II Kauleethaus 10:4-8
Nqe cim:
“Peb cem tej neeg uas qhia tsis tseeb kom lawv tsis muaj lus hais. Peb rhuav tej uas neeg muab los thaiv sawvdaws tsis paub Vajtswv. Thiab peb coj cov neeg uas ua yeebncuab rau Vajtswv los mloog Yexus Khetos lus” (II Kauleethaus 10:5).
Lus nug rau sawvdaws xav:
– Timthawj Paulus hais tias nws siv yam cuabyeej twg los ua rog thiab nws tawm tsam yam dab tsi?
– Paulus txaus siab siv Vajtswv tej cuabyeej los tawm tsam vim dab tsi?
– Peb kheev siv yam cuabyeej twg los daws teebmeem hauv pawg ntseeg?
Cov neeg uas tawm tsam timthawj Paulus, lawv hais tias nws tsuas ua tawv hauv nws tej tsab ntawv xwb, tiamsis thaum ntsib tim ntsej tim muag nws yuav tsis hais tawv li. Paulus teb cov ntseeg hauv Kauleethaus hais tias, nws tsis siv tej cuabyeej li tibneeg ib txwm siv los nrog lwm tus tawm tsam tiamsis siv Vajtswv tej cuabyeej (nqe 4).
Timthawj Paulus txhais qhia cov ntseeg hauv Kauleethaus uas muaj lub siab xav yuamkev rau Paulus hais tias, Vajtswv lub fwjchim yog lub uas muaj peevxwm “rhuav tau yeebncuab lub yeej kom puastsuaj”, “rhuav tej uas neeg muab los thaiv tsis pub sawvdaws paub Vajtswv” thiab “coj cov neeg ua yeebncuab rau Vajtswv los mloog Yexus Khetos lus”, dhau ntawd Paulus kuj siv Vajtswv lub fwjchim los “cem cov neeg uas qhia tsis tseeb” (nqe 4,5). Vajtswv tej cuabyeej yog kev thov Vajtswv, kev ntseeg, kev cia siab thiab kev hlub (Efexus 6:13-18). Peb cov ntseeg tus yeebncuab yog Dab Ntxwjnyoog, tsis yog tibneeg, yog li ntawd Paulus thiaj siv lo lus muaj zog li ntawd qhia txog Vajtswv lub fwjchim, thiab thaum siv Vajtswv tej cuabyeej Paulus yeej muaj dej siab xav txhim kho cov ntseeg hauv Kauleethaus lub neej xwb tsis yog yuav rhuav lawv lub neej (nqe 8), vim li no, Paulus tsis muaj dab tsi txaj muag rau tus Tswv thiab rau nws lub siab.
Tus ua Vajtswv haujlwm, tau tus Tswv pub cuabyeej thiab fwjchim rau kom tawm mus ua tau haujlwm tawg paj txi txiv pub rau tus Tswv, tsis yog muab los rau ib tug tawm tsam ib tug. Timthawj Paulus ua rau sawvdaws paub hais tias nws yog Yexus Khetos tug (nqe 7) thaum nws siv Vajtswv lub fwjchim los tawm tsam cov neeg khav theeb uas sawv los tawm tsam Paulus thiab nws cov neeg. Peb cov ntseeg kuj zoo ib yam li Paulus, tau tus Tswv pub muaj Vajtswv tej cuabyeej los ua rog nrog Dab Ntxwjnyoog, tau tus Tswv pub Vaj Ntsujplig lub fwjchim kom mus ua timkhawv rau lwm tus los ntseeg thiab ua haujlwm rau tus Tswv (Tes Haujlwm 1:8). Qhov tseeb, xyov peb puas siv Vajtswv tej cuabyeej los daws teebmeem hauv pawg ntseeg thiab twb hau nrog tej yam kev tawm tsam pawg ntseeg lawm tsis tau xwb. Yog peb tsuas vam khom rau sab nqaij tawv los ua rog rau sab ntsujplig, tsuas sib txeeb kom muaj yeej swb xwb, ces yuav daws tsis tau teebmeem thiab tsis ua rau Vajtswv tau ntsejmuag.
Thov Vajtswv,
Vajtswv ntuj! Ua Koj tsaug uas Koj pub rau nyuam yaus muaj yam cuabyeej sab ntsujplig. Thov pab kom nyuam yaus paub siv tej cuabyeej uas tus Tswv pub los tawm tsam Dab Ntxwjnyoog, txhob siv cuabyeej sab nqaij tawv los tawm tsam. Amees.
Peb puas kheev siv tej cuabyeej sab nqaij tawv los sib txeeb, sib tawm tsam hauv pawg ntseeg?
Nyeem Vajluskub hauv peb lub xyoo: Mathais 26:26-68
Kênh Youtube BHKTHN:
