Klei Aê Diê Blŭ: Y‑Mathiơ 6:5a
Êlan kliăng: “Tơdah diih wah lač, đăm jing msĕ si phung ai ngăm ôh; kyuadah diñu khăp wah lač dôk dơ̆ng hlăm sang bi kƀĭn leh anăn ti kiêng êlan čiăng kơ mnuih ƀuh. …” (Y‑Mathiơ 6:5a)
Klei êmuh ksiêm mĭn: Si bi knăl kơ klei wah lač ai ngăm? Hruê anei, hbĭl drei tuôm ai ngăm hlăm klei wah lač?
Khua Yang Yêsu lač kơ klei wah lač “phung ai ngăm”. Hlăm klei Grek, mblang boh blŭ “ai ngăm” jing mnuih mdah. Kyuanăn “phung ai ngăm” jing phung dôk mdah truă rup klei ngă sa čô mnuih mkăn. Jih klei “phung ai ngăm” blŭ leh anăn ngă amâo djŏ jing klei diñu pô đăo amâodah mĭn ôh, ƀiădah knŏng truă rup mdah klei ngă anăn čiăng kơ mnuih mkăn đăo kơ rup anăn đuč. Msĕ snăn mơh, “phung ai ngăm” Khua Yang Yêsu dôk lač tinei, diñu knŏng čiăng kơ mnuih mkăn đăo kơ diñu dôk wah lač ƀiădah klei sĭt gơ̆ amâo djŏ ôh. Phung ai ngăm anei amâo tui duah klei bi mguôp hŏng Aê Diê ôh, ƀiădah diñu knŏng “čiăng kơ mnuih ƀuh”. Pô “phung ai ngăm” wah lač amâo djŏ jing Aê Diê ôh ƀiădah kơdiñu pô. Blŭ mdê, wah lač ƀiădah knŏng mĭn hjăn kơ ñu pô đuč jing klei ai ngăm nanao yơh, kyuadah tui si klei mblang, wah lač jing klei bi mguôp hŏng Aê Diê leh anăn mĭn kơ Aê Diê Pô yơh.
Klei bi knăl êlưih ƀuh kơ mnuih wah lač ai ngăm jing “diñu khăp wah lač dôk dơ̆ng hlăm sang bi kƀĭn leh anăn ti kiêng êlan čiăng kơ mnuih ƀuh”. “Kiêng êlan” jing anôk lu êlan prŏng bi kkuh, lu mnuih găn gao leh anăn ƀuh. “Phung ai ngăm” čiăng jih jang mnuih ƀuh diñu hur har wah lač kyuanăn diñu kăp čiăng bi djŏ êjai dôk êbat ti krah êlan hŏng mmông wah lač, snăn yơh diñu mjưh hĕ čiăng wah lač. Diñu mdah rup sa čô mnuih khăp čiăng wah lač snăk yơh, snăn amâo dưi lui klei wah lač ôh, wăt tơdah êjai dôk ti krah êlan dưn. Leh anăn wăt tơdah diñu wah lač ti “sang kƀĭn” amâodah ti “kiêng êlan” dưn, klei bi knăl phŭn kơ diñu ăt jing “čiăng kơ mnuih ƀuh”, mblang jing tơdah “mnuih amâo mâo ƀuh” snăn diñu amâo mâo wah lač ôh, blŭ mdê, diñu knŏng khăp wah lač ti anôk mnuih lu, jing anôk lu mnuih ƀuh diñu wah lač.
Brei drei thâo săng snei, Khua Yang Yêsu amâo phat kđi ôh klei wah lač ti anôk mnuih lu, ƀiădah Ñu phat kđi kơ klei wah lač kyua kñăm čiăng kơ mnuih mkăn ƀuh. Sa čô mnuih ai ngăm knŏng dưi wah lač ti anôk mnuih lu ƀiădah amâo dưi ôh“…mŭt hlăm adŭ ih, kđăl hĕ ƀăng bhă, leh anăn wah lač kơ Ama ih Pô dôk hlăm anôk hgăm…” (êlan 6a) kyua boh sĭt gơ̆ diñu amâo tuôm mâo klei bi mguôp hjăn păn hŏng Aê Diê ôh. Ƀiădah brei drei răng, kyuadah amâo djŏ ôh sa čô mnuih wah lač “hlăm anôk hgăm” jing mnuih amâo ai ngăm ôh. Wah lač hlăm anôk hgăm amâo mâo mnuih ƀuh, ƀiădah yap kơ pô jing kpă ênô hlăm anôk anăn ăt jing ai ngăm msĕ mơh.
Hruê anei, drei dưi jing phung wah lač ai ngăm tơdah wah lač ƀiădah amâo mđing mĭn kơ Aê Diê ôh, ƀiădah knŏng mĭn hjăn kơ pô leh anăn kơ klei drei pô čiăng. Amâodah wah lač amâo mâo klei ksiêm mĭn, wah lač msĕ si klei đăo bhiăn ngă, klei mưng, amâodah yua klei wah lač pioh bi kdơ̆ng, amâodah čiăng bi êdah klei drei čiăng kơ mnuih mkăn thâo.
Ksiêm wĭt kơ drei pô, drei khăng wah lač sĭt amâodah wah lač ai ngăm?
Wah lač: Ơ Khua Yang, akâo Ih pap brei kơ kâo, kyuadah lu blư̆ kâo wah lač leh hŏng klei ai ngăm, wah lač amâo mâo hŏng jih ai tiê kơ Khua Yang ôh. Akâo Khua Yang brei kâo dôk hdĭp nanao hlăm klei bi mguôp sĭt suôr hŏng Khua Yang. Kâo wah lač hlăm Anăn Khua Yang Yêsu Krist, Amen.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Dlăng Klei Aê Diê Blŭ hlăm tlâo thŭn: II Y-Samuel 1
Kênh Youtube BHKTHN:
