Klei Aê Diê Blŭ: Rôm 14:1-12
Êlan kliăng: “Bi kơ phung awăt hlăm klei đăo, jum bĕ digơ̆, ƀiădah đăm bi tăng ôh kyua klei mĭn mdê mdê” (Rôm 14:1)
Klei êmuh ksiêm mĭn: Ti klei jing ti krah phung đăo Khua ƀĭng kna Y-Pôl brei thâo? Ñu iêô kwưh si knuih brei digơ̆ mâo leh anăn ngă hŏng klei mdê amâo yuôm anăn? Thâo kơ drei srăng dôk ti anăp jhưng phat kđi Aê Diê ya klei bi hmăi mâo kơ klei drei dôk dơ̆ng ƀơ̆ng huă?
Ti krah phung đăo ênuk anăn mâo phung awăt hlăm klei đăo, leh anăn mâo klei bi tăng kyua klei mĭn mdê mdê amâo djŏ kơ klei bi mtlaih ôh. Khua ƀĭng kna Y-Pôl mă dua klei bi hmô klă: Tal sa, kơ mnơ̆ng ƀơ̆ng huă: Pô anei đăo ñu dưi ƀơ̆ng jih jang mnơ̆ng, pô mkăn awăt, ƀơ̆ng knŏng djam, pô ƀơ̆ng bi êmut kơ pô amâo ƀơ̆ng ôh, pô amâo ƀơ̆ng phat kđi pô ƀơ̆ng (êlan 2-3). Tal dua, kơ hruê: Pô anei mĭn hruê anei jing jăk hĭn kơ hruê mkăn, pô mkăn mĭn jih jang hruê msĕ sơăi (êlan 5). Phung awăt Khua ƀĭng kna Y-Pôl lač tinei jing phung Yuđa dôk ti čar Rôm đăo leh kơ Yêsu Krist, diñu ăt djă pioh klei bhiăn phung Yuđa hlăm klei ƀơ̆ng mnăm, djă pioh hruê Saƀat leh anăn hruê knăm yuôm hlăm thŭn. Êjai anăn, bi phung đăo jing phung tue digơ̆ ƀơ̆ng jih jang mnơ̆ng, wăt čĭm hlô mnơ̆ng amâo mâo doh ôh, leh anăn digơ̆ mĭn jih jang hruê jing jăk msĕ sơăi. Klei čiăng lač tinei amâo djŏ kơ mnơ̆ng ƀơ̆ng huă amâodah kơ hruê ôh, ƀiădah kơ klei bi tăng, bi êmut leh anăn klei phat kđi hdơ̆ng phung đăo ngă klei bi kah mbha hlăm asei mlei Yang Krist.
Khua ƀĭng kna Y-Pôl mtă brei phung đăo thâo săng kơ klei jing mdê djuê ana leh anăn bi tŭ kơ klei jing mdê anăn, amâo bi tăng ôh kơ klei mĭn mdê mdê (êlan 1). “Kyuanăn đăm brei arăng phat kđi diih ôh kyua mnơ̆ng ƀơ̆ng mnăm, amâodah kyua hruê knăm, hruê mlan mrâo ƀlĕ, amâodah hruê sabat” (Kôlôs 2:16). Grăp čô srăng ƀơ̆ng mnăm tui si klei mĭn leh anăn hnơ̆ng klei đăo ñu pô čiăng bi guh kơang kơ Khua Yang (êlan 5-8). Drei amâo srăng ngă tui si klei mĭn pô mkăn ôh, ƀiădah brei drei bi êdah klei khăp leh anăn klei thâo săng kơ phung awăt hlăm klei đăo. Grăp čô amâo dưi mgô̆ pô mkăn ngă tui si klei pô mĭn ôh, ƀiădah lui digơ̆ mâo mmông găl dưi bi mđĭ klei digơ̆ thâo săng kơ klei sĭt nik.
Ênưih snăk drei bi phat kđi hdơ̆ng drei, ƀiădah knŏng Khua Yang yơh jing Khua phat kđi. Tơdah Aê Diê Pô doh jăk leh anăn bŏ hŏng klei pap jum leh mnuih soh hŏng klei digơ̆ đăo kơ Yêsu leh anăn bi kjăp digơ̆ snăn hlei pô hlăm phung drei jhŏng hrô Aê Diê phat kđi ayŏng adei drei (êlan 3-4)? Jih jang drei jing dĭng buăl Aê Diê msĕ sơăi. Hdơr bĕ, grăp čô drei srăng dôk ti anăp jhưng phat kđi Aê Diê leh anăn hưn jih jang bruă drei ngă leh (êlan 10-12). Snăn yơh brei drei knang kơ klei pap Aê Diê, knŏng mĭn kơ bruă drei ngă hrô kơ klei bi tăng kyua klei mĭn mdê mdê, bi êmut leh anăn phat kđi pô mkăn.
Si ngă drei tuôm mgô̆ mơ̆ pô mkăn ngă tui si klei drei mĭn?
Wah lač: Ơ Khua Yang, kâo jing mnuih soh Ih jum leh. Đru kâo khăp kơ klei bi mguôp sĭt suôr hŏng Ih, pŏk ai tiê jum phung ayŏng adei mâo klei jing mdê mdê, bi leh bruă Ih jao leh čiăng bi guh kơang kơ Anăn Ih. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Êsai 8
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
