Phau Ntawv Nkauj 116:1-2
Nqe cim:
“Kuv hlub tus TSWV, vim nws hnov kuv tej lus;nws mloog kuv tej lus thov.” (Phau Ntawv Nkauj 116:1).
Lus nug rau sawvdaws xav:
– Yam dabtsi ua rau tus sau hlub tus Tswv?
– Vajtswv “tig ntsej mloog” muaj lub ntsiab li cas?
– Zeem paub qhov no txhawb peb zog li cas hauv kev ntseeg?
Phau Ntawv Nkauj 116 nyob rau ntu cov Nkauj Qhuas Vajtswv ntawm Ntawv Nkauj 113-118, thiab yog zaj nkauj uas tau nyeem nyob hauv cov neeg Yudais pluas noj ua Kevcai Hla Dhau. Coob tus saib tshooj Ntawv Nkauj no yog ib zaj nkauj zoo tshaj plaws thiab zoo npaum li Ntawv Nkauj 23.
Tus sau pib qhov xubthawj los ntawm kev qhia tshwm nws lub siab “Kuv hlub tus TSWV, vim nws hnov kuv tej lus”. Vajtswv tus uas tsim ib puas tsav yam tig ntsej mloog tus neeg uas me kawg nkaus hauv txhua yam Vajtswv tsim los nyob rau hauv lub qab ntuj khwb uas loj kawg nkaus no, qhov no coj tus sau mus sib raug zoo nrog Vajtswv. Txawm ib tug vajntxwv zoo li Daviv los kuj xav tsis thoob thaum uas paub hais tias Vajtswv tau los kiag nrhiav tibneeg thiab mloog lawv tej lus thov (Phau Ntawv Nkauj 8:4).
Vajtswv tsis yog hnov xwb, tiamsis tseem “tig ntsej mloog kuv”. “Tig ntsej mloog” muaj lub ntsiab “khoov qis” lossis “tig mus rau ib sab” yog hais txog kev ua tib zoo mloog thiab mloog rawv tus uas hais vim hmov tshua. Tus uas “tig ntsej mloog” yog tus Tswv, Tus ibtxwm muaj nyob, thiab yog Tus uas tsim ib puas tsav yam. Tus Tswv “tig ntsej mloog” ib tug neeg ua me kawg nkaus! Nws yog tus paub txhua yam thiab muaj peev xwm hnov thiab paub peb tej kev xav thiab tej lus uas peb hais (Ntawv Nkauj 139:4), tiamsis qhov uas Nws “tig ntsej mloog kuv” qhia meej hais tias Nws hlub peb, hmov tshua, ua tib zoo mloog kom paub tej uas peb tabtom ntsib thiab ua siab ntev rau peb.
Hauv lub neej uas muaj kev tabkaum ntau niaj hnub nim no, feem ntau peb tsis muaj sijhawm txaus los mloog cov neeg peb hlub tej lus hais, thiab ntau zaus peb tus kheej los tsis pom muaj leejtwg tig los mloog peb txoj kev ntshaw thiab kev xav. Tiamsis tus uas sau tshooj Ntawv Nkauj no tau saj Vajtswv txoj kev hmov tshua tshwjxeeb lawm, vim Vajtswv mloog nws tej lus, paub tej uas nws tabtom ntsib thiab ua siab ntev rau nws. Hauv Ntawv Nkauj 116:10-11, tus sau hais txog qhov kev mob uas nws tau ntsib thaum muaj tej kev dag ntxias nyob thoob qhov txhua chaw, “Neeg sawvdaws dag ntxias xwb” (HMOWSV), txij ntawm cov neeg sab nraud los rau cov neeg nyob ze yus tshaj hauv pawg ntseeg, tiamsis thaum uas mob siab thiab tas kev cia cia siab tshaj plaws ntawd, tus sau tseem muaj ib Tug ua nws lub chaw cia siab, qhia nws tej kev xav ntawd yog Tus Tswv (nqe 1), Nws yog Vajtswv tus uas ncaj ncees muaj kev hlub thiab ibtxwm ua raws li Nws tej lus cog tseg lawm.
Zeem paub Vajtswv kev hlub hmov tshua, tab pov rau peb hais tias txawm txhua tus ua rau peb tas kev cia siab los Vajtswv yeej tsis ua, txhua tus yuav tig nraub qaum rau peb, hais phem, tawmtsam peb, ntsaws pob ntsej rau peb tiamsis Vajtswv tsis ua li ntawd; Nws tseem nyob ntawm peb, saib pom peb lub neej thiab tig ntsej mloog peb tej lus (Phau Ntawv Nkauj 27:10, 13). Yog li ntawd cia ua Vajtswv tsaug kawg siab kawg ntsws.
Thov Vajtswv,
Tus Tswv, nyuam yaus ua Koj tsaug uas Koj nrog nraim nyuam yaus nyob hauv txhua lub sijhawm. Thov pab nyuam yaus nyob rawv hauv Koj kev hlub no mus li. Nyuam yaus tuav Tswv Yexus Khetos lub npe thov, Amees.
Ib tsoom mloog uas hmov tshua,
Peb puas zeem paub Vajtswv ib txwm hlub tshua peb, mloog peb tej lus thov kom nco Nws txiajntsig thiab paub ua Nws tsaug?
Nyeem Vajluskub hauv peb lub xyoo: Yelemis 22
Kênh Youtube BHKTHN:
