Tĭt 3:1-2
“Ih tơ’blŏk ăn kơ lu buăl lui athei sư lui yom kơ dôm lu kră pơgơ̆r; păng dôm tơdrong ‘lơ̆ng sư wơh wă kơ bơ̆n pơm, bơ̆n athei pơm mă tơpă.” (Tĭt 3:1)
Nơ̆r jet tơchĕng pơwao:
– Yua kơ liơ bơngai lui athei chu yom kơ bơngai yŏng pơgơ̆r?
– Đei minh tơdrong ‘nguaih kiơ kơ tơdrong ‘noh?
– Kon pơlei arih Kră Yang lăp đon kăl kơ đei jơhngơ̆m thoi yơ hăm rim bơngai?
– Bơ̆n arih kiơ̆ kơ tơdrong tơproh mă ‘măn adrol hloh hơyơ wă kơ Kră Yang lăp đon?
Tĭt đei bơtho kơ lu bơngai lui tơ pơlei kret gah tơdrong lu sư hiơ̆k hăm lu bơngai pơgơ̆r mălei rŏ lăng lu sư hiơt bơih minh ‘nu bơngai lui kơ Kră Yang gah Dêh char ‘Bok Kei-Dei, kư̆m kon pơlei lăm minh dêh char. Thoi noh, dang kơ bơtho gah tơdrong arih pơm ‘lơ̆ng lăm khul bơngai lui (chăl 2), ‘bok Pôl bơtho gah tơdrong arih pơm ‘lơ̆ng lăm teh đak đơ̆ng nơ̆r sư pơkă khan kơ Tĭt, “Ih tơ’blŏk kơ lu buăl lui athei sư lui yom kơ dôm lu bơngai kră pơgơ̆r…” (trong 1). Adrol kơ noh dang tơhngam sơnăm, ‘bok Pôl kư̆m đei bơtho tơdrong ‘nâu lăm kơthơ Rôm 13:1, “Đĭ đăng kơ bơ̆n athei chu yom kơ bơngai mă pơgơ̆r bơ̆n. Tơ̆ng ‘Bok Kei-Dei ưh kơ ăn, ưh kơ đei bu gơh pơgơ̆r. Đĭ đăng lu bơngai pơgơ̆r đơ̆ng ‘Bok Kei-Dei ăn ngăl”.
Đĭ đăng tôm tơdrong mơ̆ng kơ bơngai pơgơ̆r tơ’bôh ăn ngăl păng đơ̆ng ‘Bok Kei-Dei ăn, mă kơplah wă pơtơm bơ̆jang pơgơ̆r bơngai pơgơ̆r teh đak Rôm kơplah noh sơ̆ ưh kơsĭ bơngai pơm ‘lơ̆ng, mălei tơdrong noh kư̆m ưh kơ đei ‘bơm kiơ kơ bơngai lui athei chu kơ lu bơngai pơgơ̆r. Mălei minh tơdrong ‘nguaih kơ tơdrong noh, yua kơ bơ̆n kon pơlei dêh char ‘Bok Kei-Dei, đei lu mơ’nah ưh kơ đei chu nơ̆r ‘Bok Kei-Dei păng chu kơ kon bơngai ngăl ôh dah đei tơdrong phara hăm tơdrong lui ‘lơ̆ng Bơngai lui. Kơplah ‘noh, bơ̆n athei chu nơ̆r ‘Bok Kei-Dei păng lui kơ nơ̆r Sư (Tơdrong jang 5:24-29).
Kră Yang Yêsu khan hơđăl, “Hiôk bĕ lu iĕm mă đe areh arĕnh pơm kuă kơ iĕm, pơjăm pơjuă iĕm, khan kơ iĕm bơngai kơnê̆ yua kơ iĕm lui kơ Inh kon bơngai”. (Luka 6:22). Mă khan teh đak achăng, areh arĕnh kuă kơ bơ̆n, lei na bơ̆n bơngai mă kon pơlei Dêh char ‘Bok Kei-Dei , bơ̆n kăl kơ arih pơm kơ Kră Yang lăp đon păng pơm hơdah Anăn Kră Yang hăm tơdrong arih “pơm dôm tơdrong ‘lơ̆ng”. Athei bơ̆jang kơ đĭ đăng bơngai, mă khan lu bơngai mă pơm pơmat, pơm kơnê̆ kơ bơ̆n; “khan kơ lu sư ‘nĕ bâu roi pơjăm đe, ‘nĕ kơ hơwĕng kơ đe, bơ̆n pơm jơhngơ̆m dim păng đe.” (trong 2)
Wă kơ arih pơm kơ Kră Yang lăp đon, bơngai lui kăl kơ arih kiơ̆ tơdrong tơproh ‘măn hơdrol hloh. Mă mônh, “Bơ̆n athei ‘mêm kơ Kră Yang bơ̆n hăm đĭ jơhngơ̆m klơm klak bơ̆n păng đĭ dôm tơdrong đon bơ̆n tơchĕng”; Mă ‘bar “păng bơ̆n athei ‘mêm kơ bôl buăl thoi bơ̆n ‘mêm akâu bơ̆n kơdih” (Luka 10:27). Lăm tơdrong tơ’bưh hăm tơdrong rơih iŏk phŏ gơh tơplih đon lui, lei na “iĕm ‘nĕ hli mă tơdrong wă truh kơ iĕm kơnh pơge… mălei apinh iĕm adrin bĕ truh lôch…” (Tơdrong Tơ’bôh 2:10).
Ơ Kră Yang kơkuh kơ Ih, inh apinh Ih ăn Yang Bơhngol ‘Lơ̆ng ăn kơ inh gơh hơgei wă kơ inh gơh jing minh ‘nu bơngai arih pơm kơ Kră Yang lăp đon lăm teh đak âu. Apinh Kră Yang thim ăn jơhngơ̆m pran wă kơ inh chu kiơ̆ nơ̆r Ih lăm tôm tơdrong, yua anăn Kră Yang Yêsu Krist, Amen!
Bơ̆n arih thoi yơ wă tơ’bôh bơ̆n jing bơngai arih pơm kơ Kră Yang lăp đon?
Đŏk Sơ̆p Hla bơar ‘Bok Kei-Dei lăm pêng sơnăm: Hơriso 46-47
Kênh Youtube BHKTHN:
