Pajlug 22:28-29
Nqe cim:
“Tus tswv hais tias, ‘Zoo heev, koj yog tus tubtxib uas zoo thiab ncaj ncees! Tej yam me me uas koj saib, koj ua ncaj, kuv yuav tsa koj ua tus saib yam uas loj. Koj cia li los nrog kuv nyob kaj siab lug” (Mathais 25:21)
Lus nug rau sawvdaws xav:
– Vim li cas tsis tau txav tus ciam teb qub?
– Tus neeg nquag tau txais nqi zog li cas?
– Peb siv tej koob hmoov, peevxwm Vajtswv pub li cas, thiab muaj yam twg peb cheemtsum hloov?
Nyob rau cheemtsam sab hnub poob thaum ub, tej pejxeem sawvdaws yeej hwm tus ciam teb ntawm ob tug neeg li lossis tus ciam teb ntawm ib haivneeg rau ib haivneeg, qhov no yog kev cheemtsum rau lub neej hauv tsev neeg thiab lub tebchaws. Tus ciam teb muab pob zeb lossis tej txhib zeb los ua cim ciam teb kom paub qhov twg yog leejtwg li thiab yog kev yog cai. Yog tsis muaj kev totaub thiab tsis coj raws txoj kev cai no, kev ntxhov thiab kev sib txeeb yuav muaj tshwm tuaj. Tes haujlwm uas txav tus ciam teb (nqe 28) hais txog txoj kev ua phem ntawm tus neeg uas siv hwjchim quab yuam tus neeg pluag, uas tsis muaj peevxwm. Vajtswv txoj kevcai pub dhau los ntawm Mauxes qhia hais tias: “Thaum nej mus nyob hauv lub tebchaws uas tus TSWV uas yog nej tus Vajtswv yuav muab rau nej, nej tsis txhob nam nej cov kwvtij tus ciamteb uas tej laus tu tseg” (2 Kevcai 19:14). Vajtswv cov menyuam yuavtsum paub meej hais tias av teb, qhov txhia chaw yog Vajtswv pub, vim li ntawd yuav tsum coj raws Vajtswv txoj kevcai, tsis yog xav tau ntau ces txawm quab yuam tus neeg pluag, uas tsis muaj peevxwm tug los ua yus tug.
Vaj ntxwv Xalumoos tsis qhia menyuam mus txhav cov neeg pluag tej av yuav thiab nrhiav yam uas tsis ncaj ncees, tiamsis vajntxwv qhia menyuam yuavtsum nquag rau yus tes haujlwm (nqe 29). Menyuam ncaj ncees rau tes haujlwm me, haujlwm hauv tsev, menyuam yuav tau tsaws mus nyob rau qhov chaw siab dua, muaj koobmeej dua. Pib ntawm kev ua haujlwm hauv tsev neeg, menyuam yuav tau ua haujlwm rau vajntxwv, rau lub tebchaws. Menyuam kev loj hlob, ua tau, ruaj khov yog ua dhau los ntawm lub peevxwm thiab kev ncaj ncees, tsis yog siv tswvyim phem los.
Hauv zaj lus pivtxwv txog Vajtswv lub tebchaws (Mathais 25:14-30), Tswv Yexus qhia hais tias tus neeg uas ntseeg siab tau rau hauv tes haujlwm me dua huvsi hauv ntiajteb no ces yuav muab tes haujlwm loj rau nws nyob hauv Vajtswv lub tebchaws uas yuav los. Hnub uas tus Tswv rov los, peb txhua tus uas yog Nws tub qhe, yuavtsum nyob tim ntsej tim muag ntawm Vajtswv thiab qhia txhua yam uas yus ua rau Nws. Thov Vajtswv pab kom peb nco hais tias peb yog Vajtswv cov tub qhe tau Vajtswv cob koob hmoov rau thiab ua kom muaj pajlaum rov rau Vajtswv. Peb yuavtsum nquag, ncaj ncees siv tej koob hmoov, lub peev xwm uas Vajtswv pub kom muaj nqis rau Vajtswv tes haujlwm. Txog hnub tus Tswv rov los, ntshaw kom peb txhua tus yuav tau tus Tswv qhuas hais tias, “Zoo heev, koj yog tus tubtxib uas zoo thiab ncaj ncees! Tej yam me me uas koj saib, koj ua ncaj, kuv yuav tsa koj ua tus saib yam uas loj. Koj cia li los nrog kuv nyob kaj siab lug”.
Thov Vajtswv,
Tus Tswv uas yog nyuam yaus Leej Txiv, ua Koj tsaug uas hlub thiab pub nyuam yaus muaj feem tau ua Koj tes haujlwm . Dhau zaj kawm hnub no, thov Koj qhia kom nyuam yaus yuav rau siab thiab ncajncees rau tes haujlwm uas Koj cob lawm. Nyuam yaus tuav Yexus Khetos lub npe thov, Amees.
Peb tabtom siv tej koob hmoov uas Vajtswv pub zoo li cas?
Nyeem Vajluskub hauv peb lub xyoo: 2 Xamuyees 7
Kênh Youtube BHKTHN:
