Klei Aê Diê Blŭ: Klei Bi Hriêng 23:22-25
Êlan kliăng: “Blei bĕ klei sĭt nik, đăm čhĭ hĕ ôh, blei klei thâo mĭn, klei mjuăt, leh anăn klei thâo săng” (Klei Bi Hriêng 23:23)
Klei êmuh ksiêm mĭn: Ya klei Mtao Salômôn mtă kơ anak ñu? Si boh tŭ mơ̆ng klei hmư̆ leh anăn hlue ngă klei thâo mĭn? Klei hdĭp drei dôk ngă kơ amĭ ama mơak hĕ amâodah hia jih êa ală?
Mtao Salômôn mtô anak hnơ̆ng yuôm bhăn kơ klei tui duah, hmư̆ leh anăn hlue ngă klei thâo mĭn. Phung anak hlăm ênuk hđeh brei hmư̆ klei thâo mĭn mơ̆ng amĭ ama. Boh blŭ “pô kkiêng kơ ih” mâo mñă lu blư̆ lač kơ klei bi mguôp amĭ ama hŏng anak. Kkiêng anak hlăm klei dleh dlan, ƀiădah bi hriăm anak dleh dlan hĭn mơh. Brei amĭ ama mtô anak tur knuih hdĭp djŏ, hnơ̆ng čuăn hdĭp tui si Aê Diê čiăng. Brei anak thâo klă, huĭ mpŭ kơ Yêhôwa jing mphŭn kčưm kơ klei thâo mĭn (Klei Bi Hriêng 1:7), leh anăn klei “thâo mĭn” tal êlâo anak mâo jing kyua klei mtô mơ̆ng amĭ ama. Aê Diê mñă klă phung ƀuôn sang Aê Diê brei mtô klei thâo mĭn Aê Diê kơ anak čô. Phung amĭ ama brei mtô anak msĕ si Klei Aê Diê Blŭ mtô: “Bi hriăm hđeh thâo êlan ñu srăng tui hlue, leh anăn tơdah ñu mduôn ñu amâo srăng weh ôh mơ̆ng êlan anăn” (Klei Bi Hriêng 22:6). Anak thâo mĭn hmư̆ klei ama mtô (Klei Bi Hriêng 13:1), hmư̆ leh anăn hlue ngă klei thâo mĭn anăn. Boh blŭ: “đăm bi êmut ôh kơ amĭ ih tơdah gơ̆ mduôn leh”, amâodah đăm čhĭ hĕ ôh klei thâo mĭn, mñă kơ anak wăt tơdah hriê kơ prŏng, snăn klei amĭ ama mtô ăt brei mđing, amâo dưi lui ôh ôh klei phung amĭ ama pô mtô.
Phung anak amâo djŏ knŏng mă klei thâo mĭn mơ̆ng amĭ ama ôh, ƀiădah brei thâo čŏng hriăm leh anăn hlue ngă klei thâo mĭn. Boh blŭ “blei”, “čhĭ” jing klei mnia blei. Brei tŭ klei tla ênoh, luč liê čiăng dưi mâo klei thâo mĭn. Amĭ ama leh anăn aduôn aê dưi mtô anak, ƀiădah knŏng phung anak yơh dưi mă tŭ Klei Aê Diê Blŭ hlăm ai tiê, ksiêm mĭn leh anăn tla ênoh čiăng tui hriăm leh anăn hlue ngă klei mtô anăn.
Boh tŭ jăk siam phung anak mă tŭ klei thâo mĭn, jih ai tiê huĭ mpŭ leh anăn gưt hlue si Klei Aê Diê Blŭ amâo djŏ knŏng ba klei tŭ jing hlăm klei hdĭp ôh, klei hdĭp hlŏng lar kơ anak čô, ƀiădah ăt ba klei mơak êbeh dlai kơ amĭ ama. Lu phung mda asei dôk hdĭp msĕ si sa čô Anak Luč Leh (Y‑Luk 15:11-31), hngah kơ klei mtô thâo mĭn mơ̆ng amĭ ama, hlue klei mĭn pô, ngă soh hŏng Aê Diê, hŏng amĭ ama, wăt tơdah hdơr, lŏ wĭt snăn anôk êka hlăm ai tiê ăt dleh mơh jih, tŭ klei ênguôt hnĭng jih sa wưng sui. Đa đa phung mkăn ăt dôk lĕ hlăm klei soh, tŭ lu klei rŭng răng ênguôt hnĭng. Diñu ngă kơ amĭ ama hia tơl jih êa ală, luč jih klei mơak. Čang hmăng grăp čô drei wăt tơdah jing amĭ ama amâodah anak čô brei jih ai tiê mtô, hmư̆ leh anăn hlue ngă klei thâo mĭn Aê Diê čiăng kơ gŏ sang mơak mñai nanao.
Ya klei brei drei bi mlih čiăng hdĭp thâo mĭn, bi mơak kơ amĭ ama leh anăn guh kơang Anăn Aê Diê?
Wah lač: Ơ Khua Yang, bi mni kơ Ih brei leh kơ kâo mâo amĭ, mâo ama mtô mñă Klei Aê Diê Blŭ kơ kâo. Akâo kơ Yang Mngăt Jăk mñă kơ kâo jih ai tiê hmư̆ leh anăn hlue ngă klei thâo mĭn čiăng bi mơak kơ amĭ ama, leh anăn bi guh kơang Anăn Ih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Bi Hriêng 22
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
