I Kôrintô 12:31-13:7
“Na tơdrong noh kư̆m thoi sơ̆p hla bơar ‘Bok Kei-Dei khan: “’Bok Kei-Dei ăn Yang Bơhngol ‘Lơ̆ng Sư oei lăm bơ̆n wei-lăng bơ̆n tơnăp dêh, wă kơ đe huay kơ tơgar iŏk bơ̆n.” (Yakơ 4:5)
Nơ̆r jet tơchĕng pơwao:
– “Tơdrong ăn đĕch tih hloh” mă ‘bok Pôl đei chih roi noh kiơ?
– Tơdrong ‘mêm Yang Bơhngol ‘Lơ̆ng đei tơdrong gĭt păng thoi yơ?
– Bơ̆n arih thoi yơ kơplah pơhrăm wă kơbăt gah tơdrong yua iŏk păng Yang Bơhngol ‘Lơ̆ng gar?
Kơplah đei chih roi kơ Yang Bơhngol ‘Lơ̆ng, lu bơ̆n ngăl tơchĕng kơ tơdrong “Sư ăn kơ bơngai âu gơh pơm tơdrong mơsêh; Sư ăn kơ bơngai to gơh pơtruh nơ̆r ‘Bok Kei-Dei. Sư kư̆m ăn kơ bơngai mơ’nah băt kơnăl kơ bơngai bu pơma yua kơ Yang Bơhngol ‘Lơ̆ng tơgŭm, bơngai bu ưh. Sư kư̆m đei ăn kơ bơngai mơ’nah gơh pơma nơ̆r hlĭch mă ưh kơ tam băt đơ̆ng sơ̆; Sư kư̆m ăn kơ bơngai nai gơh hlôh nơ̆r ‘noh wă kơ tơblơ̆ ăn kơ đe.” (I Kôrintô 12:10) mălei “apinh ‘Bok Kei-Dei ăn kơ bơ̆n tơdrong jang mă kăl yua ‘biơ̆” Yang Bơhngol ‘Lơ̆ng jơ̆ tơdrong ‘mêm (trong 31) nơ̆r ‘Bok Kei-Dei roi tơ’bôh Yang Bơhngol ‘Lơ̆ng ‘mêm kơ lu bơ̆n “ding mah gar ‘mêm ‘bôh lu bơ̆n ‘mêm kơ ala teh: “Iĕm pơm thoi noh, thoi lĕ kơ bơngai drŏ-kăn kơđang kơ̆l ako klo sư, na jing ‘mêm kơ bơngai mă ayăt kơ klo sư dơ̆ng. Iĕm ưh tam băt ôh hă, dah iĕm ‘mêm kơ tơdrong ala teh iĕm dang ayăt kơ ‘Bok Kei-Dei? Thoi noh bơngai bu oei ‘mêm kơ tơdrong ala teh, bơngai noh ayăt kơ ‘Bok Kei-Dei boih. Na tơdrong noh kư̆m thoi sơ̆p hla bơar ‘Bok Kei-Dei khan: “’Bok Kei-Dei ăn Yang Bơhngol ‘Lơ̆ng Sư oei lăm bơ̆n wei-lăng bơ̆n tơnăp dêh, wă kơ đe huay kơ tơgar iŏk bơ̆n.” (Yakơ 4:4-5).
Tơdrong ‘mêm mă ‘bok Pôl đei chih roi lăm âu jơ̆ tơdrong ‘mêm ‘Bok Kei-Dei mă thoi yơ hĭ đơ̆ng Yang Bơhngol ‘Lơ̆ng: “ Bơ̆n băt kơ tơdrong bơ̆n chang gô noh ưh kơ jor ôh, yua kơ ‘Bok Kei-Dei ăn kơ bơ̆n Yang Bơhngol ‘Lơ̆ng Sư, na Yang Bơhngol ‘Lơ̆ng Sư ăn kơ bơ̆n băt ‘Bok Kei-Dei ‘mêm kơ bơ̆n tơpă.” (Rôm 5:5) pơma pha ‘biơ̆, tơdrong ‘mêm noh blŭng a kơplah Yang Bơhngol ‘Lơ̆ng oei hơdai lăm chăl arih bơ̆n: “Mă-lei Yang Bơhngol ‘Lơ̆ng dŏng bơ̆n na bơ̆n băt ‘mêm kơ ‘Bok Kei-Dei păng băt ‘mêm kơ bôl buăl, jơhngơ̆m bơ̆n hiôk chơt, bơ̆n oei hiôk hơiă hăm ‘Bok Kei-Dei păng bôl buăl; đe areh kơ bơ̆n, bơ̆n hreh đĕch; bơ̆n jing jơhngơ̆m dim iơ̆m, bơ̆n bơngai hơlăng păng băt tơgŭm đe, bơ̆n pơm ‘blep trŏ kơ nơ̆r bơ̆n pơkă;” (Galati 5:22) păng “Ơ lu ‘nhŏng oh, yua kơ bơ̆n lui kơ Kră Yang bơ̆n Yêsu Krist păng yua kơ Yang Bơhngol ‘Lơ̆ng ăn kơ bơ̆n đei đon ‘mêm mơnat dih băl tơduă bơ̆n bơngai lui, na inh apinh iĕm adrin krao khan kơ ‘Bok Kei-Dei tơgŭm inh hŏ,” (Rôm 15:30). Yang Bơhngol ‘Lơ̆ng tơbăt păng ‘mêm mơnat thoi ‘Bok Kei-Dei ‘Bă.
Tơdrong mă blŭng a “bơ̆n athei apinh ‘Bok Kei-Dei ăn kơ bơ̆n tơdrong jang mă kăl yua ‘biơ̆” păng kăl kơ đei noh tơdrong ‘mêm, dah ưh kơ đei tơdrong ‘mêm mă bơ̆n gơh pơm dôm tơdrong nai hĭ kư̆m” lei ‘bơ̆r inh pơma noh thoi lĕ kơ jơ wa đe teh teng păng jơ wa tŏk-rŏk đĕch, “ưh kơ yua kiơ” ding mah “pă yua kiơ” kơ bơ̆n. Tơdrong ‘mêm jơ̆ hơnă kăl kơ đei lăm dôm tơdrong nai.
Tơdrong mă ‘bar, lăm dôm tơdrong bơ̆n gơh pơma minh tơdrong ‘mêm đĕch oei oei ling lang ưh kơ la-yơ tôch: “Bơngai bu ‘mêm kơ ‘Bok Kei-Dei hăm bôl buăl sư, sư ‘mêm tơpă ling lang ưh kơ layơ tôch. Mă-lei gah tơdrong pơtruh nơ̆r ‘Bok Kei-Dei, ning-mônh gô tôch, yua kơ dang ei ‘Bok Kei-Dei ăn lu bơngai pơtruh nơ̆r Sư, mă-lei ning-mônh ưh pă kăl boih. Ahrei âu Sư ăn kơ lu mơ’nah gơh pơma nơ̆r hlĭch mă đe ưh kơ hlôh wă ư-ang kơ ‘Bok Kei-Dei, mă-lei ning-mônh ưh pă yua boih. Dang ei ahrei âu Sư ăn kơ lu mơ’nah gơh hlôh wao tơdrong Sư nhên wă kơ gơh bơtho đe, mă-lei ning-mônh ưh pă kăl boih.” (I Kôrintô 13:8). Yang Bơhngol ‘Lơ̆ng ‘mêm kơ đĭ đăng lu bơ̆n ling lang.
Dôm tơdrong Yang Bơhngol ‘Lơ̆ng đei tơbăt noh Kră Yang oei hreh mă đe pơm kơnê̆, băt mơnat păng pŭ iŏk (trong 7), mă khan lei ră noh ưh kơ trŏ tơdrong bơ̆n wă pơjăm Kră Yang, pơm kơ Sư sơ’ngon, pĭt lê̆ tơdrong ‘mêm Kră Yang, pơhrăm iŏk gah tơdrong chu pŭ, tơdrong gar Yang Bơhngol ‘Lơ̆ng pơm kơ bơ̆n rai ‘mêm kơ Kră Yang hloh, chu yom Kră Yang hloh. Hơpơi tơdrong ‘mêm Yang Bơhngol oei hơdai lăm chăl arih lu bơ̆n.
Ơ Yang Bơhngol mă ‘mêm kơ eng! Apinh Ih mơnat kơ inh yua kơ lơ wơ̆t inh oei ‘mêm tơ ala teh âu tơplih kơ ‘mê kơ Ih, inh apĭnh tơbral wih brŏk tơ Ih. Apinh ih tơgŭm inh ‘mêm kơ ih rai hloh, chu kiơ̆ Ih lơ hloh dơ̆ng wă kơ chăl arih inh đei yua kơ Kră Yang. krao khan yua anăn Kră Yang Yêsu Krist, Amen.
Tơdrong ‘mêm Yang Bơhngol ‘Lơ̆ng oei lăm chăl arih lu bơ̆n thoi yơ?
Đŏk sơ̆p hla bơar nơ̆r ‘Bok Kei-Dei lăm pêng sơnăm: Jôna 3-4
Kênh Youtube BHKTHN:
