Exekees 36:22-28
Nqe cim:
“Kuv yuav pub kuv tus ntsujplig rau nej, kom nej coj tau raws li kuv txoj kevcai thiab ceev kuv tej lus samhwm” (Exekees 36:27)
Lus nug xav:
– Dhau ntawm tus Cevlus Exekees, Vajtswv tshajtawm dabtsi txog tej uas Nws yuav ua rau haivneeg Yixalayees?
– Yam dabtsi yuav ua rau lawv tau hloov dua tshiab?
– Vajtswv tus Ntsujplig yuav pab lawv licas?
– Yam dabtsi hauv lub neej ua povthawj tias peb muaj Vajtswv tus Ntsujplig nyob nrog?
Tshooj 36 hauv phau ntawv Exekees tau suav hais tias yog tus Cevlus Exekees zaj lus qhia rau haivneeg Yixalayees los ntawm kev cia siab hais tias lawv yuav rov tau txhim kho tomqab uas raug poob mus ua cev qhev thiab ntxeev siab. Nyob hauv feem xubthawj ntawm tshooj no (nqe 1-15), tus Cevlus qhia hais tias Vajtswv yuav kho lawv lub tebchaws kom rov zoo. Feem ob (nqe 16-38), hais txog qhov uas tus Tswv yuav txhim kho Nws haivneeg lub neej kom rov zoo. Txawm yog lawv tsis ncaj ncees, los tus Tswv tseem qhia tshwm txojkev hlub tshua, tsis yog vim lawv tsimnyog, tiamsis kom Nws lub Npe tau koobmeej thiab tshwjchim ci ntsa iab (nqe 22). Lo lus cogtseg uas tseemceeb tshajplaws rau lawv tsis yog kev rov qab los qub teb qub chaws xwb, tiamsis tseem yog ib qho kev hloov dua tshiab hauv nruab siab, yog ib tes haujlwm tshwm muaj los ntawm Vajtswv tus Ntsujplig.
Cov lus “lub siab tshiab” thiab “lub siab uas mloog lus” (nqe 26) piav txog lub siab mos muag, paub teb tus Tswv lub suab, txawv “lub siab uas tawv li pobzeb” uas piv txog kev tawv ncauj, tawv siab tabmeeg tus Tswv txojkev nqua hu. Qhov kev hloov no tsis yog los ntawm tibneeg txojkev sib zog hloov tus kheej kom zoo, tiamsis yog ib qho kev hloov puag hauv paus tuaj los ntawm Vaj Ntsujplig yog tus ua. Tshwjxeeb yog nqe 27 hais meej hais tias: “Kuv yuav pub kuv tus ntsujplig rau nej, kom nej coj tau raws li kuv txoj kevcai thiab ceev kuv tej lus samhwm.” Qhov no qhia pom hais tias Vaj Ntsujplig tes haujlwm tsis tsuas yog ua rau lub siab mos muag xwb tiamsis tseem pub lub hwjchim kom peb ua tau lub neej mloog lus thiab ua neej hauv Vajtswv txojkev ncaj ncees.
Ntu Vajluskub no hais meej txog ob tes haujlwm ntawm Vaj Ntsujplig: Qhov xubthawj, yog hloov lub siab, thiab qhov ob, yog coj peb mus rau lub neej sib hlub thiab mloog lus. Vaj Ntsujplig yog tus muaj cuabkav ua haujlwm hauv tibneeg nruab siab thiab hloov tibneeg tus ntsujplig. Tsuas yog thaum Nws pub “lub siab uas mloog lus” lawm, tibneeg thiaj li muaj peevxwm paub txog tus Tswv txojkev hlub, paub lees txim, thiab paub nrhiav txojkev dawbhuv. Kev ncaj ncees tabmeeg tus Tswv pib los ntawm ib lub siab uas tau Nws hloov tshiab lawm. Vaj Ntsujplig ua rau peb paub “coj tau” raws li tus Tswv lub siab nyiam (nqe 27). Txhais tau hais tias Nws hloov lub neej raug yuam mloog lus dhau los ua lub neej zoo siab hlo ua, Nws pab peb hlub neeg, zam txim, ua haujlwm pab lwm tus thiab ua neej qhia tshwm Vajtswv tus mojyam.
Cov ntseeg uas muaj tus Tswv tus Ntsujplig nyob nrog yuav txi tau Vaj Ntsujplig cov txiv (Kalatias 5:22-23). Thiab ntawd yog povthawj ntawm ib lub neej uas puv npo Vaj Ntsujplig. Ib lub siab mos muag tabmeeg tus Tswv yeej yuav coj mus rau txojkev hlub tshua lwm tus. Txojkev hlub yog lub cim ntawm lub siab mloog lus uas muaj Vaj Ntsujplig tswjhwm.
Thov Vajtswv,
Vaj Ntsujplig, ua Koj tsaug vim Koj tau hloov nyuam yaus lub siab. Thov Koj niaj hnub nrog nraim thiab pab nyuam yaus ua lub neej ncaj ncees raws, kom qhia tshwm tau Khetos txojkev hlub dhau ntawm nyuam yaus txhua tes haujlwm thiab txhua lo lus hais. Nyuam yaus tuav Tswv Yexus Khetos lub npe thov, Amees.
Peb puas txais tau “lub siab uas mloog lus” lawm, lossis peb tseem muaj lub “lub siab uas tawv li pobzeb”?
Nyeem Vajluskub hauv peb lub xyoos: Ntawv Nkauj 102-103
Kênh Youtube BHKTHN:
