jơ̆p jang” (trong 1). Wă kơ đei jơnăr bơtho păng đei tơdrong bơtho ‘bĕnh mơsêh Yang Bơhngol ‘Lơ̆ng. Mă lu bơngai adrin bơ̆jang kơ Kră Yang kư̆m kăl dêh tơdrong tơgŭm gah bơhngol đơ̆ng kon Kră Yang lăm khul bơngai lui. Athei đĭ jơhngơ̆m krao khan tơgŭm dih băl wă kơ Kră Yang pơih ‘măng Tơdrong ‘Nao ‘Lơ̆ng dŏng lơ bơngai.
Ơ Yang Bơhngol ‘Lơ̆ng! apinh ăn jơnăr păng tơdrong mơsêh wă kơ inh pơm kơdranh gah Ih kơ ‘nhŏng oh, bôl buŏl, păng ‘nhŏng oh jum dăr kơ nhôn. Apinh Kră Yang ăn kơ lu sư đei jơhngơ̆m iŏk đon ala, tơbral păng wă lui song iŏk Kră Yang, krao khan Yua anăn Kră Yang Yêsu Krist. Amen
Bơ̆n krao khan kơ tơdrong kiơ lăm tơdrong proh hơmet tơdrong bơtho đơ̆ng khŭl bơngai lui?
Đŏk Sơ̆p Hla Bơar nơ̆r ‘Bok Kei-Dei lăm pêng sơnăm: Nhơ̆m Hmoi 3.
Kênh Youtube BHKTHN:
