Kalatias 1:6-10
Nqe cim:
“Yog kuv tseem ua li ntawd, ces kuv yeej ua tsis tau Yexus Khetos tus tubtxib” (Kalatias 1:10b)
Lus nug rau sawvdaws xav:
– Vim li cas Timthawj Paulus pib nws tsab ntawv los ntawm tej lus cem cov ntseeg nyob hauv Kalatias?
– Paulus muaj lub homphiaj li cas thaum nws hais peb zaug txog kev ua xyem xyav, puas yog nws xav ua kom haum neeg siab (nqe 10)?
– Peb txiav txim siab ua neej zoo li cas thaum zeem paub yus yog Vajtswv ib tug tubtxib?
Nyob hauv lwm tsab ntawv uas yog Timthawj Paulus sau, tom qab cov lus hais noj qab nyob zoo tag kheev yog feem lus ua tsaug, lus qhuas thiab txhawb zog. Tiamsis nyob hauv tsab ntawv Kalatias, nws ho pib los ntawm tej lus cem: “kuv xav tsis thoob…” Nws tsis zais nws txojkev tag kev cia siab, tiamsis nws hais ncaj nraim dhau los ntawm tej lus cem cov menyuam ntawm sab ntsujplig, vim lawv “tso Yexus Khetos tus uas hlub lawv thiab xaiv lawv cia lawm tseg sai sai, thiab mus mloog lwm zaj uas tsis yog Vajtswv Txojmoo Zoo” (nqe 6). Qhov no ua rau peb pom muaj teebmeem loj ntsig txog kev ntseeg ntawm cov ntseeg hauv Kalatias, kuj ua rau peb pom txojkev sib raug zoo, sib ncawg ntawm Paulus thiab lawv txaus cia Paulus mus ncaj nraim rau nws tej lus cem.
Tiamsis nyob hauv nqe 10, Paulus ho hais txog peb zaug kev ua xyem xyav puas yog nws xav ua kom haum tibneeg siab. Qhov no puas muaj dabtsi dawm txog qhov uas cov ntseeg hauv Kalatias tabtom khiav mus caum dua lwm txojmoo zoo? Zoo li lwm tus tibneeg tau ua xyem xyav txog nws lub meejmom Timthawj, “qee leej uas ua ntxhov siab” rau cov ntseeg hauv Kalatias kuj ua rau lawv ua xyem xyav tias puas yog Paulus tsuas qhia tej kevcai ntseeg ntsig txog tau txais kev cawm dim los ntawm kev ntseeg xwb tsis yog los ntawm qhov uas coj kevcai, meej pem ces yog kevcai txiav tawv (Kalatias 2:15-16) kom haub tau lwm haivneeg uas tsis tau ua kevcai txiav tawv? Cia teb tau qhov no, Paulus hais tawv tawv tias, “Yog kuv tseem ua li ntawd, ces kuv yeej ua tsis tau Yexus Khetos tus tubtxib” (nqe 10). Tus tubtxib tsuas ua kom haum ib tug tswv siab xwb, ua kom haum Yexus Khetos lossis tibneeg. Thaum peb siv zog ua kom haum tibneeg siab, txhais tau hais tias peb tabtom ua tubtxib rau tibneeg, tsis yog ua tubtxib rau tus Tswv. Peb pom meej tias qhov no kuj tau qhia tshwm dhau ntawm qhov uas Timthawj Paulus tsis txajmuag cem thiab siv tej lus tawv qhawv los ntuas cov ntseeg hauv Kalatias.
Hauv Efexus 4:2, Timthawj Paulus tau qhia meej tias, “nej yuav tsum txo hwjchim, ua siab dawb siab zoo thiab ua siab ntev. Nej ib tug yuav tsum pab ib tug, sawvdaws thiaj paub hais tias nej sib hlub tiag.” Tiamsis cov ntseeg hauv Kalatias tej teebmeem loj heev, yog siv tej lus hais mos muag, ntse ntsuav ces lawv yuav tsis totaub meej tej uas lawv ua thiab tej teebmeem ntawd loj npaum li cas. Timthawj Paulus paub meej tias thaum twg yuav tsum ua tawv qhawv, tsis ntshai lwm tus tu siab, vim nws lub homphiaj ua neej tsis yog ua kom haum tibneeg siab, tiamsis yog ua kom haum tus Tswv siab thiab coj tej kev muaj nqis los rau txhua tus.
Txhua tus ntseeg puavleej tau tus Tswv cawm kom dhau los ua tus Tswv ib tug tubtxib (Loos 6:18, 22). Peb tsis tau cai los ua kom haum txhua tus siab dhau los ntawm kev txaus siab mus ib nqag rau tej yam phem uas tsis raws li peb txojkev ntseeg thiab peb cov ntseeg lub neej, tiamsis yuav tsum tig mus ua tej haujlwm uas haum tus Tswv siab, txawm tias muaj qee zaug yuav ua rau lwm tus tsis zoo siab los xij.
Thov vajtswv,
Tus Tswv, nyuam yaus yog koj ib tug tubtxib, thov pab nyuam yaus paub meej tias nyuam yaus lub homphiaj ua neej yog ua kom haum tus Tswv siab ua ntej kom nyuam yaus thiaj tau tus Tswv siv ua muaj nqis rau lwm tus. Nyuam yaus tuav Yexus Khetos lub npe thov, A-mees.
Peb kev ua neej qhia tshwm rau lwm tus pom tias peb tabtom yog Yexus Khetos tus tubtxib lossis yog tibneeg tus tubtxib?
Nyeem Vajluskub hauv peb lub xyoo: 2 Xamuyees 11
Kênh Youtube BHKTHN:
