Pajlug 23:22-25
Nqe cim:
“Qhov tseeb, tswvyim, kawm txawj kawm ntse, thiab lub siab thoob tsib to nrog yog tej uas muaj nujnqis heev, tsimnyog muab khaws cia, tsis txhob muab muag.” (Pajlug 23:23)
Lus nug rau sawvdaws xav:
– Vajntxwv Xalumoos qhia yam dabtsi rau menyuam?
– Nqi zog ntawm kev txais yuav thiab ua raws kev txawj ntse yog dabtsi?
– Peb lub neej tabtom ua rau niamtxiv zoo siab lossis ua rau lawv los kua muag?
Vajntxwv Xalumoos qhia rau cov menyuam yam tseemceeb ntawm qhov uas nrhiav, txais yuav thiab ua raws li txojkev txawj ntse. Cov menyuam yaus cheemtsum kawm txojkev txawj ntse ntawm niamtxiv. Lo lus “muaj koj” hais mus hais los ntau zaus yog xav txog txojkev sib txuas ntawm niamtxiv thiab menyuam. Yug menyuam twb nyuaj lawm, qhia menyuam tseem nyuaj dua ntau npaug. Cov menyuam yuav tsum paub, hwm tus Tswv thiaj yog tus uas muaj kev txawj ntse (Pajlug 1:7), thiab qhov kev “txawj ntse” thawj uas tus menyuam tau yog vim niamtxiv qhia. Tus Tswv hais kom Nws haivneeg yuav tsum qhia txojkev txawj ntse rau tej menyuam. Niamtxiv yuav tsum qhia menyuam raws li Vajtswv Txojlus hais: “Qhia menyuam kom paub ua nws lub neej, nws yuav nco ntsoov tej lus ntawd mus tas nws sim neej.” (Pajlug 22:6). Menyuam txawj ntse yog mloog niamtxiv tej lus qhuab ntuas (Pajlug 13:1), txais yuav thiab ua raws li txojkev txawj ntse ntawd. Lo lus “Thaum koj niam laus lawm, koj yuav tsum pauj nws txiaj ntsig.” Lossis tsis txhob muag txojkev txawj ntse, qhia kom cov menyuam thaum loj tuaj, yuav tsum saib niamtxiv tej lus qhia muaj qabhau, tsis txhob muab niamtxiv tej lus qhia tso tseg.
Cov menyuam tsis yog kawm kev txawj ntse ntawm niamtxiv xwb, tiamsis yuav tsum xwbtim kawm ntxiv kom loj hlob thiab ua raws kev txawj ntse qhia. Lo lus “khaws”, “muag” muaj lub ntsiab hais txog kev ua lag luam. Yuav tsum zoo siab them tus nqis rau kev txawj ntse. Niamtxiv pogyawg muaj feem qhia menyuam, tiamsis tsuas yog menyuam thiaj muaj feem txais yuav tus Tswv tej lus qhia rau hauv siab, khaws thiab them tus nqis kawm txawj ntse thiab ua raws li kev txawj ntse qhia.
Qhov nqi zog zoo rau cov menyuam thaum txais yuav kev txawj ntse, hwm tus tswv thiab ua raws li Vajtswv Txojlus qhia tsis yog ua tau txhua yam hauv kev ua neej xwb, tseem pub tau txojsia ntev rau cov menyuam, niamtxiv muaj kev zoo siab kawg nkaus. Ntau tus menyuam tabtom ua neej zoo li tus tub uas yuam kev (Lukas 15:11-31), tsis kam mloog niamtxiv ntuas, nws ua raws nws siab nyiam, ua txhaum rau tus Tswv thiab niamtxiv, txawm yog zeem paub, tig rov los los lub neej yeej zoo siab tsis txaus, yuav nyuaj siab ntsuav ib ntu sijhawm ntev loo. Muaj dua lwm tus menyuam pheej niaj hnub mus ua txhaum, tiv ntau qhov kev txajmuag. Lawv twb ua rau niamtxiv los lub kuamuag kawg, tsis muaj kev kaj siab. Thov kom peb txhua tus, txawm yog niamtxiv lossis menyuam, peb cia li siv zog qhia, txais yuav thiab ua raws txojkev txawj ntse kom peb tsevneeg niaj hnub zoo siab luag ntxhi.
Thov Vajtswv,
Vajtswv, ua tsaug uas Koj pub nyuam yaus muaj niamtxiv qhia Koj Txojlus rau nyuam yaus. Thov Vaj Ntsujplig qhia kom nyuam yaus tas siab nrho txais yuav thiab ua raws li txojkev txawj ntse, kom ua rau niamtxiv zoo siab, thiab ua rau Vajtswv tau ntsejmuag. Nyuam yaus tuav Tswv Yexus lub npe thov, Amees.
Peb cheemtsum hloov yam dabtsi kom peb muaj kev txawj ntse, ua rau niamtxiv zoo siab thiab ua rau Vajtswv tau ntsejmuag?
Nyeem Vajluskub hauv peb lub xyoo: Pajlug 22
Kênh Youtube BHKTHN:
