Klei Aê Diê Blŭ: Klei Mmuñ Hđăp 116:1-2
Êlan kliăng: “Kâo khăp kơ Yêhôwa kyuadah Ñu hmư̆ leh asăp kâo leh anăn klei kâo kwưh.” (Klei Mmuñ Hđăp 116:1)
Klei êmuh ksiêm mĭn: Ya klei pô čih khăp kơ Khua Yang? Si mblang klei Aê Diê “mđing knga”? Thâo săng klei anei si klei bi mđĭ ai drei êbat ktuê êlan klei hdĭp myang?
Klei Mmuñ Hđăp 116 dưm mbĭt hlăm dŭm Klei Mmuñ Hđăp kơ Klei Bi Mni dơ̆ng mơ̆ng Klei Mmuñ Hđăp 113-118, leh anăn jing Klei Mmuñ Hđăp pioh răk dlăng hlăm Knăm Ƀơ̆ng Klei Găn hlue si klei bhiăn phung Israel mơ̆ng đưm. Lu mnuih yap Klei Mmuñ Hđăp anei jing sa hlăm lu Klei Mmuñ Hđăp prŏng hĭn leh anăn mđơr hŏng Klei Mmuñ Hđăp 23.
Pô čih kčưm dơ̆ng hŏng klei hưn mdah ai tiê ñu “Kâo khăp kơ Yêhôwa kyuadah Ñu hmư̆ leh asăp kâo leh anăn klei kâo kwưh”. Hŏng klei Pô Hrih Mjing mđing hmư̆ kơ mnơ̆ng Ñu hrih mjing điêt dhiêt ti krah jih lăn adiê prŏng prĭn anei yơh, atăt ba pô čih mŭt hlăm klei bi mguôp hŏng Aê Diê. Wăt tơdah jing sa čô mtao msĕ si Y-Đawit, ñu ăt bi kngăr mơh tơdah thâo kral klei sĭt nik anei, Aê Diê pô yơh hriê duah leh anak mnuih leh anăn mđing hmư̆ klei digơ̆ wah lač (Klei Mmuñ Hđăp 8:4).
Aê Diê amâo knŏng hmư̆ ƀiădah wăt “Ñu mđing leh knga Ñu kơ kâo”. “Mđing knga” mblang jing “kkui dlăng”amâodah “wir phă sa nah tĭng” čiăng lač kơ klei mđing uêñ tơdah pô dôk hmư̆ čiăng hmư̆ bi nik klei pô blŭ. Pô “mđing knga” jing Yêhôwa, jing Pô Jing, Pô dôk nanao hlŏng lar, Pô hrih mjing jih jang mnơ̆ng. Yêhôwa “mđing knga” čiăng dôk hmư̆ klei sa čô mnuih điêt dhiêt! Aê Diê jing Pô thâo jih Ñu hmư̆ jih leh anăn ƀuh jih ya klei hlăm klei mĭn leh anăn klei blŭ drei (Klei Mmuñ Hđăp 139:4), ƀiădah klei Ñu “mđing leh knga Ñu kơ kâo” čiăng kñăm kơ klei Ñu khăp kơ drei, mđing uêñ, dôk hmư̆, thâo jih ya klei drei dôk găn, leh anăn thâo săng kơ drei.
Hlăm klei hdĭp bŏ hŏng klei gun kpăk hruê anei, lu blư̆ drei amâo djăp mmông dôk hmư̆ phung hlăm sang drei blŭ ôh, leh anăn drei pô msĕ mơh, duah kăn ƀuh rei pô dôk hmư̆ drei čiăng hưn klei rŭng ênguôt hlăm ai tiê klei mĭn drei. Ƀiădah pô čih thâo kral klei mđing uêñ yuôm mdê mơ̆ng Aê Diê kyua Aê Diê mđing hmư̆ ñu nanao, thâo jih ya klei ñu dôk tlă anăp leh anăn thâo săng brei kơ ñu. Hlăm Klei Mmuñ Hđăp 116:10-11, pô čih lač kơ klei ñu knap mñai snăk tơdah ƀuh klei luar dôk lar tar ƀar anôk, “jih jang mnuih jing phung luar” dơ̆ng mơ̆ng êngao, hlăm ala ƀuôn hlŏng truh kơ phung jĕ giăm hĭn, hlăm phung ƀuôn sang Aê Diê, leh anăn hlăm klei knap mñai rŭng răng anăn yơh, pô čih ăt mâo sa čô Pô ñu đăo knang, kăp blŭ hrăm, jing Yêhôwa (êlan 1), Ñu jing Aê Diê klei khăp sĭt suôr, djă pioh nanao klei bi mguôp.
Thâo kral klei Aê Diê khăp mđing uêñ, rơ̆ng kơ drei snei, wăt tơdah drei luč klei čang hmăng hŏng jih jang mnuih, ƀiădah klei anăn amâo mâo hŏng Aê Diê ôh; Jih jang mnuih năng ai wir rŏng kơ drei, blŭ jhat kơ drei, bi kdơ̆ng hŏng drei, kăt ƀăng knga kơ drei, ƀiădah klei anăn amâo mâo ôh hŏng Aê Diê. Ñu ăt dôk tinăn, ƀuh jih klei hdĭp drei, mđing knga kăp čiăng hmư̆ drei (Klei Mmuñ Hđăp 27:10, 13). Brei drei jih ai tiê hdơr knga bi mni kơ Khua Yang.
Si ngă drei thâo kral mơ̆ Khua Yang dôk mđing hmư̆ drei nanao, čiăng kơ drei thâo hdơr knga bi mni kơ Ñu?
Wah lač: Ơ Khua Yang, bi mni kơ Khua Yang kyua Ih dôk mbĭt hŏng kâo nanao hlăm jih jang boh klei truh kơ klei hdĭp kâo. Brei kâo dôk giăm Khua Yang nanao hlăm klei bi mguôp klei khăp anei. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Yêrêmi 22
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
