Kalatias 6:1; Yauhas 8:1-11
Nqe cim:
“Cov kwvtij, yog nej pom ib tug ua txhaum nej cov uas muab siab rau ntseeg, nej yuav tsum ua tib zoo ntuas tus ntawd kom nws rov qab los ua zoo. Tiamsis thaum nej yuav mus ntuas nws, nej yuav tsum ceevfaj, nyob tsam nej yuam kev nrog nws mus ua txhaum thiab.” (Kalatias 6:1)
Phau Txhais Tshiab HMOWSV
“Cov kwvtij, yog nej pom leejtwg ua txhaum yam twg nej cov uas nyob sab ntsuj plig cia li ua lub siab mos siab muag pab tus ntawd kom rov xyaum dua. Thiab nej yuav ceev faj txog nej tus kheej ntshai tsam ces nej raug ntxias ua txhaum thiab.”
Lus nug xav:
– Tus neeg uas nyob sab ntsujplig yuav muaj lub siab licas rau tus neeg ua txhaum?
– Cov neeg coj kevcai yuav muaj lub siab licas?
– Lub homphiaj ntawm ob hom neeg no yog dabtsi?
– Peb pom peb tus kheej zoo li leejtwg?
Ib yam uas ua rau muaj kev tu siab sab ntsujplig thiab rhuav tshem Pawg Ntseeg tshajplaws, ntawd yog txojkev xav siab dhau txog Pawg Ntseeg. Muaj ib txhia ntseeg tu ncua kev sib raug zoo nrog cov ntseeg thiab qaug zog sab ntsujplig thaum lawv xav yuamkev hais tias Pawg Ntseeg hauv ntiajteb no yog ib lub koomtxoos uas zoo txhij zoo txhua; lawv tsis txais yuav qhov tseeb hais tias Tswv Yexus lub Pawg Ntseeg yog ib lub koomtxoos ntawm cov neeg txhaum uas tau txais Vajtswv txojkev hlub tshua thiab sawvdaws tabtom nyob ua ke hauv txojkev hlub tshua ntawd, tsis hais ib tug tseem ua tej yam txhaum rau tug.
Pawg Ntseeg yeej niaj hnub muaj tej yam uas tsis tau zoo txaus thiab yuamkev, cov ntseeg txawm yog kev ntseeg loj npaum twg los yeej muaj lub sijhawm ua txhaum (I Yauhas 1:8, 10). Cov neeg coj raws kevcai yuav niaj hnub tshawb, nrhiav lwm tus tej kev txhaum tsis hais tej uas tsis yog txhob txwm ua coj los txiav txim, txo qis, ua kom luag raug txajmuag, kom lwm tus qhuas txog yus tus kheej. Tiamsis tus neeg uas “muaj Vaj Ntsujplig”, tus neeg uas nyob sab ntsujplig, tus neeg uas mus raws Vaj Ntsujplig coj, puv npo Vaj Ntsujplig thiab qhia tshwm Vaj Ntsujplig cov txiv (Kalatias 5:22), txawm yog niaj hnub pom luag tej kev txhaum, los lawv yeej cia Vaj Ntsujplig txojkev hlub thiab lub tswvyim siv lawv tus kheej mus pab tus neeg ntawd hloov siab thiab tig rov los hauv tus Tswv txoj koob hmoov hlub.
Thaum cov Falixais thiab cov xibhwb qhia kevcai ntes tau ib tug ntxhais uas deev hluas nraug, lawv coj tus ntxhais ntawd mus cuag Tswv Yexus tamsid kom muab pob zeb ntaus tuag raws li Mauxes txoj kevcai, thiab lawv kuj siv zaj no los nrhiav lus xaub Tswv Yexus kom lawv thiaj liam txim tau rau Nws (Yauhas 8:1-11). Hais tau hais tias, tej uas zais tom qab tes haujlwm uas zoo li raug cai heev thiab raug kev ntseeg heev no, ho yog ib lub siab thiab kev xav uas tsis muaj kev hlub, khav txiv, thiab puv nkaus txojkev dag. Ntawm ntawm no, Tswv Yexus, Tus uas puv npo Vaj Ntsujplig (Lukas 3:22; 4:1), tau qhia pom hais tias txawm yog Nws yeej paub tus ntxhais no ua txhaum (Yauhas 8:11), los yam uas Nws mob siab txog tsis yog kev rau txim thiab tua pov tseg, tiamsis yog kev pab kom tus ntxhais no tsis txhob ua txhaum ntxiv lawm. Qhov no kuj yuav tsum yog lub siab uas cov neeg raws Tswv Yexus qab tsimnyog muaj rau cov neeg uas tsis txhob txwm ua txhaum (nqe 1). Kws Xibhwb R. C. Sproul tau hais tias: “Qhov tseemceeb kawg yog yuav tsum muaj ib txojcai siab txog kev ua neej nyob hauv Pawg Ntseeg, tiamsis qee zaug qhov no yuav coj mus rau ntau yam teebmeem, yog tias peb tsis ceevfaj rau nqi siab rau tus Tswv txoj koob hmoov thiab txojkev hlub tshua. Thov tus Tswv pab kom peb tsis txhob cia tej kev dawbhuv los ua kev tu ncua txojkev hlub tshua hauv Pawg Ntseeg.”
Thov Vajtswv,
Tus Tswv e! Thov pab kom nyuam yaus niaj hnub ua lub neej mus raws qhov kaj thiab dawbhuv ntawm Vaj Ntsujplig, thiab niaj hnub ua zoo rau lwm tus hauv txojkev hlub tshua uas nyuam yaus tau txais ntawm Koj. Nyuam yaus tuav Tswv Yexus Khetos lub npe thov, Amees.
Peb nplooj siab rau tus neeg txhaum raws li txoj kevcai lossis txojkev hlub tshua?
Nyeem Vajluskub hauv peb lub xyoos: Mikhas 1
Kênh Youtube BHKTHN:
