II Pêtrôs 2:17-22
“Lu bơngai noh dang ei jing ưh kơ yua, thoi lĕ kơ đak ưh pă ro đơ̆ng tu sư boih; lu sư thoi hơmơ̆l păr tơ rơwơ̆ng kial dơhlu jơ̆p-jang. Thoi noh ‘Bok Kei-Dei wă phak lu sư, ăn kơ lu sư oei tơ anih măng mu, yua kơ lu sư jing bơngai ưh pă yua bơih.” (II Pêtrôs 2:17)
Nơ̆r jet tơchĕng pơwao:
– Pêtrôs yua lu rup kiơ wă pơtih kơ tơdrong lu thây bơtho păng lu bơngai khan lê̆ adrol hơlĕnh pơdăr?
– Lu sư hơlĕnh pơdăr noh thoi yơ ‘nei?
– Nơ̆r Kră Yang tơbăt kơ bơ̆n wă kơ bơ̆n kơchăng kơplah bơ̆n mơ̆ng đe bơtho tơdrong lui, tơdrong gah bơhngol?
Pêtrôs jơ̆ng ‘bang Kră Yang, sư yua ‘bar tŏ rup pơdah ‘bơm kơ đak yua kơ đak ‘noh kăl dêh hăm kon pơlei tơ dêh gah hơlĕch kơ char Isơrael (Trung Đông) phang ang hrĕng kro,dah đei đak lei gơh arih, dah ưh lei gô răm.Tơplơ̆ hăm Kră Yang Yêsu Sư tu đak sĭt tơpă (Yôhan 4:13-14), “tơdrong lui chroih”mă lu thây bơtho păng lu bơngai khan lê̆ adrol hơlĕnh, lu sư bơtho noh pơm ăn hơmĕng ngôi tơdrong kơ đei, noh thoi “lu glung ưh kơ đei đak”. Tơdrong lu sư bơtho noh nhen thoi sơlŭng đak lăm char glă ‘bĕnh kơ tơdrong pơkă pơ’ngam, mă-lei tơpă sư noh sơlŭng hrĕng kro ưh kơ đei đak, pôm ba ăn lu bơngai mă chang hơmĕng đơ̆ng tơdrong lu sư bơtho noh jing pă đei hơmĕng kiơ. ’Bok Pêtrôs kư̆m pơtih tơdrong lu thây bơtho păng lu bơngai khan lê̆ adrol bơtho noh nhen thoi “lu hơmơ̆l kial tơthu jăng păr hiong hach tơ nai.” Mưh lu bơngai jang mir ‘ba, lu sư hlôi rei bơih adrĕch ‘ba tơ mir na, lu sư chang dêh kơ đak ‘mi jruh ruh chŭn mir ‘ba lu sư. Mă-lei lu sư đĭ puh đe hơlĕnh pơdăr lu sư bơih, yua kơ ‘noh lu hơmơ̆l măng mu đĕch păng đei kial tơthu jăng tĕnh hrĕnh păr hiong hach tơ nai, pơm kơ lu sư pă đei hơmĕng kiơ.
Lu thây bơtho păng lu bơngai khan lê̆ adrol hơlĕnh, lu sư yua “lu nơ̆r ‘bơ̆r pơma hiôk rơngơp, pơma rŏ rŏ mă-lei ưh kơ tơpă (trong 18), wă khan “lu nơ̆r pơma pơang tơdrong kơ đei”, wă hơlĕnh pơdăr lu bơngai mă mơ̆ng lu sư bơtho noh. Lu sư pơhlŭ pơlung đe wă kơ đe put kơ lu sư noh, lu sư pơhlŭ hăm tơdrong lui ngeh kơdih akâu, mă tơpă noh lu sư pơang; lu sư kư̆m pơhlŭ hăm nơ̆r pơkă pơ’ngam rŏ rŏ mă-lei kơbĭ kiơ păng tơdrong kơ đei; ưh kơ đei tơdrong arih mă-lei ba ăn lu bơbgai mơ̆ng năm tơ anih mă ‘Bok Kei-Dei hil phak. Dang ei đei lơ bơngai grê gah chơchă wă kơ đei lu tơdrong mơn plơ̆ng ‘nao, hlĭch hlêng. Lu sư khan tơdrong hŏk pơhrăm păng chu yom pơm kiơ̆ nơ̆r ‘Bok Kei-Dei noh sơ̆ đĕch dang ei pă yua bơih, kư̆m khan lu bơngai pơhrăm, pơm kiơ̆ nơ̆r Kră Yang noh lu bơngai kơhlôh,lu bơngai pơm ‘mong kơ đe, lu bơngai ưh kơ rơhau.
Lu thây bơtho hơlĕnh noh, lu sư grê gah wă kơ mơn đei tơdrong plơ̆ng ‘nao, hlĭch hlêng noh păng lu sư ngăl hơlĕnh pơdăr, pơrơi jơhngơ̆m đe, nơ̆r pơma pran pơm kơ đe lui ngeh kơ ‘bơ̆r nơ̆r lu sư noh, mă-lei ưh kơ đei hơnă tơm kơjăp đơ̆ng Nơ̆r ‘Bok Kei-Dei. Tơtil kơ ‘noh,lu bơngai khan lê̆ adrol hơlĕnh păng lu thây bơtho hơlĕnh, lu sư oei tơlĕch nơ̆r ‘bơ̆r pơma pơkă pơ’ngam gah tơdrong rơngei, mă-lei ưh kơ trŏ rơngei klaih đơ̆ng tơdrong yoch ôh, mă-lei rơngei lăm tơdrong pơm yoch păng rơngei lăm tơdrong pơm kiơ̆ kơdih wă (trong 19). ’Bok Krist hlôi pơklaih, ăn kơ bơ̆n rơngei đơ̆ng Tơdrong Juăt mă kon bơngai chă tơchĕng noh, mă-lei tơdrong ‘mêm mơnat ‘Bok Kei-Dei tam lah ăn kon bơngai pơm yoch, kư̆m ưh kơ ba bơ̆n wơ̆t pơm đĭch kơ Tơdrong Juăt (Rôm 6:1-2). Lu thây bơtho hơlĕnh noh, ‘bơ̆t lu sư pơklah lê̆ tơdrong ‘mêm mơnat Kră Yang noh pha,nơ̆r sĭt Kră Yang noh pha, lu sư pơm thoi noh lu sư hlôi hmĕt peng pong lê̆ đon lui Lu Bơngai Lui jing thoi rup kơnê̆ krưp. Mưh minh ‘nu bơngai nŏng kơ wă weh đơ̆ng‘Bok Kei-Dei păng weh đơ̆ng Khôi Juăt Sư,bơngai noh ưh kơ layơ mơn đei tơdrong rơngei tơpă, kơnê̆ hloh dơ̆ng,lu sư gô jing đĭch kơ tơdrong sĕch akar kơdih’maih wă. Bơ̆n athei arih hăm Nơ̆r Kră Yang wă kơ Yang Bơhngol ‘Lơ̆ng pơchrang hơdah, dŏng tơgŭm bơ̆n huay kơ puh pơ̆k đe hơlĕnh pơdăr bơtho tơdrong lui chroih.
Kơkuh kơ Ih Kră Yang, inh bơnê kơ Ih ăn bơih kơ inh nơ̆r Ih Nơ̆r Arih Ling-lang, tơ̆k pơchrang, chông anhăk bơtho tơ’bôh păng ‘me rong tơdrong arih bơhngol inh. Inh đĭ jơhngơ̆m arih kiơ̆ kơ Nơ̆r Ih.Krao khan yua Anăn Kră Yang Yêsu Krist, Amen!
Bơ̆n hăm đĭ jơhngơ̆m arih kiơ̆ Nơ̆r Kră Yang chông anhăk bơtho tơ’bôh lăm tơdrong mơnat dŏng pơklaih wă huay kơ puh pơ̆k tơdrong pơhlŭ pơlung hơlĕnh pơdăr noh ưh?
Đŏk Sơ̆p hla bơar ‘Bok Kei-Dei lăm pêng sơnăm:Nêhêni 4.
Kênh Youtube BHKTHN:
