1 Xamuyees 8:1-6
Nqe cim:
“Vajtswv yog tus uas niaj hnub tsomkwm nej, yog li ntawd nej cia li muab nej tej kev nyuaj siab huv tibsi tso plhuav rau Vajtswv” (1 Petus 5:7)
Lus nug rau sawvdaws xav:
– Xamuyees raug cuam tshuam li cas thaum uas ntsib tej teebmeem hauv tsev neeg thiab hauv cov Yixalayees?
– Nws muaj tus cwjpwm li cas?
– Peb kawm tau dabtsi ntawm Xamuyees tus cwjpwm?
Hauv phau ntawv Xamuyees tshooj 7 sau xaus los ntawm qhov uas hais sau zog txog Xamuyees lub luag haujlwm uas puv nkaus koob hmoov thiab tej uas nws ua tau. Tiamsis tshooj 8 pib hais txog tej kev mob siab hauv Xamuyees lub tsev neeg thiab nws lub luag haujlwm. Qhov xwm ntawd tsis yog ua rau xaus lub luag haujlwm ua thawjtswj ntawm Xamuyees xwb, tiamsis kuj xaus kiag ntu caijnyoog uas muaj cov Thawjtswj coj kwvlam li 500 xyoos los lawm thiab.
Thawj txoj kev mob siab ntawm Xamuyees yog nws ob tug tub Yau-ees thiab Anpiyas ua neej tsis hwm Vajtswv thiab tsis xyaum raws li nkawd txiv tus qauv (nqe 1-3). Xamuyees paub zoo tshaj txoj kev mob siab no dua lwm tus, vim nws yog tus uas pom ntsoov tus Povthawj hlob Elis tsev neeg ntsib txoj kev mob siab no thaum nws tseem yau yau. Paub tseeb hais tias Xamuyees tsis xav saib pom nws ob tug tub ua phem, thaum uas saib pom Vajtswv rau txim rau tus Povthawj hlob Elis ob tug tub. Ntawd yog qhov vimchiv uas Xamuyees ua nws lub luag haujlwm ncaj ncees thiab hwm Vajtswv mus tas nws sim neej (1 Xamuyees 12:1-5). Txawm li ntawd los yam uas Xamuyees ntshai ntshai tau tseem tshwm los raug rau nws thiab ua rau nws mob siab kawg nkaus.
Txoj kev mob siab tim 2, kuj zoo li lwm tus, Xamuyees cia siab hais tias tej pejxeem sawvdaws yuav totaub thiab txhawb nws zog thaum ntsib tej kev mob siab hauv lub tsev neeg. Tiamsis yam uas nws tau txais ntawm cov neeg uas nws tau siv tas nws sim neej coj, hlub thiab pab lawv ces yog txoj kev tig rov tawmtsam nws thiab nws cov menyuam xwb (nqe 5). Cov pejxeem muaj vimchiv tsis yuav Xamuyees ob tug tub coj lawv ntxiv vim txoj kev phem uas nkawd ua, tiamsis Xamuyees los lawv tseem tsis xav yuav thiab lawv hais tias nws twb laus tsis muaj txaus dag zog thiab kev txawj ntse coj lawv ntxiv lawm. Qhov uas cov Yixalayees thov ib tug vajntxwv los kav lawv, qhia pom lawv lub tsamthawj kev ntseeg, tsis xav yuav Vajtswv kav lawv dhau los ntawm cov Thawjtswj ntxiv lawm tiamsis lawv xav tau ib tug vajntxwv kav lawv raws li lwm haivneeg tus qauv (nqe 5, 7).
Xamuyees ntsib tej kev mob siab kawg nkaus ntawm tsev neeg thiab cov pejxeem sawvdaws, tiamsis Xamuyees tsis thim rov, tsis nyob ib leeg nrog kev mob siab, lossis khaws nws txoj kev mob siab hauv siab ib yam li Elis, thiab kuj tsis mus ntsib cov pejxeem hais daws yus zaj. Xamuyees tau mus cuag Vajtswv taij thov Vajtswv pab (nqe 6). Peb pheej muaj tus cwjpwm tsis zoo thiab yuam kev thaum uas ntsib tej kev mob siab ntawm yus tsev neeg, yus tus txiv, tus pojniam, cov menyuam, kwvtij, nkauj muam hauv Pawg Ntseeg. Vim li ntawd, mus cuag Vajtswv rau tej lub sijhawm no yog ib txoj kev txiav txim siab txawj ntse kom zam dhau txoj mob siab uas yuav cuamtshuam peb txoj kev txiav txim siab thiab nrhiav tau Vajtswv kev pab, kev coj.
Thov Vajtswv,
Vajtswv, nyuam yaus ua Koj tsaug, txawm yog lub sijhawm nyuam yaus muaj kev nyuaj siab tsaus ntuj nti, tibneeg tso nyuam yaus tseg los Koj tseem hlub, totaub thiab tsis tso nyuam yaus tseg. Thov pab nyuam yaus paub los cuag Koj thiab nrhiav kev pab ntawm Koj. Nyuam yaus tuav Tswv Yexus Khetos lub npe thov, Amees.
Peb muaj tus cwjpwm li cas thaum uas ntsib tej kev mob siab hauv tsev neeg thiab Pawg Ntseeg?
Nyeem Vajluskub hauv peb lub xyoos: 2 Xwmtxheej Vajntxwv 10
Kênh Youtube BHKTHN:
