I Kauleethaus 12:31 – 13:7
Nqe cim:
“Tus ntsuj plig uas Vajtswv pub nyob rau hauv peb khib xeeb heev kawg” (Yakaunpaus 4:5 HMOWSV)
Lus nug xav:
– “Zaj uas zoo tshaj tej ntawd huv tibsi” uas Timthawj Paulus hais txog yog dabtsi?
– Vaj Ntsujplig txojkev hlub muaj nqis thiab muaj mojyam licas?
– Peb ua lub neej licas thaum peb kawm paub txog kev ua siab ntev tiv thiab kev khib xeeb ntawm Vaj Ntsujplig?
Thaum hais txog Vaj Ntsujplig, peb feem ntau pheej xav txog tej “koob hmoov sab ntsujplig” xws li ua txujci tseemceeb, cevlus, feeb meej cov ntsujplig, hais lus txawv txawv, thiab txhais cov lus ntawd… (I Kauleethaus 12:10). Tiamsis “zaj uas zoo tshaj tej ntawd huv tibsi” ntawm Vaj Ntsujplig yog txojkev hlub (nqe 31) vim qhov no yog lub hauv paus ntawm txhua yam koob hmoov sab ntsujplig. Vajluskub qhia hais tias Vaj Ntsujplig hlub peb mus txog qib uas “khib xeeb heev kawg” thaum Nws pom peb hlub lub ntiajteb, raws li Vajtswv Txojlus hais tias: “Nej cov neeg fav xeeb, nej tsis paub tias qhov uas nrog ntiajteb ua kwvluag twb nrog Vajtswv ua yeeb ncuab lov?… Nej xav tias qhov uas Vajtswv txojlus hais tias: ‘Tus ntsuj plig uas Vajtswv pub nyob rau hauv peb khib xeeb heev kawg,’ tsis muaj qabhau lov?” (Yakaunpaus 4:4-5 – HMOWSV).
Txojkev hlub uas Timthawj Paulus hais txog hauv no yog Vajtswv txojkev hlub pub dawb dhau los ntawm Vaj Ntsujplig, raws li Vajtswv Txojlus qhia hais tias: “…rau qhov Vaj Ntsujplig tus Dawbhuv uas Vajtswv twb pub rau peb lawm, qhia rau peb hais tias Vajtswv hlub peb kawg li” (Loos 5:5). Txhais tau hais tias, txojkev hlub ntawd yog thawj yam tshwm muaj thaum Vaj Ntsujplig nyob nrog nraim hauv peb lub neej: “Vaj Ntsujplig yuav ua rau neeg muaj lub siab sib hlub…” (Kalatias 5:22), thiab “Cov kwvtij, vim peb cov uas ntseeg peb tus Tswv Yexus Khetos thiab vim Vaj Ntsujplig twb ua rau peb txawj sib hlub lawm, yog li ntawd kuv thov nej kub siab lug thov Vajtswv pab kuv.” (Loos 15:30). Vaj Ntsujplig niaj hnub ncaj ncees thiab hlub tshua ib yam li Vajtswv Vaj Leej Txiv.
Yam xubthawj thiab yuav tsum raug muaj ntawm “zaj uas zoo tshaj tej ntawd huv tibsi” yog txojkev hlub. Yog tsis muaj txojkev hlub, txawm yuav muaj lwm yam koob hmoov los kuj “zoo li tej suab tswb tooj tswb hlau uas nrov nrov xwb”, “tsis muaj nqis dabtsi hlo li”, thiab “tsis muaj qabhau dabtsi” rau peb. Txojkev hlub yog hauv paus ntawm lwm yam koob hmoov ntag.
Yam thib ob, nyob hauv cov koob hmoov sab ntsujplig, tsuas yog txojkev hlub thiaj nyob mus ibtxhis tsis puas tsuaj: “Txojkev hlub yuav nyob mus ibtxhis. Tiamsis cov uas txawj qhia Vajtswv txojlus, lawv tsuas qhia ib ntus xwb, cov uas txawj hais lus txawv txawv, lawv yuav tsis hais lawm thiab tej kev txawj ntse yuav ploj mus” (I Kauleethaus 13:8). Vaj Ntsujplig hlub peb txhua tus mus ibtxhis!
Lwm yam ntxiv ntawm Vaj Ntsujplig txojkev hlub qhia pom txog Nws kev nyiaj taus txhua tsav yam, ua siab ntev thiab zam txim mus li (nqe 7). Tiamsis, qhov ntawd tsis yog lajthawj kom peb saib tsis taus Nws, ua rau Nws tu siab, lossis tsis quav ntsej Nws txojkev hlub. Thaum kawm paub txog kev ua siab ntev thiab kev khib xeeb ntawm Vaj Ntsujplig ua rau peb hlub Nws, nyob hauv Nws txojkev tswjhwm heev dua qub. Xav kom Vaj Ntsujplig txojkev hlub niaj hnub qhia tshwm hauv peb lub neej.
Thov Vajtswv,
Vaj Ntsujplig tus uas hlub thiab tshua! Thov zam txim rau nyuam yaus vim ntau zaus tau hlub lub ntiajteb heev dua hlub Koj. Nyuam yaus thov tso siab qub tseg rov qab los cuag Koj. Thov pab nyuam yaus hlub Koj ntau dua, nyob hauv Koj txojkev tswjhwm ntau dua, kom nyuam yaus lub neej niaj hnub muaj qabhau rau Koj. Nyuam yaus tuav Tswv Yexus Khetos lub npe thov, Amees.
Vaj Ntsujplig txojkev hlub qhia tshwm hauv peb lub neej licas?
Nyeem Vajluskub hauv peb lub xyoos: Yaunas 3-4
Kênh Youtube BHKTHN:
