Loos 14:1-12
Nqe cim:
“Nej yuav tsum txaus siab cia tus uas tsis ntseeg Vajtswv pestsawg nrog nej nyob, nej tsis txhob nrog nws sib cav txog nws txojkev ntseeg.” (Loos 14:1)
Peb saib ntxiv rau phau txhais tshiab.
“Nej yuav tsum txais tus uas kev ntseeg yau, tsis txhob sib cam rau tej uas nyias lub siab xav.” (Loos 14:1 HMOWSV)
Lus nug rau sawvdaws xav:
– Timthawj Paulus qhia txog yam twg hauv cov ntseeg Yexus?
– Paulus nqua hu kom lawv yuav tsum muaj tus cwjpwm thiab ua li cas rau cov neeg kev ntseeg tsawg?
– Zeem paub yus yuav mus sawv ntawm Vajtswv lub rooj txiav txim, qhov ntawd ua rau peb ua neeg li cas?
Hauv cov ntseeg Yexus nyob rau lub sijhawm ntawd muaj ib co kev ntseeg tsawg, thiab kuj muaj tej kev sib cav txog txojkev cawm dim. Timthawj Paulus muab ob qho los sib piv li no: Thib ib, hais txog kev noj haus: Ib tug ntseeg hais tias noj tau txhua yam, tus kev ntseeg tsawg hais tias tsuas noj zaub xwb. Tus neeg noj thuam tus uas tsis noj, tus uas tsis noj txiav txim rau tus noj (nqe 2-3). Thib ob, hais txog hnubnyoog: Qee tus hais tias hnub no tseemceeb dua hnub tod, ibtxhia hais tias txhua hnub puavleej tseemceeb ib yam nkaus (nqe 5). Timthawj Paulus hais txog tus neeg tsawg kev ntseeg yog cov ntseeg Yexus uas yog neeg Yudais nyob hauv tebchaws Loos, lawv tseem coj cov Yudais txoj kevcai thaum noj haus, caiv hnub Xanpataus thiab coj cov kevcai tseemceeb ua hauv ib lub xyoo. Cov ntseeg Yexus uas yog lwm haivneeg noj tau txhua yam, txawm yog tej tsiaj tsis huv los noj tau huvsi, thiab lawv hais tias txhua hnub puavleej tseemceeb ib yam nkaus. Qhov teebmeem tsis yog nyob ntawm tej zaub mov noj lossis hnub twg zoo, tiamsis yog qhov sib cav ntxhov hnyo, sib thuam thiab ib leeg txiav txim rau ib leeg ua rau Yexus Khetos lub cev sib cais.
Timthawj Paulus ntuas cov ntseeg kom sawvdaws paub txog lub hauvpaus thiab ib leeg txais yuav ib leeg txawm tias muaj qhov tsis sib thooj, tsis txhob sib cav txog tej kev xav sib txawv ntawd (nqe 1). “Yog li ntawd, nej tsis txhob pub leejtwg thuam nej hais tias ua li cas nej tsis caiv kev noj kev haus lossis Hnub Xanpataus.” (Kaulauxais 2:16). Raws li nyias qhov kev xav, txojkev ntseeg ua li cas kom tus Tswv lub npe tau koob meej (nqe 5-8). Peb tsis tas ua li lwm tus qhov kev xav, tiamsis qhia kev hlub thiab kev totaub txog cov ntseeg txojkev ntseeg. Tsis txhob muab yus qhov kev xav yuam kom lwm tus ua, cia lawv muaj sijhawm los kawm paub qhov tseeb.
Peb yoojyim txiav txim rau lwm tus heev, tiamsis tsuas yog Tswv Yexus xwb thiaj yog tus txiav txim. Yog tus Tswv uas dawbhuv, puv npo koob hmoov hlub twb txais yuav neeg txhaum los ntawm qhov uas lawv ntseeg Tswv Yexus thiab ua rau lawv ntseeg ruaj, ces peb yog leejtwg ua cas peb ho hloov tus Tswv txiav txim rau cov ntseeg (nqe 3-4)? Peb puavleej yog Vajtswv cov tubqhe zoo ib yam nkaus xwb. Nco ntsoov hais tias peb txhua tus puavleej yuav mus sawv ntawm Vajtswv lub rooj txiav txim thiab qhia txhua yam uas peb tau ua tas los (nqe 10-12). Yog li peb cia li vamkhom tus Tswv txoj koob hmoov, ua tib zoo saib tej haujlwm yus ua, tsis txhob sib cav tej uas tsis sib haum, sib thuam thiab ib leeg txiav txim rau ib leeg.
Thov Vajtswv,
Vajtswv! Nyuam yaus yog neeg txhaum los Koj txais yuav. Thov Koj pab kom nyuam yaus txhim kho kev nrog Koj sib raug zoo, qhib siab txais yuav cov kwvtij ntseeg uas xav tsis sib thooj, ua tiav tes haujlwm Koj muab kom Koj tau ntsejmuag. Nyuam yaus tuav Yexus Khetos lub npe thov, Amees.
Peb puas yuam kom lwm tus ua raws li peb txojkev xav?
Nyeem Vajluskub hauv peb lub xyoo: Yaxayas 8
Kênh Youtube BHKTHN:
