Galati 1:6-10
“Inh pơma thoi noh kon bơngai ưh kơ lăp đon ôh. Mă-lei inh wă kơ ‘Bok Kei-Dei lăp đon kơ tơdrong jang inh. Dah inh wă kơ kon bơngai lăp đon kơ inh đĕch lei ưh kơ sĭ inh jang tơdrong Yêsu Krist ôh.”
(Galati 1:10b)
Nơ̆r jet tơchĕng pơwao:
– Yua kơ kiơ ‘bok Pôl pơtơm chih kơ thơ thar pơma chrih hil hloi kơ lu bơngai lui tơ Galati?
– Sư pơma pêng wơ̆t ‘bơm kơ tơdrong lui ngĭl-ngŭl ‘noh sư wăkhan kiơ? Hăm trŏ kơ sư wă kơ kon bơngai lăp đon? (Tr.10).
– Bơ̆n athei arih thoi yơ kơplah bơ̆n băt kơnăl kơ bơ̆n kơdih đĭch đam Kră Yang?
Lăm lu kơthơ nai mă ‘bok Pôl chih, đang kơ sư jet gia, sư juăt kơ đei nơ̆r bơnê, pơma pơ-ư, pơma tơiung, pơlung hơtŏk jơhngơ̆m lui. Mă khan lei ră, lăm kơthơ Galati ‘nâu, sư tă tơ hơloh pơma tơdrong tơm găl lăm kơthơ ‘nâu hăm nơ̆r chrih hil, khan: “Inh sơleng kơ đon…”. Sư ưh kơ ôn ôh tơdrong sư ưh kơ hơmĕng, sư pơma tơpăt hloi hăm nơ̆r chrih hil kơ lu kon sư lăm tơdrong lui, yua kơ lu sư “hăt hot lui kơ nơ̆r đe pơhlŭ pơlung wă achăng lê̆ nơ̆r ‘Bok Kei-Dei ‘bônh đĕch.’Bok Kei-Dei krao bơ̆n wă kơ bơ̆n jing kon Sư, yua kơ Yêsu Krist lôch tang bơ̆n. Mă-lei dang ei iĕm wă kiơ̆ Tơdrong ‘Nao ‘Lơ̆ng nai dơ̆ng” (tr.6). Tơdrong ‘nâu tơ’bôh tơdrong lu bơngai Galati, gah tơdrong lui lu sư dang yơ noh mơ̆n; ‘nâu kư̆m tơ’bôh tơdrong‘bok Pôl hăm lu bơngai lui tơjê̆ tơtil dêh noh kư̆m trŏ kơ sư chrih hil thoi noh bơih.
Mă khan lei ră, lăm trong 10, sư đei pêng wơ̆t pơma’bơm gah tơdrong lui ngĭl-ngŭl, hăm trŏ kơ sư wă kơ kon bơngai lăp đon? Tơdrong ‘nâu ‘bơm truh tơ tơdrong lu bơngai lui tơ Galati tŏk-bŏk kơdâu kiơ̆ tơdrong ‘nao ‘lơ̆ng nai. Kư̆m thoi đe ưh kơ lui ngeh kơ sư jing jơ̆ng ‘bang Kră Yang Yêsu noh mơ̆n, “lu bơngai mă pơm kơ lu bơngai lui tơ Galati hơwơ̆l noh kư̆m pơm kơ lu bơngai lui ei ưh kơ lui ngeh khan hăm trŏ kơ ‘bok Pôl bơtho tơdrong gơh klaih yua kơ đơ̆ng đon lui, ưh kơ đơ̆ng pơm kiơ̆ tơdrong juăt, kăt tơdra akar ôh. (Galati 2:15-16), noh hăm trŏ kơ sư adrin wă kơ lu bơngai tơmoi tam mă kăt tơdra akar noh lăp đon? Sư tơl tơpăt thoi âu: “Dah inh wă kơ kon bơngai lăp đon kơ inh đĕch lei ưh kơsĭ inh jang tơdrong Yêsu Krist ôh” (tr.10). Bơngai đĭch đam arih, jang, pơm wă kơ mĭnh ‘nu yŏng sư đĕch lăp đon.Dah Yŏng sư ‘Bok Krist,sư arih pơm kơ Yŏng sư ‘Bok Krist lăp đon, dah yŏng sư kon bơngai, sư arih pơm kơ kon bơngai lăp đon.Mưh bơ̆n adrin pơhiôk jơhngơ̆m kon bơngai, pơm kơ kon bơngai lăp đon,’noh wă khan bơ̆n tŏk-bŏk oei pơm đĭch đam kon bơngai, ưh kơ trŏ kơ đĭch đam ‘Bok Krist ôh.Rơđah dêh, tơdrong noh kư̆m đei tơ’bôh đơ̆ng tơdrong ‘bok Pôl ưh kơ hrơ,sư chrih hil hloi lu bơngai lui tơ noh, chrih hăm nơ̆r arăng, nơ̆r tơdrăp.
Lăm Hla bơar Êphêsô 4:2, ‘bok Pôl kơdih đei bơtho thoi âu: “Inh wă kơ iĕm gơh găt thoi bơngai dim, băt ‘mêm kơ bôl buăl, pơma dơnuh dih băl mă hiôk, pơlung dih băl mă ‘lơ̆ng”. Mă khan lei ră, tơdrong lu bơngai lui tơ Galati noh tih găl dêh, lei na dah yua hăm nơ̆r rơngơp, nơ̆r pơma hơdar, pơma hăm nơ̆r’bơ̆r gơh lei lu sư ưh kơ hlôh trŏ thoi lu sư pơm noh ‘lơ̆ng kơnê̆ sư dang yơ, trăp hơiơch sư dang yơ. ’Bok Pôl sư băt ‘bơ̆t yơ, tơdrong kiơ kăl kơ pơma rơngơp, hơbôn; sư kư̆m băt ‘bơ̆t yơ, tơdrong kiơ kăl kơ pơma arăng, pơma tơdrăp, sư ưh kơ hli kơ pơm kơ đe ưh kơ hiôk ôh, yua kơ sư arih ưh kơ kơnhăm wă kơ kon bơngai lăp đon ôh, mă-lei sư wă dêh kơ Kră Yang lăp đon, kư̆m lơi yua ăn kơ đĭ-đăng bơngai dơ̆ng.
Đĭ-đăng bơngai lui, Kră Yang hlôi dŏng pơklaih wă kơ jing đĭch đam sư ngăl (Rô 6:18). Rim ‘nu bơ̆n ưh kơ gơh ôh iŏk tơdrong lui nai pơgơ̆p hơdai hăm tơdrong arih bơ̆n lui kơ Kră Yang noh wă kơ kon bơngai lăp đon, mă-lei athei hnhoi lăng tơ tơdrong Kră Yang lăp đon đĕch mă khan phŏ phŏ kơnh pơm kơ bôl buăl sơ’ngon, ưh kơ hiôk.
Dang ei bơ̆n tŏk-bŏk arih tơ’bôh bơ̆n đĭch đam ‘Bok Krist dah đĭch đam kon bơngai?
Kơkuh kơ Ih Kră Yang, inh âu đĭch đam Ih,adrol hloh, apĭnh Ih tơgŭm inh arih pơm kơ Ih lăp đon,
wă kơ Ih kư̆m yua inh arih pơyua ăn kơ lơ bơngai dơ̆ng. Inh krao khan yua anăn Kră Yang Yêsu Krist, Amen!
Đŏk Sơ̆p hla bơar ‘Bok Kei-Dei lăm pêng sơnăm: II Samuel 11
Kênh Youtube BHKTHN:
