Mathais 6:5a
Nqe cim:
“Thaum nej thov Vajtswv, nej tsis txhob ua li cov neeg ntsejmuag ncaj siab nkhaus ua. Lawv nyiam mus sawv thov Vajtswv hauv tej tsev sablaj thiab ntawm tej kev tshuam kom luag pom lawv” (Mathais 6:5a)
Lus nug rau sawvdaws xav:
– Tej yam uas zeem paub ntawm lolus thov Vajtswv cuav yog dab tsi?
– Niaj hnub nimno, tej zaum peb txawj thov Vajtswv cuav rau thaum twg?
Tswv Yexus hais txog kev thov Vajtswv ntawm “cov neeg ntsejmuag ncaj siab nkhaus”. Hauv lus Kilis, lub ntsiab ntawm lolus “ntsejmuag ncaj siab nkhaus” yog ib tug tub ua yeeb yam. Vim li ntawd, “cov neeg ntsejmuag ncaj siab nkhaus” tabtom sawv ua yeeb yam rau hauv ib tug neeg twg. Txhua yam uas “cov neeg ntsejmuag ncaj siab nkhaus” hais thiab ua tsis yog yam uas lawv ntseeg lossis xav tiamsis tsuas yog ib tug duab ua yeeb yam rau lwm tus ntseeg tus duab ntawd xwb. Ib yam li ntawd, “cov neeg ntsejmuag ncaj siab nkhaus” tsuas xav kom lwm tus ntseeg hais tias lawv tabtom thov Vajtswv tiamsis tseeb tiag tsis yog. Cov neeg ntsejmuag ncaj siab nkhaus no tsis nrhiav kev sib txuas nrog Vajtswv, tiamsis lawv tsuas yog xav “kom luag pom lawv”. Tus uas cov neeg ntsejmuag ncaj siab nkhaus taij thov tsis yog Vajtswv tiamsis yog lawv tus kheej ntag. Hais rau lwm seem, thov Vajtswv es tsuas yog xav txog yus xwb mas yog thov Vajtswv cuav, vim raws lub ntsiab thov Vajtswv yog sib txuas nrog Vajtswv thiab xav txog Nws xwb.
Lub cim yoojyim pom ntawm tus neeg thov Vajtswv cuav “Lawv nyiam mus sawv thov Vajtswv hauv tej tsev sablaj thiab ntawm tej kev tshuam kom luag pom lawv”. “Kev tshuam” yog hauv ntau txoj kev loj sib tshuam muaj neeg coob dhau mus los thiab saib pom. “Cov neeg ntsejmuag ncaj siab nkhaus” xav kom txhua tus pom lawv kub siab thov Vajtswv, lawv thiaj ntsuas thaus txog sijhawm thov Vajtswv ces lawv nres hauv plawv kev thov Vajtswv. Lawv ua tau ib tug tibneeg muaj tus duab xav thov Vajtswv heev, yog tsis thov Vajtswv mas yeej tsis tau kiag, txawm yog tabtom nyob hauv plawv kev los xij. Thiab txawm yog lawv thov Vajtswv hauv “tsev sablaj” lossis tom “tej kev tshuam” ces qhov uas lawv xav tau yog “kom luag pom lawv”, txhais hais tias yog neeg tsis pom ces lawv tsis thov Vajtswv, hais ua lwm seem, lawv tsuas xav thov ntawm tej qhov chaw uas muaj tibneeg coob pom lawv thov Vajtswv.
Peb nco ntsoov hais tias Tswv Yexus tsis txiav txim kev thov Vajtswv ntawm tej qhov chaw muaj tibneeg coob, tiamsis Nws txiav txim qhov uas thov Vajtswv homphiaj yog kom lwm tus pom. Ib tug neeg ntsejmuag ncaj siab nkhaus nws tsuas thov Vajtswv ntawm qhov chaw muaj tibneeg coob xwb tiamsis yeej tsis “…mus rau hauv txaj thiab kaw rooj paim tso, nej mam li thov nej Leej Txiv tus uas nej qhovmuag tsis pom…” (nqe 6a) vim qhov tseeb lawv yeej tsis muaj txoj kev sib txuas ntawm yus tus kheej nrog Vajtswv. Tiamsis peb yuavtsum xyuamxim vim tsis yog ib tug tibneeg thov Vajtswv “nyob qhov chaw ntsiag to” ces txawm yog tus neeg tseeb. Thov Vajtswv qhov chaw ntsiag to tsis muaj leejtwg paub, ces yus cimciv suav hais tias yus ncaj ncees ces kuj yog cuav.
Niaj hnub nim no, tej zaum peb txawj thov Vajtswv cuav, thaum thov Vajtswv peb tsis xav txog Vajtswv tiamsis tsuas xav txog yus thiab yam uas yus cheemtsum xwb. Lossis thov Vajtswv tib zaj qub, lossis thov Vajtswv zoo li kevcai, ua swm, lossis siv lolus thov Vajtswv cem lwm tus, lossis qhia tawm yus txoj kev ntshaw rau lwm tus paub.
Thov Vajtswv,
Tus Tswv, thov Koj zam txim rau nyuam yaus vim ntau zaus nyuam yaus thov Koj los ntawm kev dag xwb, tsis tag siab npuab Koj tiag. Thov pab kom nyuam yaus ua neej txawj nyob ze Koj txhua hnub. Nyuam yaus tuav Yexus Khetos lub npe thov, Amees.
Rov tshuaj peb tus kheej saib peb txoj kev thov Vajtswv puas tag siab lawm los tsis tau?
Nyeem Vajluskub hauv peb lub xyoo: 2 Xamuyees 1
Kênh Youtube BHKTHN:
