Klei Aê Diê Blŭ: I Kôrantô 12:31 – 13:7
Êlan kliăng: “Diih mĭn kơ Klei Aê Diê Blŭ čih leh jing hơăi mang hĕ?, “Yang Mngăt Jăk, Aê Diê brei dôk hlăm drei khăp kơ drei tơl Ñu trih”” (Y-Yakơ 4:5)
Klei êmuh ksiêm mĭn: Ya jing “Klei brei yuôm hĭn” khua ƀĭng kna Y-Pôl čiăng lač? Ya jing ênoh yuôm leh anăn klei bi knăl kơ klei khăp mơ̆ng Yang Mngăt Jăk? Si drei dôk hdĭp tơdah leh hriăm thâo săng kơ klei tŭ gĭr leh anăn klei trih mơ̆ng Yang Mngăt Jăk?
Tơdah lač kơ Yang Mngăt Jăk, drei khăng bi mĭn kơ “klei brei myang” msĕ si dưi ngă klei yuôm bhăn, dưi blŭ klei hưn êlâo, dưi thâo kral phung yang mdê mdê, dưi blŭ lu klei tue mdê mdê, thâo mblang klei tue anăn… (I Kôrantô 12:10). Ƀiădah “klei brei yuôm hĭn” mơ̆ng Yang Mngăt Jăk jing klei khăp (êlan 31) kyuadah klei anei jing atur kơ jih jang klei brei myang. Klei Aê Diê Blŭ hưn mdah Yang Mngăt Jăk khăp kơ drei “tơl Ñu trih” tơdah ƀuh drei khăp kơ lăn ala: “Diih jing phung knhông yơh! Diih amâo thâo hĕ klei ngă mah jiăng hŏng lăn ala jing roh hŏng Aê Diê? … Diih mĭn kơ Klei Aê Diê Blŭ čih leh jing hơăi mang hĕ?, “Yang Mngăt Jăk, Aê Diê brei dôk hlăm drei khăp kơ drei tơl Ñu trih” (Y-Yakơ 4:4-5).
Klei khăp khua ƀĭng kna Y-Pôl čiăng lač tinei jing klei khăp Aê Diê amâo mâo klei čoh čuăn ôh hriê mơ̆ng Yang Mngăt Jăk: “…kyuadah klei Aê Diê khăp tuh leh hlăm ai tiê drei hŏng Yang Mngăt Jăk Pô Aê Diê brei leh kơ drei” (Rôm 5:5). Blŭ mdê hĭn, klei khăp anăn jing boh tŭ dưn tal êlâo hĭn tơdah mâo Yang Mngăt Jăk dôk hlăm klei hdĭp drei: “Ƀiădah boh mơ̆ng Yang Mngăt Jăk jing klei khăp …” (Galati 5:22), leh anăn “Ơ phung ayŏng adei, hŏng Khua Yang drei Yêsu Krist leh anăn hŏng klei khăp mơ̆ng Yang Mngăt Jăk, kâo kwưh kơ diih …” (Rôm 15:30). Yang Mngăt Jăk wăt jing kpă ênô leh anăn khăp msĕ si Aê Diê Ama.
Klei bi knăl tal êlâo hĭn kơ “klei brei yuôm hĭn” leh anăn brei bi mâo, jing klei khăp yơh. Tơdah amâo mâo ôh klei khăp, snăn jih jang klei brei mkăn knŏng jing “msĕ si čing bi ênai amâodah dang mñê”, “hơăi mang”, “amâo mâo klei tŭ dưn ôh” kơ drei. Klei khăp jing atur amâo dưi kƀah ôh kơ jih jang klei brei mkăn.
Klei bi knăl tal dua, hlăm jih jang klei brei, knŏng hjăn klei brei kơ klei khăp yơh ăt dôk nanao hlŏng lar: “Klei khăp amâo tuôm tuč ôh; ƀiădah klei hưn êlâo srăng tuč. Klei blŭ klei tue mdê mdê srăng ruê̆; klei thâo săng srăng êgao tuč.” (I Kôrantô 13:8). Yang Mngăt Jăk khăp kơ jih jang drei tơl kơ ênuk hlŏng lar!
Jih jang klei bi knăl adôk mkăn kơ klei khăp mơ̆ng Yang Mngăt Jăk brei ƀuh klei Ñu gĭr, klei pap brei, klei tŭ jih (êlan 7). Ƀiădah lĕ, klei anăn amâo djŏ jing mta klei brei drei dlăng hơăi mang kơ Ñu, bi ênguôt Ñu, bi rai klei Ñu khăp ôh. Hriăm thâo săng kơ klei tŭ gĭr, klei trih mơ̆ng Yang Mngăt Jăk mtrŭt drei khăp kơ Ñu hĭn, đup gưt kơ Ñu lu hĭn. Hmăng hmưi klei khăp Yang Mngăt Jăk bi êdah nanao hlăm klei hdĭp drei
Si klei khăp Yang Mngăt Jăk bi êdah hlăm klei hdĭp drei?
Wah lač: Ơ Yang Mngăt Jăk kâo khăp! Akâo Ih pap brei kơ kâo kyuadah lu blư̆ kâo khăp kơ lăn ala hĭn khăp kơ Ih. Kâo kmhal kơ klei soh lŏ wĭt kơ Ih. Akâo Ih đru kâo khăp kơ Ih lu hĭn, đup gưt kơ Ih lu hĭn čiăng kơ klei hdĭp kâo ba klei tŭ dưn kơ Khua Yang nanao. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Yôna 3-4
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail:elankleisitnik@gmail.com
Kênh Youtube BHKTHN:
