Pajlug 24:3-4
Nqe cim:
“Tus uas muaj tswvyim thiab txawj ntse, nws lub tsev yuav nyob ruaj khov. Yog muaj kev txawj ntse, ces muaj tej rooj tog uas zoo nkauj thiab muaj nqis nyob hauv tsev.” (Pajlug 24:3-4)
Lus nug rau sawvdaws xav:
- Muab piv rau Pajlug 3:19, ob nqe Pajlug hnub no qhia peb txog yam dabtsi?
- Lo lus “tsev” tseem muaj lwm lub ntsiab licas? Lub plag rau ib tsev neeg ntseeg yuav tsum txhim tsa li cas?
- Peb yuav tsum ua dabtsi los pab kom tsev neeg nyob ruaj khov thiab vammeej?
Tsev neeg yog ib pab pawg tseemceeb uas Vajtswv tau tsim txij thaum chivkeeb los, tseem xub muaj ua ntej tej nroog, tej nom tswv, thiab tej tuam tsev. Pajlug 24:3 sib txuas ua ke dhau ntawm ob lo lus “tswvyim” thiab “txawjntse”. Qhov no mus raws nraim li txheej txheem thaum Vajtswv tsim lub ntuj thiab lub ntiajteb: “Tus TSWV lub tswvyim tsim lub ntiajteb no; nws txojkev txawj ntse muab lub ntuj teeb nyob muaj chaw” (Pajlug 3:19). Yog li ntawd, ob nqe Pajlug uas peb kawm hnub no qhia pom hais tias lub tsev tau txhim tsa muaj “tej rooj tog uas zoo nkauj thiab muaj nqis nyob hauv tsev” qhia txog kev npluanuj, vammeej, tiamsis kev vammeej ruaj khov yuav tsum txhim tsa rau saum lub plag hwm tus Tswv, vim tus Tswv yog hauvpaus ntawm lub tswvyim: “Tus uas hwm tus TSWV, tus ntawd thiaj yog tus uas muaj kev txawj ntse” (Pajlug 1:7).
Nyob hauv lus Henplais, lo lus “tsev” tseem siv los hais txog lub cuabyig, caj ceg, lossis Pawg Ntseeg (Tes Haujlwm 18:8; Henplais 8:8…). Xws li Vajtswv coglus foom koob hmoov rau vajntxwv Daviv “tsev neeg” yog tias nws cov xeebntxwv hwm Vajtswv thiab coj raws li Vajtswv tej lus samhwm (II Xamuyees 7:16). Kev ruaj khov thiab kev vam meej ntawm caj ces tsis yog tsuas hais txog sab nqaij tawv xwb, tiamsis tseem hais txog sab ntsujplig. Yog ib tsev neeg tsis txhim tsa rau saum lub plag tswvyim uas tus Tswv taw qhia, txhais tau tias tsis kawm thiab tsis ua raws li tus Tswv tej lus ces zoo tsis txawv lub tsev txhim rau saum suab zeb, thaum nag los, dej nyab, cua hlob, lub tsev ntawd yuav pob puastsuaj tas (Mathais 7:24-27).
Niaj hnub nimno, dab Ntxwgnyoog tsom ntsees tua mus rau tej tsevneeg ntau tshaj yav dhau los. Nws siv txhua txoj hauv kev los ua kom tibneeg txo qis kev hlub, saib tsis taus kev cog lus, thiab tsis quavntsej txog qhov dawbhuv ntawm kev sib yuav. Tus Tswv cov menyuam yuav tsum tiv thaiv lawv tsevneeg kom tsis txhob raug Ntxwgnyoog dag ntxias. Yam cuabyeej muaj zog tshaj uas peb siv los tivthaiv thiab tawmtsam yog Vajtswv Txojlus. Tsev neeg yuav tsum kawm Vajtswv Txojlus, thov Vajtswv ua ke kom tau Vaj Ntsujplig pub tswvyim txawjntse. Peb kuj yuav tsum ceev faj txog tej kev xav phem thiab tej yeebncuab uas muaj cuabkav rhuav tshem peb tsev neeg. Txhua tus ntseeg yuav tsum nco ntsoov nyias tej lus cogtseg rau nyias tus txiv, tus niam thiab rau Tswv Yexus, thiab nco ntsoov tias Tswv Yexus yog lub plag ntawm tsev neeg. Peb yuav tsum nrhiav Vajtswv lub tswvyim kawg siab kawg ntsws kom txhim kho tau lub cuabyig ruaj khov, vam meej, thiab muaj kev kaj siab.
Thov Vajtswv,
Vajtswv uas muaj hwjchim loj, nyuam yaus ua Koj tsaug vim Koj yog tus Tswv ntawm nyuam yaus tsev neeg. Thov Vaj Ntsujplig pab nyuam yaus qaij deb dab Ntxwgnyoog kev dag ntxias, tas siab kawm Koj Txojlus, thiab sib txuas lus nrog Koj, nyuam yaus thiaj yuav muaj tswvyim hauv kev txhim kho thiab tivthaiv lub cuabyig. Nyuam yaus tuav Yexus Khetos lub npe thov, Amees.
Peb tsev neeg tabtom nyob zoo li cas lawm? Peb yuav tsum hloov yam dabtsi kom lub cuabyig muaj kev ruaj khov thiab vammeej raws li Vajtswv lub siab nyiam?
Nyeem Vajluskub hauv peb lub xyoos: Yaxayas 23.
Kênh Youtube BHKTHN:
